Azərbaycan 2010-cu ilədək qanunvericiliyin DTT standartlarına uyğunlaşdırılması üzrə fəaliyyət planını yerinə yetirmək niyyətındədir

Azərbaycan 2010-cu ilədək qanunvericiliyin Dünya Ticarət Təşkilatının (DTT) standartlarına uyğunlaşdırılması üzrə fəaliyyət planını yerinə yetirmək niyyətindədir. Bunu xarici işlər nazirinin müavini Mahmud Məmmədquliyev Xəzər İnteqrasiya İşgüzar Klubunun üzvləri ilə görüşdə bəyan etmişdir.

M.Məmmədquliyev bildirmişdir ki, 2006-cı ildə Azərbaycan Prezidenti İlham Əliyev tərəfindən qanunvericiliyin DTT standartlarına uyğunlaşdırılmasına dair fəaliyyət planı təsdiqlənmişdir. Hazırda bu plan çərçivəsində müəyyən qanun və sənədlər artıq təsdiqlənmiş, onların digər hissəsi təsdiqlənmə prosesindədir. Ümid olunur ki, bu plan 2009-cu ilin sonunadək yerinə yetiriləcəkdir. Gələcəkdə zərurət yaranarsa, qanunvericiliyin DTT standartlarına uyğunlaşdırılması prosesi davam etdirilə bilər.

Nazir müavini əlavə etmişdir ki, 2009-cu ilin birinci yarısında Cenevrədə işçi qrupunun DTT Katibliyi ilə növbəti görüşü keçirilə bilər. Hər şey qurum üzvlərindən aldığımız suallara nə qədər tez cavab verə biləcəyimizdən asılıdır. Bizim cavablarımızla tanış olmaq üçün onlara ən azı bir ay vaxt lazımdır. Əgər biz martın sonunadək bütün suallara cavab verə bilsək, onda cari ilin birinci yarısında işçi qrupunun növbəti iclasının keçirilməsi üçün imkan yaranacaqdır. Sualların sayı çox deyil, lakin onlar daha ətraflı cavab tələb edir.

Azərbaycanın 2009-cu ildə DTT-nin bəzi üzvləri ilə ikitərəfli danışıqları başa çatdıra biləcəyini deyən M.Məmmədquliyev vurğulamışdır ki, hazırda 6 ölkə ilə danışıqlar sona yetmişdir. Onlardan Türkiyə, BƏƏ, Oman ilə müvafiq protokollar imzalanmış, Gürcüstan, Qırğızıstan, Moldova ilə isə sənədlər imzalanmaq üçün hazırlanır.

Qeyd edək ki, Azərbaycan 2007-ci ildə Türkiyə, 2008-ci ildə isə Oman və BƏƏ ilə danışıqların başa çatması haqda ikitərəfli protokol imzalamışdır.

* * *

M.Məmmədquliyev demişdir ki, rotasiya prinsipinə görə, Azərbaycan 2009-cu ilin mayından Qara Dəniz İqtisadi Əməkdaşlıq Təşkilatında (QİƏT) 6 ay müddətinə sədr olmalıdır. Biz hazırda bu məsələni öyrənirik. Azərbaycan təşkilatda sədrlik edəcəyi təqdirdə əsas prioritet istiqamətlərini müəyyənləşdirmişdir. Birinci istiqamət QİƏT-in strukturunda islahatların dərinləşdirilməsidir. 2003-cü ildə biz islahatlarla bağlı məsələ qaldırdıq, lakin indiyədək lazımi nəticələr əldə olunmamışdır. Buna görə də hesab edirik ki, QİƏT-də sədrlik islahatlara yeni təkan verəcəkdir.

Nazir müavini Avropa İttifaqı ilə əməkdaşlığın genişləndirilməsini ikinci, QİƏT ölkələrində informasiya-kommunikasiya texnologiyalarının inkişafının təşviqini üçüncü prioritet istiqamət adlandırmışdır. Biz informasiya-kommunikasiya texnologiyalarının inkişafını vacib sayırıq və Azərbaycan bu sahədə əlaqələndirici ölkə olmağa hazırdır.

AzərTAc

Azərbaycan.-2009.-21 fevral.-S.2.