Azərbaycan xalqının tərəqqisinə hesablanan islahatlar uğurla davam edir

Yeni Azərbaycan Partiyasının Yasamal rayon təşkilatının yaranmasından 16 il keçir. Ötən gün 16-cı ildönümünə həsr olunmuş toplantı ulu öndər Heydər Əliyevin əziz xatirəsini bir dəqiqəlik sükutla anaraq öz işinə başladı.

Toplantını YAP Yasamal rayon təşkilatının sədri Fikrət İsmayılov açaraq bildirdi ki, 1993-cü il fevralın 20-də 26 partiya özəyini təmsil edən 560 nəfər təşəbbüskeş ilə təsis konfransı keçirildi. Bu gün Yeni Azərbaycan Partiyası Yasamal rayon təşkilatının sıralarında 153 ilk partiya təşkilatını təmsil edən 22000-dən artıq partiya üzvü fəaliyyət göstərir: "Ta o gündən başlayaraq hər bir YAP üzvü Azərbaycanın qüdrətli dövlətə çevrilməsi üçün var gücü ilə çalışdı. Bu illər ərzində insanların yaşayış tərzi yaxşılaşdı, cəmiyyətimiz inkişaf etdi, dövlətimizin beynəlxalq aləmdə nüfuzu artdı. 700 mindən artıq iş yeri açıldı, yoxsulluq 49 faizdən 13,2 faizə qədər azaldı. Əldə olunmuş nailiyyətlər ulu öndər Heydər Əliyevin tövsiyələrinə əməl olunması sayəsində qazanılmışdır. Bundan sonra da belə olacaqdır".

YAP Yasamal rayon təşkilatının idarə heyətinin üzvü, Bakı Metropoliteninin rəisi Tağı Əhmədov bildirdi ki, Yeni Azərbaycan Partiyasının yaranması bizə ilk növbədə müstəqil Azərbaycan verdi: "Bu gün YAP-ın 500 minə yaxın üzvü var. Üzvlərin sayı isə getdikcə artmaqdadır. Xalqımızın qazandığı ikinci ən böyük uğur bu siyasi kursun davamçısı olan dövlət başçımız İlham Əliyevin rəhbərliyi ilə Azərbaycanın irəliləməsidir. Hamımız yaxşı bilirik ki, dünya ölkələrini bürümüş iqtisadi böhran respublikamızdan yan keçdi. Bu, əlbəttə düşünülmüş, məqsədyönlü islahatların nəticəsidir".

Çıxış edənlər - orta məktəb müəllimləri, həkimlər və ictimaiyyətin nümayəndələri YAP Yasamal rayon təşkilatının idarə heyətini və üzvlərini təşkilatın ildönümü münasibətilə təbrik edib, uğurlu fəaliyyətlərini davam etdirmək üçün onlara bir daha müvəffəqiyyətlər arzuladılar.

Yeni Azərbaycan Partiyası Yasamal rayon təşkilatının yaranmasının 16-cı ildönümünə həsr olunmuş təntənəli toplantı iştirakçıları sonda Azərbaycan Respublikasının Prezidenti, Yeni Azərbaycan Partiyasının sədri İlham Əliyevə müraciət qəbul etdilər.

R.Rzalı

Azərbaycan.-2009.-21 fevral.-S.2.