Bakıda "Azərbaycan Respublikası regionlarının sosial-iqtisadi inkişafı Dövlət Proqramının

(2004-2008-ci illər)" icrasının yekunlarına həsr olunmuş konfrans keçirilmişdir

Qusar Rayon İcra Hakimiyyətinin başçısı Şair Alxasovun çıxışı

- Möhtərəm cənab Prezident!

İcazə verin, əvvəlcə, Sizə bütün qusarlıların salamlarını, dərin hörmət və ehtiramlarını çatdırım. Deyim ki, hər bir qusarlı Azərbaycan kimi inkişaf edən, çiçəklənən bir ölkənin vətəndaşı olması ilə, Sizin kimi qurub-yaradan, müasir və qayğıkeş Prezidenti ilə fəxr edir.

Ötən il oktyabrın 15-də keçirilmiş prezident seçkilərində Sizə səs verməklə, onlar həm Sizə, həm əbədiyaşar Heydər Əliyev ideyalarına, həm də öz xoşbəxt gələcəklərinə səs verdilər. Bu gün Azərbaycanın tarixində çox böyük əhəmiyyət kəsb edən bir dövrə yekun vururuq. Sizin uzaqgörənliyiniz və qətiyyətiniz sayəsində, 2004-cü ildə hazırlanıb qəbul edilmiş regionların sosial-iqtisadi inkişafı Dövlət Proqramı artıq böyük uğurla yerinə yetirilmişdir. Bu müddətdə Azərbaycanın digər rayonları kimi, Qusar rayonu da dinamik inkişaf yolu keçmişdir. Sizin bölgələrin problemlərinə diqqətlə yanaşmağınızın nəticəsidir ki, son beş il ərzində Qusar rayonunda ümumi məhsul istehsalı 2,8 dəfə, kənd təsərrüfatı məhsulları istehsalı 2,1 dəfə, rayonun iqtisadiyyatına yönəldilən investisiyalar 5,6 dəfə, büdcə xərcləri 5,1 dəfə, orta aylıq əməkhaqqı isə 4,5 dəfə artmışdır.

Qusar rayonunun ölkə xəritəsindəki coğrafi və iqtisadi mövqeyi, təbii sərvətləri və füsunkar gözəlliyi onu yerli və beynəlxalq turizmin inkişafı üçün çox cəlbedici bir bölgəyə çevirir. Rayonumuzda aparılan quruculuq işləri bölgədə turizmin inkişafı üçün möhkəm bünövrə yaradır. Belə ki, ötən illər Qusarın təbii gözəlliyi saxlanılmaqla çoxsaylı yeni sosial obyektlər inşa olunmuş, müasir park və xiyabanlar salınmış, şəhərin işıqlandırma sistemi yenidən qurulmuş, şəhərdaxili küçələrə ümumilikdə 200 min kvadratmetrə yaxın asfalt örtüyü döşənmiş, mövcud çoxmənzilli yaşayış binalarının əksəriyyəti əsaslı təmir edilmiş, nümunəvi məhəllələr salınmışdır. Qusar şəhəri də daxil olmaqla 21 yaşayış məntəqəsinə təbii qazın verilməsi bərpa edilmiş və beş il ərzində 30 kilometrdən çox müxtəlif diametrli yeni qaz xətləri çəkilmişdir.

Eyni zamanda, 61 kilometr uzunluğunda yeni su xətləri çəkilmiş, istismara yararsız vəziyyətə düşmüş 30 kilometrdən çox su xətləri yeniləri ilə əvəz edilmişdir. Təkcə son bir ildə on kənddə subartezan quyusu qazılmışdır. Bazar iqtisadiyyatındakı müsbət meyilləri hiss edən iş adamları Qusarda çoxmərtəbəli binaların inşasına başlamışlar. Sizin təşəbbüsünüz və Bakıdan şimal sərhədlərinə doğru çəkilən və Cənubi Qafqazda analoqu olmayan müasir beton avtomobil yolu bölgənin inkişafında, o cümlədən Qusarın önəmli turizm və mədəniyyət mərkəzinə çevrilməsində böyük rol oynayacaqdır. Biz bunu yolun açılışından sonra rayonumuza gələn qonaqların sayının nəzərəçarpacaq dərəcədə artmasından hiss edirik.

Sizin tapşırığınızla 29 kilometrlik Qusar-Laza yolunun inşasına artıq başlanılmışdır. Biz qusarlılar rayonumuza növbəti səfəriniz zamanı bu yolun da təntənəli açılışında iştirakınızı səbirsizliklə gözləyirik. Qusarlılar inanırlar ki, yaxın gələcəkdə rayonumuzun bütün kənd yolları belə yüksək səviyyədə və keyfiyyətlə inşa ediləcəkdir.

Nəhayət, açılışında iştirak etdiyiniz, özünəməxsus memarlıq üslubunda inşa edilmiş Qusar Olimpiya Kompleksi bu gün qapılarını rayon sakinlərinin üzünə geniş açmışdır. Fürsətdən istifadə edib, Sizə hesabat vermək istəyirəm ki, Qusar Olimpiya Kompleksi bu gün tam gücü ilə işləyir. Yeri gəlmişkən qeyd edim ki, rayonumuza gələn xarici qonaqlar bu kompleksin onlarda doğurduğu heyranlıq, hətta mən deyərdim, həsəd hisslərini gizlədə bilmirlər.

Möhtərəm cənab Prezident!

Biz artıq bu gün verdiyiniz dəstək sayəsində böyük cəsarətlə irimiqyaslı, ölçülərinə görə indiyədək analoqu olmayan turizm layihələrinə qoşuluruq. Mən Sizin təşəbbüsünüz və xeyir-duanızla Qusar rayonunun Laza və Aladaş kəndlərinə, eləcə də Böyük Qafqaz sıra dağlarının yüksək zirvələrindən biri olan Şahdağına yaxın ərazidə, - bölgədə bənzəri olmayan Şahdağ Qış-Yay Turizm və İstirahət Kompleksini nəzərdə tuturam, - təbiətin füsunkar guşəsində beynəlxalq standartlar səviyyəsində yaradılan bu kompleks respublika əhalisinin, həmçinin xarici ölkələrin böyük maraq və diqqətinə səbəb olmuşdur. Bu gün Şahdağ sözü rayonumuzda ağsaqqaldan tutmuş məktəbliyədək hamının dilindədir. Layihə rayona yeni iş yerləri, investisiyalar, inkişaf, bir sözlə tamamilə yeni həyat gətirəcəkdir.

Yaxın keçmişdə qusarlılar heç təsəvvürlərinə belə gətirə bilməzdilər ki, vaxt olacaq rayonun ərazisində dəniz səviyyəsindən 3 min metr hündürlükdə 340 yerlik dördulduzlu hotel, lift bazası, xizək məktəbi, buraz yolları inşa ediləcək, süni kanallaşdırma sistemi yaradılacaqdır. Kim düşünərdi ki, dünyanın aparıcı turizm şirkətləri Qusarda işləmək üçün bir-biri ilə rəqabət aparacaqlar. Bəli, indi bunlar günün reallığı, cənab Prezident, Sizin apardığınız müdrik siyasətin nəticəsidir.

Biz əminik ki, bu layihə müvəffəqiyyətlə həyata keçəcək, bütün dünya özü üçün Qusar fenomenini kəşf edəcəkdir. Gün gələcəkdir ki, biz Qusarı İsveçrə ilə yox, İsveçrəni Qusarla müqayisə edəcəyik. Biz buna ürəkdən inanırıq.

Möhtərəm cənab Prezident!

Biz çox sevinirik ki, ulu öndərimiz Heydər Əliyev kimi Siz də Azərbaycanın şimal qapısı sayılan Qusar rayonuna, onun sosial-iqtisadi inkişafına həmişə böyük diqqət və qayğı ilə yanaşırsınız. 2004-cü il iyulun 21-də Qusar şəhərində rayon sakinləri ilə görüşünüz zamanı dediyiniz sözlər hər bir qusarlının ürəyində silinməz iz buraxmışdır. Siz onda demişdiniz: "Mən Qusara xüsusi diqqət göstərəcəyəm. Çalışacağam ki, bu gözəl rayon daha da gözəlləşsin, abadlaşsın. Mən daim qusarlılarla olacağam və biz birlikdə böyük işlər görəcəyik".

Qusarlılar Sizin qayğınızı həmişə hiss edir, onun konkret nəticələrini görürlər. Son beş ildə rayonda həkim-ambulatoriya kompleksi, elektron avtomat telefon stansiyaları, gənclər evi inşa olunmuş və təkcə 2008-ci ildə mədəniyyət sarayı, mərkəzi kitabxana, tarix diyarşünaslıq muzeyi, N.Nərimanov adına mədəniyyət və istirahət parkı əsaslı təmir edilmişdir. Qusara son səfəriniz zamanı yeni xəstəxana binasının təməlinin qoyulması da rayon əhalisinin sağlamlığına göstərdiyiniz qayğının daha bir təzahürüdür. Dediklərim rəhbərliyiniz altında gördüyümüz işlərin yalnız bir hissəsidir.

Həqiqətən Sizin ölkə daxilində nüfuzunuz, apardığınız siyasət el arasında "insan simalı siyasət" adı almışdır. Çünki bu siyasətin əsasını insanlara qayğı təşkil edir. Sizin əhalinin sosial problemlərinin həllinə dair verdiyiniz tapşırıq və tövsiyələr hazırda respublikada elə bir sahə yoxdur ki, orada mövcud problemin həlli istiqamətində işlər görülməsin. Əhali ilə yerlərdə keçirdiyimiz görüşlər bu məsələlərdə bizə əvəzsiz kömək edir.

Sizin tapşırığınızla daim əhali arasında olur, müxtəlif sosial qrupların nümayəndələri ilə görüşür və bir sözlə, cəmiyyətin əhval-ruhiyyəsini həmişə hiss edirik. Ölkə rəhbərinin qayğısını hiss edən insanlarda qurmaq, yaratmaq əzmi durmadan artır. Ölkədə təhsil müəssisələrinin maddi-texniki təchizatına göstərilən dövlət qayğısı nəticəsində rayonda 2004-2008-ci illərdə 17 yeni məktəb binası inşa edilmiş, 8 məktəb binası əsaslı təmir olunmuşdur ki, bu işlərin əksəriyyətinin təşəbbüskarı və təşkilatçısı Heydər Əliyev Fondudur. Rayon əhalisi, ziyalılar, Sizə və Heydər Əliyev Fondunun prezidenti, Milli Məclisin deputatı Mehriban xanım Əliyevaya təhsilə, övladlarımızın gələcəyinə göstərdiyiniz qayğıya görə öz minnətdarlıqlarını bildirirlər.

Zati-aliləri, icazə verin, Sizi əmin edim ki, faktiki olaraq bu gün başlanğıcına start verilən növbəti beşillik Dövlət Proqramı müstəqil Azərbaycanın tarixinə inkişaf, intibah və çiçəklənmə proqramı kimi daxil olacaq və biz qusarlılar bu inkişafın önündə gedənlərin ilk sıralarında olacağıq.

Diqqətinizə görə minnətdaram.

Azərbaycan.-2009.-24 fevral.-S.4.