Mənzil hüququ Mənzil Məcəlləsi ilə tənzimlənəcəkdir

Fevralın 24-də Azərbaycan Respublikası Milli Məclisinin növbəti plenar iclası keçirildi. Deputatlar əvvəlcə Xocalı faciəsinin 17-ci ildönümü ilə əlaqədar olaraq soyqırımına məruz qalmış soydaşlarımızın xatirəsini sükutla yad etdilər. Xocalı faciəsinin insanlığa qarşı ən qanlı cinayətlərdən olduğunu deyən spiker Oqtay Əsədov bildirdi ki, Milli Məclisin qərarı ilə fevralın 26-sı Xocalı soyqırımı günü elan edilmişdir. Faciənin qurbanı olan soydaşlarımızın xatirəsi hər il ölkəmizdə və onun hüdudlarından kənarda anılır. Bu il də müxtəlif ölkələrdə Xocalı soyqırımı ilə bağlı tədbirlər keçiriləcək. Həmin tədbirlərdə Milli Məclisin deputatları da iştirak edəcəklər.

Sonra gündəlikdəki məsələlərin müzakirəsi başlandı. Əvvəlcə ötən həftə müzakirəsi yarımçıq qalmış Azərbaycan Respublikasının Mənzil Məcəlləsinin layihəsinin müzakirəsi davam etdirildi. 8 fəsil, 147 maddədən ibarət olan layihədə mənzil hüquqlarının əsasları, bu hüquqların qorunması, məhdudlaşdırılması, mənzil münasibətləri, bu sahədə dövlətin, bələdiyyələrin vəzifələri, mənzil fondu, yaşayış sahəsinin təyinatı və ondan istifadə etmək hüdudları, yaşayış sahəsindən istifadə, dövlət qeydiyyatı, yaşayış sahəsinin qeyri-yaşayış sahəsinə və qeyri-yaşayış sahəsinin yaşayış sahəsinə keçirilməsi şərtləri və qaydaları, qəza vəziyyətində olan mənzillərin yenidən qurulması və planlaşdırılması, yaşayış sahəsi mülkiyyətçilərinin hüquq və vəzifələri, dövlət ehtiyacları üçün torpaq alınarkən yaşayış sahəsi mülkiyyətçisinin mənzil hüquqlarının təmin edilməsi, kommunal mənzilin ümumi əmlakının saxlanması, xüsusi təyinatlı mənzil fondunun yaşayış sahələri və digər müddəalar əksini tapıb.

Deputatlardan Astan Şahverdiyev, Əhməd Vəliyev, Məlahət İbrahimqızı, Ərəstun Cavadov, İlyas İsmayılov, Nizami Xudiyev, Miri Qənbərov, Məjlum Şükürov, Səttar Mehbalıyev, Qüdrət Həsənquliyev, Xanhüseyn Kazımlı layihə ilə bağlı təkliflərini diqqətə çatdırdılar. Çıxışlarda qeyd olundu ki, müzakirə olunan məsələ xalqın marağını ifadə edir. Mənzil Məcəlləsinin qəbulu ölkədə vətəndaşların mənzil problemlərinin həllini asanlaşdıracaq, dövlətin, bələdiyyələrin və özəl sektorun bu sahədə hüquq və vəzifələrini müəyyənləşdirəcəkdir. Deputat İsa Həbibbəyli son illər Azərbaycanın dinamik inkişaf etdiyini bildirərək Mənzil Məcəlləsi layihəsində respublikamızda baş verən müsbət dəyişikliklərin əksini tapdığını dedi.

Deputat Gövhər Baxşəliyeva da layihə ilə bağlı bir sıra təkliflər səsləndirdi. Onun fikrincə, Mənzil Məcəlləsində gənc istedadlı kadrlara güzəştlərin tətbiq edilməsini nəzərdə tutan müddəa olmalıdır.

Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov layihə ilə bağlı səslənən təklif və iradlara münasibətini bildirdi. Qeyd etdi ki, bu sənədin ictimai müzakirəyə çıxarılmasına ehtiyac olacaq. O, Mənzil Məcəlləsinin bütün vətəndaşların marağında olduğunu vurğuladı.

Qanun layihəsi ikinci oxunuşda qəbul edildi.

Sonra deputatlar "Yol hərəkəti haqqında" Azərbaycan Respublikasının Qanununa əlavələr və dəyişikliklər edilməsi barədə" qanun layihəsini müzakirə etdilər. Layihə barədə məlumat verən Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov bildirdi ki, layihəyə əsasən yol hərəkəti nişanlarının sayı artırılır. Yeni nişanların sxemi də sənədin layihəsinə əlavə olunub. Layihənin bundan əvvəlki müzakirələrində işçi qrupu tərəfindən səsləndirilən rəy və təkliflər nəzər alınıb.

Müzakirələr zamanı deputat Siyavuş Novruzov qanuna əlavələrin və dəyişikliklərin edilməsinin vacib olduğunu bildirdi. Avropanın bir sıra ölkələrində elektron yol nişanlarının tətbiq olunduğunu deyən Siyavuş Novruzov bunun ölkəmizdə də həyata keçirilməsini təklif etdi.

Qanun layihəsi qəbul edildi.

Fasilədən sonra "Ölkədən getmək, ölkəyə gəlmək və pasportlar haqqında" Azərbaycan Respublikası Qanununun tətbiqi haqqında Əsasnamə"də, "Azərbaycan Respublikasında daimi yaşayan vətəndaşlığı olmayan şəxslərin və Azərbaycan Respublikasında 30 gündən artıq yaşamaq istəyən əcnəbilərin xüsusi sənədləri haqqında Əsasnamə"də və "Yaşayış yeri və olduğu yer üzrə qeydiyyat haqqında" Azərbaycan Respublikasının Qanununun tətbiqi haqqında Əsasnamə"də dəyişikliklər edilməsi barədə Azərbaycan Respublikası Qanununun layihəsi müzakirəyə çıxarıldı. Qanun layihəsi haqqında Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov məlumat verdi. Qeyd olundu ki, əlavə və dəyişikliklərin edilməsinin səbəbləri var.

Deputat Mübariz Qurbanlı qeyd etdi ki, Azərbaycan dünyaya sürətlə inteqrasiya edir. Bu səbəbdən də bir sıra qanunlara əlavə və düzəlişlər edilir, təkmilləşdirilir. Deputat Mübariz Qurbanlı bir sıra təkliflər irəli sürdü. Onun fikrincə, soyadların dəyişdirilməsi müsbət haldır. Ölkə vətəndaşlarının şəxsiyyət vəsiqələrində soyadlar deyil, adlar birinci yazılmalıdır. Bu məsələ də dünya standartlarına uyğunlaşdırılmalıdır. Şəxsiyyət vəsiqələrində soyadların yox, adların birinci yazılması məsələsi başqa ölkələrdə, o cümlədən Rusiyada da müzakirə olunmaqdadır. Eyni zamanda soyadların dəyişdirilməsi zərurəti yaranıb.

Müzakirələrin sonunda deputatlar "Ölkədən getmək, ölkəyə gəlmək və pasportlar haqqında" Azərbaycan Respublikası Qanununun tətbiqi haqqında Əsasnamə"də, "Azərbaycan Respublikasında daimi yaşayan vətəndaşlığı olmayan şəxslərin və Azərbaycan Respublikasında 30 gündən artıq yaşamaq istəyən əcnəbilərin xüsusi sənədləri haqqında Əsasnamə"də və "Yaşayış yeri və olduğu yer üzrə qeydiyyat haqqında" Azərbaycan Respublikasının Qanununun tətbiqi haqqında Əsasnamə"də dəyişikliklər edilməsi barədə Azərbaycan Respublikası Qanununun layihəsinə müsbət münasibət bildirdilər.

Daha sonra "Əmək Məcəlləsinə dəyişikliklər və əlavələr edilməsi haqqında" Azərbaycan Respublikası Qanununun layihəsi müzakirəyə çıxarıldı. Milli Məclisin Sosial siyasət daimi komissiyasının sədri Hadi Rəcəbli ölkəmizdə əmək münasibətlərinin daha da təkmilləşdirildiyini, respublikamızın demokratik yolla inkişaf etdiyini bildirərək son 10 ildə Azərbaycan vətəndaşlarının mənafeyinə xidmət edən Əmək Məcəlləsinə bir sıra əlavə və dəyişikliklərin edildiyini xatırlatdı. "Əmək Məcəlləsinə dəyişikliklər və əlavələr edilməsi haqqında" Azərbaycan Respublikası Qanununun layihəsi Əmək və Əhalinin Sosial Müdafiəsi Nazirliyi, Ailə, Qadın və Uşaq Problemləri üzrə Dövlət Komitəsi, Ədliyyə Nazirliyi və digər dövlət orqanları ilə birlikdə müzakirə edilib, hazırda qanunvericilikdəki boşluqlar öyrənilir. Komissiya sədri bildirdi ki, Milli Məclisin Sosial siyasət daimi komissiyası Hüquq siyasəti və dövlət quruculuğu daimi komissiyası ilə birlikdə "Əmək Məcəlləsinə dəyişikliklər və əlavələr edilməsi haqqında" Azərbaycan Respublkası Qanununun layihəsini hazırlayıb. Qanunun 44 maddəsinə əlavə və dəyişikliklər nəzərdə tutulub. Qanun layihəsi xüsusi əhəmiyyət kəsb edir.

Müzakirələr zamanı deputat Rafael Cəbrayılov bildirdi ki, Azərbaycan Respublikasının Əmək Məcəlləsinə nəzərdə tutulan dəyişikliklər məcəlləni hüquqi cəhətdən daha da təkmilləşdirəcəkdir. Komissiyaların birgə müzakirəsində səsləndirilən fikirlər qanun layihəsində əksini tapıb.

Daha sonra çıxış edən deputatlar - Ərəstun Cavadov, Əkrəm Abdullayev və Səttar Mehbalıyev son illər Əmək Məcəlləsinə təklif edilən əlavə və dəyişikliklərlə hüquqi bazanın yaradıldığını vurğuladılar və bir sıra təkliflər irəli sürdülər. Hazırkı dəyişiklik əvvəlkilərlə müqayisədə daha təkmil, səmərəlidir. Bu dəyişikliklər vətəndaşların əmək hüquqlarının qorunmasında növbəti uğurlu addım olacaqdır. 1999-cu ildə qəbul olunmuş Əmək Məcəlləsinin bəzi maddələrində boşluqlar vardı. Buna görə də ona bir sıra dəyişikliklərin edilməsi zəruridir. Qanun layihəsinin qəbul edilməsi işə götürənlə işçinin hüquqlarının daha da təkmilləşdirilməsinə, qorunmasına gətirib çıxaracaqdır.

Müzakirələrin sonunda deputatlar Azərbaycan Respublikasının Əmək Məcəlləsinə dəyişikliklər və əlavələr edilməsi haqqında Azərbaycan Respublikası Qanununun layihəsinə müsbət münasibət bildirdilər.

Azərbaycan.-2009.-25 fevral.-S.4.