Bu torpağın altı da qızıldır, üstü də...

Gədəbəydə ötən ilin yekunlarına həsr olunmuş toplantıda maraqlı bir fakt səsləndi - bir neçə aydan sonra dağlar qoynunda qızıl zavodunun istifadəyə verilməsi gözlənilir. Bu həmin obyektdir ki, əsası ümummilli lider Heydər Əliyev tərəfindən qoyulmuşdu. Ölkə başçısı İlham Əliyev isə Gədəbəyə səfəri zamanı Beynəlxalq Mədən Əməliyyatı şirkətində ərazini seyr etmiş, yatağın iş planı, filiz nümunələri ilə tanış olmuş, kollektivə uğurlar arzulamışdı. İldə 1,5 milyon ton qızıl filizi istehsal edə biləcək zavodun fəaliyyətə başlamasına az qalır. Bununla da Gədəbəyin quruculuq tarixinə yeni səhifələr yazılacaqdır.

Rayonda iqtisadiyyatın hər sahəsində uğurlu işlər gedir. Regionların sosial-iqtisadi inkişafı Dövlət Proqramının icrası ilə başlanan yüksəliş xətti getdikcə yeni vüsət alır. Keçən il 177,4 milyon manat ümumdaxili məhsul istehsal edilmişdir ki, bu da əvvəlki ildə olduğundan 16,7 faiz çoxdur. Rayon üzrə orta aylıq əmək haqqı son beş ildə beş dəfə artmışdır. Hesabat dövründə bitkiçilik, xüsusən kartofçuluq sahəsində və heyvandarlıq üzrə daha çox fərəhli işlər görülmüşdür.

İndi ilin yekunları təhlil olunur, yeni ilin vəzifələri və onun icrası yolları müəyyən edilir. Bu mühüm məsələyə həsr olunmuş rayon toplantısında RİH-in başçısı Kamran Rzazadənin geniş və ətraflı məruzəsi dinlənildi. Sonra ayrı-ayrı idarə və müəssisə rəhbərləri, müxtəlif peşə sahibləri çıxış etdilər. Yekdilliklə qeyd olundu ki, qazanılan hər bir nailiyyət Azərbaycanı inkişaf yoluna çıxartmış ümummilli liderimiz Heydər Əliyevin yolunu uğurla davam etdirən ölkə başçısı İlham Əliyevin inamla yeritdiyi dinamik yüksəliş siyasətinin bəhrəsidir.

Gədəbəy camaatı işgüzar, əməksevərdir. Dağlar qoynunda, necə deyərlər, daşdan da çörək çıxara bilirlər. Xüsusən maldarlıqda və kartofçuluqda illər boyu zəngin təcrübə qazanıblar. Amma Prezident İlham Əliyevin 2006-cı ildə rayona səfərindən sonra bu yerlərdə, sözün tam mənasında, yüksəlişin yeni mərhələsi başlandı.

İstər məruzədə və istərsə də natiqlərdən əmək veteranı İkram Məmmədovun, Novosaratovka kənd məktəbinin müəllimi Qalina Əliyevanın, Aqroservisin direktoru Novruz Mürsəlovun və başqalarının çıxışlarında kənd təsərrüfatının inkişafına dövlətin dəstəyindən minnətdarlıqla danışıldı. Gədəbəyin torpaq sahibkarları bu qayğı və diqqətdən müntəzəm surətdə bəhrələnirlər. Məhsul istehsalçılarına hər sahədə kömək göstərilir. Prezidentin kənd təsərrüfatı məhsullarının istehsalçılarına dövlət dəstəyi haqqında 23 yanvar 2007-ci il tarixli sərəncamı və 2008-2015-ci illərdə əhalinin ərzaq məhsulları ilə etibarlı təminatına dair Dövlət Proqramı müasir kəndi dirçəldib ayağa qaldırır. Hər il torpaq sahibkarlarına 50 faiz güzəştlə gübrə, yanacaq və mator yağı verilir. Təkcə bu hesaba gədəbəylilər il ərzində 100 min manatdan çox yardım alıblar.

Elə bu qayğı və köməyin nəticəsidir ki, rayonda ötən il məhsul istehsalı xeyli artıb. Sahələrdən 200 min ton kartof yığılıb ki, bu da əvvəlki illərdəkinə nisbətən xeyli çoxdur. Bununla yanaşı toplantı iştirakçıları gileyləndilər ki, min zəhmət bahasına yetişdirilən məhsulun xeyli hissəsi yığılıb evlərdə qalır. Torpaq sahibkarları ikinci çörək sayılan kartofun tədarükü və satışı ilə əlaqədar respublika səviyyəsində müəyyən tədbirlərin görülməsinin vacibliyini deyirlər.

Yığıncaqda belə bir haqlı irad da səsləndi. Gədəbəy ən böyük qoyunçuluq rayonlarından sayılır. Bu yerlər məşhur dağ merinosunun vətənidir. Ənənə davam edir. Mal-qaranın sayı ilbəil artır. Hazırda dağlar qoynunda 80,6 min baş qaramal və 344 min baş qoyun-quzu bəslənilir. Təkcə Dəyəqaramurad kəndində mal-qaranın sayı 10 min başa çatır ki, bu da sovet dövründə bütövlükdə rayon üzrə olduğundan çoxdur. Qoyun-quzu əsasən Ceyrançöldə qışlayır. Amma uzun illər Gədəbəy rayonunun istifadəsində olan Ceyrançölün qış otlaq sahəsi 2006-cı ildə Tovuz rayonuna verilmişdir. Gədəbəylilər bu uyğunsuzluğun aradan qaldırılmasını istəyirlər.

İqtisadiyyatın yüksəlişinə təkan verən amillərdən biri də özəl sektorun sürətli inkişafı ilə bağlıdır. Sahibkarlara münbit şərait yaradıldıqca onların fəaliyyət dairəsi genişlənir, məhsul istehsalı artır, gəlir, qazanc çoxalır. Təkcə son bir neçə il ərzində 182 sosial obyekt istifadəyə verilmişdir. Özəl sektorda sənaye məhsulunun istehsalı da getdikcə artır. Nəticədə büdcəyə daxilolmaların həcmi çoxalır. Keçən il yerli mənbələrdən büdcəyə 2 milyon manat vəsaitin gəlməsi gözlənilirdisə, ilin sonunda bu rəqəm təqribən 3 milyona çatdı. Başqa sözlə, nəzərdə tutulduğundan təqribən 1 milyon manat çox vəsait yığıldı.

Gəlir, qazanc artdıqca, quruculuq, abadlıq işlərinin miqyası da genişlənir. Dövlətin vəsaiti hesabına tikilən obyektlər bir yana, sahibkarlar da bu quruculuq işlərində fəal iştirak edirlər. Ayrı-ayrı iş adamları tərəfindən rayon mərkəzi ilə 15 kəndi birləşdirən Kiçik Qaramurad çayı üzərində 60 metr uzunluğunda körpü tikilmiş, Ağamalı və Qoşabulaq kəndlərindəki körpülər əsaslı təmir edilmiş, Slavyanka-Qoşabulaq yolunda cari təmir işləri aparılmışdır.

2008-ci il ümumən rayon üzrə abadlıq və quruculuğun yeni mərhələsi kimi əlamətdar olmuşdur. Ölkə başçısı İlham Əliyevin tövsiyəsi ilə Şəmkir-Gədəbəy yolunun yenidən qurulması demək olar ki, başa çatdırılıb. Küçələrə, yollara asfalt döşənib, sərhəd bölgəsindəki kəndlərə təbii qaz xətti çəkilib, bir sıra ictimai binalar və sosial obyektlər istifadəyə verilib. Xüsusən təhsil, səhiyyə, mədəniyyət ocaqları yenidən qurulur. Son illər 23 yeni məktəb binası tikilib, 24 bina əsaslı təmir olunub, 32 məktəbdə əlavə sinif otaqları istifadəyə verilib.

Eyni zamanda, akademik Zərifə Əliyeva adına Mərkəzi Rayon Xəstəxanasında genişləndirmə işləri aparılıb, Rüstəm Əliyev kənd xəstəxanası müasir avadanlıqla təchiz olunub, Qoşabulaq, Slavyanka, Düz Rəsullu, Novosaratovka kənd sahə xəstəxanaları əsaslı təmir edilib. Mədəniyyət obyektlərinin maddi-texniki bazasının möhkəmləndirilməsi üçün də müəyyən işlər görülüb. Qaraməmmədli və Zəhmət kənd mədəniyyət evləri bərpa olunub, musiqi məktəbləri və kitabxanalar üçün yeni avadanlıqlar alınıb. Həmçinin müasir üslubda yenidən qurulmuş mərkəzi şəhər stadionu və Novosaratovka kəndindəki mini-futbol meydançası gənclərin ixtiyarına verilib.

Yerlərdə telekommunikasiya və rabitə obyektlərinin inşası sahəsində də xeyli işlər görülüb. Rüstəm Əliyev, Slavyanka, Ağamalı, Nərimankənd, Samanlıq, Qoşabulaq kəndlərində və başqa yerlərdə elektron avtomat telefon stansiyaları quraşdırılıb. Cari ildə isə daha 9 kənddə müasir tipli elektron ATS-in inşası nəzərdə tutulub.

Son vaxtlar Gədəbəydə inzibati binaların inşasına diqqət xeyli artırılıb. Dövlət Sosial Müdafiə Fondu rayon şöbəsi üçün müasir quruluşlu inzibati bina tikilib. Maliyyə idarəsi və prokurorluq üçün yeni binalar isə inşa edilir. Bununla yanaşı, Qarabağ əlilləri və şəhid ailələri üçün 16 mənzilli yaşayış binasının inşasına başlanılıb. Bir sözlə, rayonda abadlıq və quruculuq işləri davam edir.

Tənqid və özünütənqid şəraitində keçən toplantıda vətəndaşların ərizə və şikayətinə, arzu və təkliflərinə baxılması vəziyyəti də ətraflı təhlil edildi. Bu sahədə sistemli surətdə müəyyən işlərin görülməsinə baxmayaraq, ayrı-ayrı qəsəbə və kəndlərdən respublika təşkilatlarına xeyli müraciət daxil olur. Qeyd edildi ki, ərizə və şikayətlərin əksəriyyəti torpaq məsələləri, təbii fəlakət nəticəsində dəymiş ziyanla əlaqədar yardım tələbi, məhkəmə qətnamələrinin icra olunmaması, mənzil məsələsi, ünvanlı sosial yardım, əmək haqqı və iş tələbi, enerji, qaz və su təchizatı və s. ilə bağlıdır. Toplantıda əhalinin həyat şəraiti ilə bağlı olan bu mühüm məsələlərə diqqətin daha da artırılmasının və hər bir müraciətə qayğı ilə yanaşılmasının vacibliyi xüsusi vurğulandı.

Toplantının sonunda ölkə başçısı İlham Əliyevə müraciət qəbul olundu.

Azərbaycan.-2009.-25 fevral.-S.10.