"Bizim uşaq dünyamız"

Nizami rayon Uşaq-Gənclər Yaradıcılıq Mərkəzi 1974-cü ildən fəaliyyət göstərir. İki minə yaxın uşaq, yeniyetmə və gənc mərkəzdə 29 adda müxtəlif dərnəklərdə öz asudə vaxtlarını səmərəli və faydalı keçirirlər.

Yaradıcılıq mərkəzinin başlıca vəzifəsi gənc nəsli respublikamızın layiqli vətəndaşı kimi müstəqil həyata hazırlamaqdır. Burada uşaqların dünyagörüşünün formalaşdırılması, məlumat dairəsinin genişləndirilməsi, asudə vaxtlarının səmərəli və maraqlı təşkili, istedad və qabiliyyətlərinin üzə çıxarılması məqsədilə müxtəlif mədəni-kütləvi tədbirlər həyata keçirilir. Mərkəz 35 illik fəaliyyəti ərzində rayon, şəhər, respublika, hətta beynəlxalq səviyyəli tədbirlərdə iştirak etmiş, çox böyük nailiyyətlər qazanmışdır.

...Meydan uşaqların ixtiyarına verildi. Dörd hissədən ibarət "Biz ulu öndərin nəvələriyik", "Qış nağılı", "Doğma yurdum - Qarabağım", "Bizim uşaq dünyamız" adlı bir-birindən maraqlı səhnəciklər göstərildi.

Tədbirdə "Azəri inciləri" mahnı və rəqs kollektivinin üzvləri - oğlanlar və qızlardan ibarət milli rəqs, bal rəqsləri qrupu, mahnı teatrı, vokal qrupu, uşaq teatr qrupu və gimnastlar qrupu, xalq çalğı alətləri ansamblı, nağaraçalanlar və sazçalanlar qrupu rəngarəng çıxışları ilə tamaşaçıları heyran etdilər.

Sonda mərkəzin nailiyyətləri sadalandı, həmçinin beynəlxalq miqyaslı tədbirlərin qalibləri mükafatlandırıldı.

Tədbirdə Heydər Əliyev Fondunun, Milli Məclisin, Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin, Bakı şəhəri Təhsil İdarəsinin, Nizami Rayon İcra Hakimiyyətinin, Ukrayna və Türkiyə səfirliklərinin nümayəndələri iştirak edirdilər.

Zəkurə Quliyeva

Azərbaycan.-2009.-25 fevral.-S.12.