Türkiyə Böyük Millət Məclisində Xocalı soyqırımı ilə bağlı dinləmələr keçirilmişdir

Fevralın 25-də Türkiyə Böyük Millət Məclisində (TBMM) Xocalı soyqırımı ilə bağlı dinləmələr keçirilmişdir.

TBMM-nin sədr müavini Eyyub Gülpinarın sədrliyi ilə keçirilən geniş iclasda Türkiyə-Azərbaycan Parlamentlərarası Dostluq Qrupunun sədri Mustafa Kabakçı əvvəlcə türk dünyasının böyük şairi Bəxtiyar Vahabzadəyə Allahdan rəhmət diləmişdir.

Mustafa Kabakçı çıxışına erməni jurnalistinin "Xaç naminə" kitabından sitatla başladı. Kitabda bildirilir ki, "Kaplan" adlanan və cəsədlərin yandırılması ilə məşğul olan erməni qrupu martın 2-də 100 azərbaycanlının meyitini Xocalının 1 kilometr qərbində bir yerə gətirdi. Sonuncu yük maşınında 10 yaşlı bir qız uşağı gördüm. Başından və əlindən yaralı idi, üzü göyərmişdi. Soyuğa, aclığa və yaralarına rəğmən hələ sağ idi. Gözlərini ölüm qorxusu sarmışdı. Elə bu zaman, Tiqranyan familiyalı bir əsgər onu cəsəd qalağının üzərinə atdı. Sonra bütün cəsədləri yandırdılar. Sanki yanan cəsədlər arasından bir fəryad eşitdim. Əlimdən bir şey gəlmirdi və mən Şuşaya qayıtdım. Onlar isə xaç naminə müharibəyə davam etdilər".

Bu qorxunc vəhşətin hətta erməni jurnalistində də vicdan əzabı doğurduğunu qeyd edən Mustafa Kabakçı faciənin qurbanlarına Allahdan rəhmət dilədi və 17 il keçməsinə baxmayaraq, onların yaxınlarına dərin hüznlə başsağlığı verdi.

Mustafa Kabakçı əlavə etmişdir ki, Türkiyənin parlamentariləri Xocalı soyqırımının dünya parlamentlərində gündəmə gəlməsini və Ermənistanın işğal altında olan Azərbaycan torpaqlarından çəkilməsini, 1 milyona yaxın qaçqın və məcburi köçkünün doğma yurd-yuvalarına qayıtmasını daim izləyəcəklər.

İzmirdən olan millət vəkili Şenol Bal çıxışında bildirmişdir ki, Xocalı soyqırımı türk dünyası və Azərbaycan üçün ən faciəli qətliam olmaqla yanaşı, insanlıq tarixində qara bir ləkədir. Bildirdi ki, beynəlxalq insan haqları təşkilatlarının hesabatlarına görə, Xocalıda şəhid olan mülki insanların sayı 613 nəfərdir. 487 nəfər ağır yaralanmış, 1275 nəfər isə əsir alınmışdır. Təxminən 150 nəfər hələ də itkin düşmüş sayılır. Aparılan araşdırmalar nəticəsində bir çox cəsədin yandırıldığı, hamilə qadınların qarınlarının yarıldığı, qətlə yetirilən insanların gözlərinin çıxarıldığı, cəsədlərin tanınmaz hala salındığı müəyyən olunmuşdur. Əslində, ermənilərin xarici havadarlarının yardımı ilə Azərbaycan xalqına qarşı törətdikləri qətliamlar 200 ildir davam edir. 1915-ci, 1918-ci və 1920-ci illərdə yüz minlərlə azərbaycanlı qətlə yetirilmiş və yaxud doğma torpaqlarından didərgin salınmışdır. Bugünkü Ermənistan sərhədləri daxilindəki torpaqlardan ən az 250 min azərbaycanlı yurd-yuvalarını tərk etmişdir. İndi də Ermənistan tez-tez atəşkəs rejimini pozur, beynəlxalq hüquq normalarına məhəl qoymayaraq işğalçı siyasətini davam etdirir.

Xanım Şenol Bal daha sonra demişdir ki, Türkiyə Fələstin və Qəzzədəki qətliamlara qarşı öz qəti mövqeyini bildirmişdir. Ancaq bu qətiyyətin daha güclüsünü Azərbaycan türklərinə ermənilərin apardıqları soyqırımına qarşı da göstərilməsini arzu edirəm. Türkiyə-Ermənistan əlaqələrinin normallaşması və sərhədlərin açılması üçün 3 şərt yerinə yetirilməlidir. Ermənistan Türkiyənin ərazi bütövlüyü və sərhədlərini tanıdığını dünya ictimaiyyəti qarşısında bəyan etməli, "soyqırımı" iddialarına son qoymalı və BMT qətnamələrinə uyğun olaraq, işğal etdiyi Azərbaycan torpaqlarından qeyd-şərtsiz çəkilməlidir.

Daha sonra söz alan millət vəkili Rəşat Doğru demişdir ki, Xocalı soyqırımı qurbanlarının xatirəsini anma günü ərəfəsində TBMM-ə bir qanun layihəsi barədə təklif təqdim etmişdir. Məqsəd Türkiyədə soyqırımı qurbanlarının xatirəsini anma gününün elan olunmasıdır. Mən, bu qanun layihəsinin müzakirə olunmasını və nəticədə Xocalı qətliamı qurbanlarının xatirəsini anma gününün rəsmi şəkildə elan olunmasını istəyirəm. Qardaş Azərbaycan xalqı bununla bağlı Türkiyədən bir addım gözləyir və bu istəklər mənim Azərbaycan televiziya kanallarına dəvətlərim zamanı tez-tez vurğulanmaqdadır.

Azərbaycan.-2009.-26 fevral.-S.1.