Baş Prokurorluqda geniş əməliyyat müşavirəsi keçirilmişdir

İyunun 30-da Baş Prokurorluqda Respublika Hərbi Prokurorluğu və Bakı Şəhər Prokurorluğunun rəhbər heyətinin iştirakı ilə "Dövlət və bələdiyyə əmlakının və vəsaitlərinin idarə olunması sahəsində korrupsiya ilə əlaqədar hüquqpozmalara qarşı mübarizənin gücləndirilməsi haqqında" Azərbaycan Respublikası Prezidentinin 2009-cu il 22 iyun tarixli Fərmanının icrası ilə bağlı prokurorluq orqanları qarşısında duran vəzifələrin müzakirəsinə həsr olunmuş geniş əməliyyat müşavirəsi keçirilmişdir.

Əməliyyat müşavirəsində məruzə ilə çıxış edən baş prokuror Zakir Qaralov, ilk növbədə, son illər Azərbaycan Respublikasının Prezidenti İlham Əliyevin rəhbərliyi altında korrupsiya cinayətlərinə qarşı mübarizə sahəsində beynəlxalq standartlara uyğun səviyyədə həyata keçirilmiş tədbirlər barədə məlumat vermiş, bu sahədə əsas hüquqi baza olan "Korrupsiyaya qarşı mübarizə haqqında" Qanunun qəbulunu, 2004-2006-cı illər üçün korrupsiyaya qarşı mübarizə üzrə Dövlət Proqramının davamı olaraq "Şəffaflığın artırılması və korrupsiyaya qarşı mübarizə üzrə Milli Strategiya və onun həyata keçirilməsi üzrə 2007-2011-ci illər üçün Fəaliyyət Planı"nın təsdiq edilməsini yüksək dəyərləndirmişdir.

Diqqətə çatdırılmışdır ki, həmin fərmanın qəbulu ilə dövlətin büdcə və digər maliyyə vəsaitlərinin, bələdiyyələrin vəsaitlərinin istifadə olunması, dövlət və bələdiyyə əmlakına sahiblik, istifadə və sərəncam verilməsi, dövlət müəssisələrinin idarə olunması sahələrində istifadə, tənzimləmə və nəzarət funksiyalarının yerinə yetirilməsinə cavabdeh olan vəzifəli şəxslərin fəaliyyətində şəffaflığın təmin edilməsi, qanun pozuntularına qarşı mübarizənin gücləndirilməsi, qeyd olunan sahələrdə hüquqpozmalar barədə müraciətlərdə göstərilən halların obyektiv yoxlanılmasının təmin edilməsi ilə əlaqədar konkret tədbirlər nəzərdə tutulmuş, digər mərkəzi dövlət və icra strukturları ilə yanaşı, prokurorluq orqanlarının qarşısında mühüm vəzifələr qoyulmuşdur.

Baş prokuror bildirmişdir ki, fərmanın imzalanması, prokurorluq orqanlarına dövlət səviyyəsində göstərilən böyük etimadın təzahürü kimi dəyərləndirilməli, cinayətkarlığa, o cümlədən ümumbəşəri sosial bəla olan korrupsiya cinayətlərinə qarşı mübarizənin gücləndirilməsi sahəsində prokurorluğun rolunun müsbət qiymətləndirilməsi kimi qəbul edilməlidir.

Prokurorluğun üzərinə böyük məsuliyyət qoyulduğu xüsusi vurğulanmaqla qeyd edilmişdir ki, prokurorluq orqanları, ilk növbədə, dövlətimizin başçısının siyasi iradəsinə müvafiq olaraq, dövlət və bələdiyyə əmlakının və vəsaitlərinin idarə olunması sahəsində korrupsiya hüquqpozmalarına qarşı zəruri tələblər səviyyəsində kəsərli mübarizə aparılmasını təmin etməli, qeyd olunan sahələrdə hüquqpozmalar barədə daxil olan hər bir müraciət və yoxlama materialları üzrə hərtərəfli, obyektiv və tam araşdırmalar həyata keçirilməklə qanun pozuntularına qarşı mübarizənin gücləndirilməsinə nail olmalıdır.

Eyni zamanda, bildirilmişdir ki, prokurorluğun yoxlamaların təşkili və keçirilməsinə məsul olan müvafiq qurumları və əməkdaşları tərəfindən yol verilə biləcək qanunsuzluqları istisna edən şərait formalaşdırılmalı, elə bir nəzarət mexanizmi yaradılmalıdır ki, prokurorluq əməkdaşları tərəfindən sui-istifadə hallarına və qanunsuz hərəkətlərə yol verilməsinin qarşısı dərhal alınsın, insan hüquq və azadlıqlarının hərtərəfli qorunması, yoxlamaların təşkili və keçirilməsinin bütün mərhələlərində şəffaflıq təmin olunsun.

Baş prokurorun birinci müavini Rüstəm Usubov müşavirədə çıxış edərək məlum fərmanın icrası ilə əlaqədar prokurorluq orqanlarının konkret vəzifələrini, həmin vəzifələrin icra mexanizmlərini, daxil olan müraciətlərin və keçirilən yoxlamaların dəqiq uçotunun aparılması, reyestrə daxil olan məlumatların mütəmadi surətdə ümumiləşdirilməsi qaydalarını müəyyənləşdirən əmr layihəsi barədə tədbir iştirakçılarına ətraflı məlumat vermişdir. Tədbirdə digər natiqlər də fərmanın icrası istiqamətində görüləcək zəruri işlər barədə məlumat vermiş və müzakirə olunan məsələ ətrafında fikir mübadiləsi aparmışlar.

Əməliyyat müşavirəsinə yekun vuran baş prokuror Zakir Qaralov qarşıda duran vəzifələri bir daha dəqiqləşdirməklə gündəlikdə duran məsələ ilə əlaqədar ilk növbədə, ciddi nəzarət mexanizminin yaradılması, prokurorluğa daxil olan vətəndaş müraciətlərinin mərkəzləşdirilmiş qeydiyyatının və keçirilən yoxlamaların vahid uçotunun - müvafiq reyestrin aparılması, fiziki və hüquqi şəxslərin qanuni hüquq və mənafelərinin hərtərəfli qorunması, digər dövlət orqanları ilə məlumat mübadiləsinin və qarşılıqlı əlaqəli fəaliyyətin təmin olunması, sahibkarlıq subyektlərinin fəaliyyətinə qanunsuz müdaxilələrin qadağan edilməsi barədə tələblərə qeyd-şərtsiz əməl edilməsi, fərmanın mahiyyətinin prokurorluq orqanlarında ətraflı öyrənilməsi və ictimaiyyət arasında izahının aparılması sahəsində görüləsi işlərlə əlaqədar konkret tapşırıqlar vermişdir.

AzərTAc

Azərbaycan.- 2009.- 1 iyul.- S. 5.