"Təhsil haqqında" qanun beynəlxalq təşkilatlar tərəfindən yüksək qiymətləndirilir

İyulun 1-də Milli Məclisin Elm və təhsil komitəsinin iclası keçirilmişdir. Komitənin sədri Şəmsəddin Hacıyev gündəlikdə olan məsələlər barədə məlumat verdikdən sonra 2009-cu ilin yaz sessiyası ərzində görülən işlərə münasibət bildirildi. Şəmsəddin Hacıyev dedi ki, bu müddətdə komitənin ən böyük uğuru 15 il idi müzakirə olunan "Təhsil haqqında" qanunun qəbuludur.

Qanunun qəbulu zamanı müzakirələrdə iştirak edən 110 deputatın 107-si onun lehinə səs vermişdir. Azərbaycan cəmiyyətində bu qanuna yüksək şəkildə müsbət reaksiya var. Dünyanın qabaqcıl təhsil standartları və milli dəyərlərimizin prioritetliyi əsasında hazırlanan bu qanun Azərbaycan təhsilindəki bütün boşluqları aradan qaldıracaq. Komitə sədri onu da bildirdi ki, İSESKO-nun təhsil komitəsi və Dünya Bankı bu qanunu yüksək qiymətləndiriblər.

Komitə sədrinin müavini Bəxtiyar Əliyev, komitə üzvlərindən Əli Əhmədov, Abel Məhərrəmov, Gövhər Baxşəliyeva, Ağacan Abıyev və Nizami Xudiyev də komitənin 2009-cu ilin yaz sessiyasındakı fəaliyyətini yüksək qiymətləndirdilər. "Təhsil haqqında" qanunun Azərbaycanda təhsilin inkişafına mühüm töhfələr verəcəyini bildirdilər. Deputatlar bu qanunun yüksək səviyyədə hazırlanmasında ölkə başçısı cənab İlham Əliyevin təhsilə diqqət və qayğısının mühüm rol oynadığını xüsusi qeyd etdilər.

İclasda Elm və təhsil komitəsinin 2009-cu il payız sessiyası üçün iş planı da müzakirə olundu. Şəmsəddin Hacıyev iş planına 4 qanun layihəsinin salındığını dedi. Bunlar "Elm və dövlət elmi-texniki siyasəti haqqında", "Ali təhsil haqqında", "Ümumi orta təhsil haqqında" və "Yaşlıların təhsili haqqında" qanun layihələridir. Komitə üzvləri iş planını təsdiq etdilər.

Sonda "Elm və dövlət elmi-texniki siyasəti haqqında" qanun layihəsi işçi qrup tərəfindən müzakirə edildi.

Azərbaycan.- 2009.- 2 iyul.- S. 4.