Azərbaycan-Yunanıstan əlaqələri sürətlə inkişaf edir

İyulun 2-də Milli Məclisin Sədri Oqtay Əsədov ATƏT-in fəaliyyətdə olan sədri, Yunanıstan Respublikasının xarici işlər naziri Dora Bakoyanninin rəhbərlik etdiyi nümayəndə heyəti ilə görüşmüşdür. Səmimi keçən görüşdə Milli Məclisin Sədri Oqtay Əsədov qeyd etmişdir ki, Azərbaycanla Yunanıstan arasındakı əlaqələr yüksələn xətlə inkişaf edir. İki ölkənin dövlət başçılarının qarşılıqlı səfərləri əlaqələrin inkişafına yaxşı zəmin yaratmışdır. Azərbaycan Prezidenti İlham Əliyevin bu ilin fevralında Yunanıstana dövlət səfəri ikitərəfli əlaqələrə böyük töhfələr vermişdir.

Azərbaycanın xarici siyasətində prioritet məsələlərdən birinin Avratlantik məkana inteqrasiya olduğunu bildirən spiker Oqtay Əsədov Yunanıstanın ölkəmizə bu məsələdə verdiyi dəstəyi də yüksək qiymətləndirdi. Ölkəmizlə Yunanıstan arasında parlamentlərarası əlaqələrdən razılığını bildirdi. Dedi ki, hər iki ölkənin parlamentində yaradılmış dostluq qruplarının uğurlu fəaliyyəti dövlətlərimiz arasındakı əlaqələrin inkişafına layiqli töhfələr verir.

Söhbət zamanı iqtisadi əlaqələrə də toxunuldu. Daha sonra spiker Oqtay Əsədov dedi: ATƏT-in Minsk qrupu 15 ildir ki, Ermənistan-Azərbaycan, Dağlıq Qarabağ münaqişəsinin həlli istiqamətində iş aparır. Problemin yoluna qoyulması ilə bağlı irəliləyişlər sizin ATƏT-ə sədrlik etdiyiniz indiki dövrdə müşahidə edilməkdədir. İnanırıq ki, bundan sonra da Ermənistan-Azərbaycan, Dağlıq Qarabağ münaqişəsinin yoluna qoyulması ilə bağlı səylərinizi əsirgəməyəcəksiniz.

Dora Bakoyanni də Azərbaycanla Yunanıstan arasındakı əlaqələrin hazırkı səviyyəsindən razılığını bildirdi. O da Azərbaycan Prezidenti İlham Əliyevin bu ilin fevralında Yunanıstana dövlət səfərinin əhəmiyyətindən söz açdı. Ermənistan-Azərbaycan, Dağlıq Qarabağ probleminin yoluna qoyulması istiqamətində səylərini bundan sonra da əsirgəməyəcəyini diqqətə çatdırdı.

Görüşdə qarşılıqlı maraq doğuran digər məsələlər barədə də fikir mübadiləsi aparıldı.

Azərbaycan.- 2009.- 3 iyul.- S. 4.