Hökumətlərarası müştərək komissiyanın dördüncü iclası keçirilir

İyulun 2-də Bakıda Azərbaycan Hökuməti və Rumıniya Hökuməti arasında ticarət-iqtisadi əlaqələr və elmi-texniki əməkdaşlıq üzrə Müştərək Komissiyanın 4-cü iclası işə başlamışdır.

Komissiyanın Azərbaycan tərəfindən həmsədri, Baş nazirin birinci müavini Yaqub Eyyubov iclası açaraq demişdir ki, ölkələrimiz arasında dostluq, strateji tərəfdaşlıq münasibətləri yüksələn xətlə inkişaf edir.

Rumıniya-Azərbaycan əlaqələrinin qədim tarixini, Rumıniyanın respublikamızın dövlət müstəqilliyini tanıyan ilk ölkələrdən biri olduğunu, xalqımızın ən ağrılı problemi olan Dağlıq Qarabağ münaqişəsinin həllində həmişə ədalətli, obyektiv mövqe tutduğunu xatırladan Y.Eyyubov bildirmişdir ki, Azərbaycan Prezidenti İlham Əliyevin Rumıniyaya səfərindən sonra qarşılıqlı əlaqələr daha da genişlənmişdir.

Komissiyanın həmsədri son illərdə Azərbaycan iqtisadiyyatının sürətlə inkişaf etdiyini bildirmiş, ölkəmizdə həyata keçirilən irimiqyaslı layihələrdən danışmışdır. Y.Eyyubov Rumıniyanın Şərqi Avropada ölkəmizin etibarlı tərəfdaşı olduğunu, əlaqələrin genişlənməsi üçün potensial imkanların olduğunu, müştərək komissiyanın ötən illər ərzində xeyli iş gördüyünü, müzakirə və təsdiq üçün mühüm sənədlər hazırladığını vurğulamışdır.

Baş nazirin birinci müavini qeyd etmişdir ki, bu gün dünyada mövcud olan iqtisadi böhran Azərbaycana təsirsiz ötüşmüşdür.

Komissiyanın Rumıniya tərəfdən həmsədri, iqtisadiyyat naziri Adriyan Vidyanu ölkəsinin sabit inkişaf sürətinə görə Şərqi Avropada irəlidə getdiyini, rumın xalqının və dövlətinin Azərbaycanı özünə mehriban dost, etibarlı tərəfdaş hesab etdiyini bildirmişdir.

Ticarət-iqtisadi sahədə əlaqələrin inkişafı üçün çox əlverişli imkanların olduğunu, rumın iş adamlarının Azərbaycana marağının getdikcə artdığını vurğulayan nazir nəqliyyat, energetika, sənaye, kənd təsərrüfatı məhsullarının idxalı, mədəniyyət, turizm sahələrində qarşılıqlı əməkdaşlığın genişlənməsinin hər iki tərəf üçün əhəmiyyətli ola biləcəyini demişdir.

İclasda hər iki tərəfdən komissiya üzvlərinin müzakirə edilən məsələlərə dair təklifləri səslənmiş, iqtisadi-ticarət əlaqələrinin genişləndirilməsi, birgə müəssisələrin yaradılması və digər məsələlər müzakirə olunmuşdur.

İyulun 3-də iclasın yekunlarına dair protokol imzalanacaqdır.

AzərTAc

Azərbaycan.- 2009.- 3 iyul.- S. 4.