Azərbaycan təhlükəsizlik və inkişaf baxımından Cənubi Qafqazda mühüm rol oynayır

Təhlükəsizlik və dayanıqlı inkişaf bütün Avropa ölkələrinin maraq dairəsindədir.

Azərbaycan təhlükəsizlik və inkişaf baxımından Cənubi Qafqazda mühüm rol oynayır. Biz bu və digər sahələrdə Azərbaycanla əməkdaşlığa xüsusi önəm veririk.

Bu sözləri Azərbaycanda səfərdə olan ATƏT-in fəaliyyətdə olan sədri, Yunanıstanın xarici işlər naziri xanım Dora Bakoyanni iyulun 2-də Azərbaycanın Xarici İşlər Nazirliyində keçirdiyi mətbuat konfransında demişdir.

Azərbaycanın xarici işlər naziri Elmar Məmmədyarov yunanıstanlı həmkarı ilə ikitərəfli əməkdaşlıq, təhlükəsizlik, enerji layihələrinin gerçəkləşdirilməsi və Ermənistan-Azərbaycan, Dağlıq Qarabağ münaqişəsinin həlli ilə bağlı konstruktiv danışıqlar apardığını bildirmişdir. Nazir demişdir ki, Azərbaycan Prezidenti İlham Əliyevin bu ilin əvvəlində Afinaya səfərindən sonra münasibətlərimiz yeni müstəvidə inkişaf etməyə başlamışdır.

E.Məmmədyarov onu da bildirmişdir ki, Azərbaycan təbii qazının Yunanıstana satışının həcminin artırılması istiqamətində danışıqlar davam edir.

Xanım Dora Bakoyanni bu günlərdə Yunanıstanda Avropada təhlükəsizlik məsələlərinin müzakirə olunduğunu, cari ilin sonunda Afinada bu məsələyə daha geniş formatda baxılacağını bildirmişdir. Yunanıstanlı nazir Azərbaycanın təhlükəsizlik, enerji layihələrinin reallaşdırılmasında və digər məsələlərdə rolunu xüsusi qeyd etmişdir.

Azərbaycan Prezidenti İlham Əliyevin Yunanıstana səfərindən sonra ölkələrimiz arasında əlaqələrin daha da genişləndiyini, əməkdaşlığımızın bütün sahələri əhatə etməsi üçün geniş imkanlar yarandığını bildirmişdir.

Sonda nazirlər jurnalistləri maraqlandıran sualları cavablandırmışlar.

Azərbaycan.- 2009.- 3 iyul.- S. 4.