Rusiyanın Azərbaycandakı səfirliyində mətbuat konfransı keçirilmişdir

Rusiyanın Azərbaycandakı səfirliyində RF Prezidenti Dmitri Medvedevin ölkəmizə səfərinin yekunlarına həsr olunmuş mətbuat konfransı keçirilmişdir.

Səfir Vladimir Doroxin bildirmişdir ki, Azərbaycan Prezidenti İlham Əliyev ilə Rusiya Prezidenti Dmitri Medvedevin budəfəki görüşü 2009-cu ildə sayca üçüncü görüş olmuşdur. Diplomatın fikrincə, görüşlərin intensivliyi faktının özü münasibətlərimizin xarakterini əks etdirir və iki ölkənin daha da yaxınlaşmasına kömək göstərir.

Bir sıra məsələlərə dair prinsipial razılaşmanın əldə edilməsini görüşün başlıca yekunu adlandırmaq olar. Bu sırada ilk növbədə Azərbaycan Respublikası Prezidentinin və Rusiya Federasiyası Prezidentinin Xəzər dənizi üzrə birgə Bəyannaməsini və dövlət sərhədlərinin delimitasiyasının başa çatdırılmasının əsas prinsipləri və Samur çayının su ehtiyatlarının Azərbaycan Respublikası və Rusiya Federasiyası arasında bölüşdürülməsi barədə birgə Bəyannaməni qeyd etmək olar.

V.Doroxin həmin məsələdə kompromis parametrlərinin və Azərbaycanın mövqeyinin mühüm olduğunu bildirmişdir. Bütün beynəlxalq normalara cavab verən Samur su qovşağının tikintisinə dair Azərbaycanın təklifi qəbul edilmişdir.

Səfir qeyd etmişdir ki, "Azərbaycan təbii qazının alqı-satqısı üzrə müqavilənin əsas şərtləri" barədə imzalanmış sənəd Rusiya tərəfinə daşınmada qənaətlə regionları qazla təchiz etməyə, ticarətin həcmini genişləndirməyə, yeni iş yerləri yaratmağa imkan verəcəkdir.

Azərbaycanın Rusiya Federasiyası subyektləri ilə əməkdaşlığına toxunan səfir vurğulamışdır ki, Azərbaycan Respublikası və Rusiya Federasiyasının Kabardin-Balkar Respublikası arasında imzalanmış saziş regionların birbaşa ticarət-iqtisadi, elmi-texniki və mədəni əməkdaşlığı üçün imkanlar açır.

Görüşün yekunları sırasında Azərbaycan Respublikası və Rusiya Federasiyası xarici işlər nazirlərinin iki ölkənin diplomatik nümayəndəliklərinin yerləşdirilməsi və xidmət göstərilməsi şərtləri haqqında Birgə Bəyannaməni qeyd etmək olar.

Səfir onu da bildirmişdir ki, prezidentlərin növbəti görüşü iyulun ortalarında Moskvada keçiriləcəkdir.

Sonda V.Doroxin jurnalistlərin suallarına cavab vermişdir.

AzərTAc

Azərbaycan.- 2009.- 3 iyul.- S. 5.