AzərTAc ilə "Kazinform" arasında saziş imzalanmışdır

Asiya və Sakit Okean Ölkələri Xəbər Agentlikləri Təşkilatı (OANA) və Türkdilli Xəbər Agentlikləri Birliyi (TKA) çərçivəsində əməkdaşlıq edən AzərTAc və "Kazinform" bundan sonra ikitərəfli əlaqələrin daha da genişləndirilməsinə xüsusi diqqət yetirəcəklər.

AzərTAc-ın Baş direktoru Aslan Aslanov və "Kazinform"un prezidenti Dauren Diyarov tərəfindən imzalanan sazişə əsasən, tərəflər öz ölkələrinin daxili və beynəlxalq həyatının aktual hadisələri barədə pulsuz əsasda müntəzəm xəbər mübadiləsi edəcək, aldıqları xəbərləri öz dövlətlərinin ərazisində yayacaqlar. Sənəddə dövlət başçılarının, rəsmi nümayəndə heyətlərinin qarşılıqlı səfərləri zamanı informasiya dəstəyinin təmin olunmasına kömək göstərilməsi, jurnalistlərin, fotomüxbirlərin və digər mütəxəssislərin mübadiləsi də nəzərdə tutulmuşdur.

Tərəflər özlərinə məxsus veb-portallarda, veb-saytlarda və digər mümkün informasiya resurslarında banner mübadiləsi aparacaqlar.

Azərbaycan həqiqətlərinin dünya informasiya məkanında daha geniş yayılmasını təmin etmək üçün AzərTAc Avropa və Asiyanın müxtəlif ölkələrinin aparıcı xəbər agentlikləri ilə birbaşa əməkdaşlıq əlaqələrinin qurulmasına xüsusi diqqət yetirir. Qazaxıstanın İnformasiya Agentliyi ilə imzalanmış saziş də bu baxımdan faydalı olacaqdır

Azərbaycan.- 2009.- 3 iyul.- S. 5.