Xəbər verildiyi
kimi, Azərbaycan Prezidenti İlham Əliyevin 2009-cu il 30 iyun
tarixli sərəncamı ilə Rudolf Nikolayeviç İvanov
Azərbaycan Respublikası ilə Rusiya Federasiyası
arasında mədəni əlaqələrin möhkəmləndirilməsində
xüsusi xidmətlərinə görə "Dostluq"
ordeni ilə təltif edilmişdir.
İyulun 3-də
Prezidentin tapşırığı ilə Baş nazirin
müavini Elçin Əfəndiyev "Dostluq" ordenini
rusiyalı tədqiqatçı, Beynəlxalq
İnformasiyalaşdırma Akademiyasının üzvü,
professor Rudolf İvanova təqdim etmişdir.
Tanınmış tədqiqatçı
alimi dövlətimizin yüksək mükafatına layiq
görülməsi münasibətilə təbrik edən
Baş nazirin müavini, Rudolf İvanovun Azərbaycan
Respublikası ilə Rusiya Federasiyası arasında mədəni
əlaqələrin möhkəmləndirilməsi sahəsində
xidmətlərini bir daha xatırlatmışdır. Qeyd etmişdir ki, indiyədək
onun nəşr etdirdiyi 30 kitab arasında bizim
diyarımıza, Azərbaycanın görkəmli tarixi şəxsiyyətlərinə
həsr olunmuş tədqiqat əsərləri mühüm
yer tutur. Onlardan biri də rusiyalı alimin çoxillik gərgin
tədqiqatlarının bəhrəsi olan əfsanəvi azərbaycanlı
general, çar ordusunun qəhrəman sərkərdələrindən
sayılan, kornetdən general rütbəsinədək yüksəlmiş
və Əlahəzrət İmperatorun General-Yavəri
adına layiq görülmüş Hüseynxan
Naxçıvanskinin həyat və döyüş yolundan bəhs
edən "Əlahəzrətin general-yavəri" tarixi
monoqrafiyasıdır.
Bir neçə il əvvəl
həmin monoqrafiyanın Bakıda təqdimat mərasiminin
keçirildiyini deyən E.Əfəndiyev Rudolf İvanovun
öz qələmi ilə daim Ermənistan-Azərbaycan,
Dağlıq Qarabağ münaqişəsində
xalqımızın haqq işini müdafiə etdiyini, erməni
millətçilərinin iç üzünü açan
tarixi faktlar ortaya qoyduğunu minnətdarlıq hissi ilə qeyd
etmişdir.
Yüksək dövlət
mükafatı ilə təltif olunduğuna görə təşəkkürünü
bildirən R.İvanov Azərbaycanı və onun mərd,
mübariz və qədirbilən xalqını ürəkdən
sevdiyini bildirmiş, Bakı Hərbi Dəniz Məktəbində
həyata vəsiqə aldığını minnətdarlıq
hissi ilə xatırlamış, yenidən Bakıda
olmasından son dərəcə məmnun
qaldığını dönə-dönə
vurğulamışdır. Rusiyalı tədqiqatçı "Dostluq" ordeni ilə
təltif olunması haqqında Azərbaycan Prezidenti İlham Əliyevin
sərəncamını eşitdiyi günü
ömrünün ən xoşbəxt anı hesab etdiyini
söyləmiş, əməyinə verilən qiymətə
görə dövlətimizin başçısına minnətdarlığını
çatdırmağı xahiş etmişdir.
Baş nazirin müavini
Elçin Əfəndiyev Rudolf İvanovun "Dostluq"
ordeni ilə təltif olunması haqqında Azərbaycan
Prezidenti İlham Əliyevin sərəncamının mətnini
oxumuş, yüksək mükafatı qonağa təqdim etmiş,
ona uzun ömür, cansağlığı, elmi fəaliyyətində
yeni uğurlar arzulamışdır.
AzərTAc
Azərbaycan.- 2009.- 4 iyul.- S. 4.