Rumıniya Azərbaycandan daha böyük həcmdə neft və neft məhsulları almaq niyyətindədir

Sənaye və energetika naziri Natiq Əliyev Adriyan Vidyanunun Azərbaycana səfərini yüksək qiymətləndirərək bu səfərin ölkələrimiz arasında əməkdaşlığın inkişafında mühüm rol oynayacağını bildirmişdir. Qeyd edilmişdir ki, Azərbaycan və Rumıniya prezidentləri arasında olan dostluq və səmimi münasibətlər ölkələrimizin bütün sahələrdə əlaqələrinin inkişafı üçün möhkəm zəmin yaratmışdır. Bildirilmişdir ki, Azərbaycan bütün sahələrdə olduğu kimi, enerji təhlükəsizliyi məsələsində də Rumıniya ilə intensiv əməkdaşlığın qurulmasında maraqlıdır və qarşılıqlı fayda verə biləcək bütün məsələlər müzakirə edilə bilər. Azərbaycan, Rumıniya da daxil olmaqla, bütün Avropa İttifaqı ölkələri ilə enerji təhlükəsizliyi məsələsində real əməkdaşlığa hazırdır.

Rumıniya ilə Azərbaycan arasında siyasi və iqtisadi münasibətlərin yüksək səviyyədə olduğunu qeyd edən Adriyan Vidyanu bildirmişdir ki, ölkəsi Azərbaycan ilə bütün sahələrdə əlaqələrin daha da möhkəmlənməsində maraqlıdır. Nazir Azərbaycanı Xəzər regionunda Rumıniyanın dostu və etibarlı tərəfdaşı adlandırmışdır. Adriyan Vidyanu ölkəsinin Azərbaycandan daha böyük həcmdə neft və neft məhsulları almaq niyyətini də ifadə etmişdir.

Görüşdə qarşılıqlı maraq doğuran digər məsələlər də geniş müzakirə olunmuşdur.

Azərbaycan Respublikası Dövlət Neft Şirkətinin prezidenti Rövnəq Abdullayev görüşdə iştirak etmişdir.

AzərTAc

Azərbaycan.- 2009.- 5 iyul.- S. 2.