"Meydan bazarı" hamını valeh etdi

İyulun 5-də İçərişəhərdə, "Qoşa Qala" qapısının qarşısında keçirilən "Meydan bazarı" adlı mərasim Orta əsr Bakısını xatırladırdı. Bir tərəfdə çərkəzi geyimlilər var-gəl edir, bir yanda dulusçular, pinəçilər, kustarlar, ipəkçilər, mahudçular, başqa bir yanda isə tikmə, toxuma satan qadınlar. Burada çoxlu əl işləri, toxumalar, tikmələr, quramalar, araqçınlar, qurşaqlar, çarıqlar, butalar, xalça-palazlar, rəsm əsərləri, kitablar, bir sözlə, xalqımızın bir çox sənət nümunələri həm sərgilənir, həm də satılırdı.

Tədbir Bakı Mədəniyyət və Turizm İdarəsi, "Vahid evi" və "İçərişəhər" Dövlət Tarix-Memarlıq Qoruq İdarəsinin təşkilatçılığı ilə keçirilirdi. Maraqlıdır ki, bazarın ən çox müştərisi xarici qonaqlar idi. Onlar xurcun-cejim, tikmə-toxuma satan qadınlara yaxınlaşır, mücrülər, suvenir musiqi alətləri alır, bir sözlə, əməlli-başlı bazarlıq edirdilər. Təşkilatçıların nümayəndələrindən biri dedi ki, "meydan bazarı"n təşkil edilməsində məqsədimiz şəhər sakinlərinin və xarici qonaqların zövqlərini oxşamaq, milli adət-ənənələrimizin itib getməsinin qarşısını almaqdır. Elə tikmə, toxuma, qurama, plov növləri və maraqlı kustar işləri var ki, yavaş-yavaş unudulur, tək-tük evlərdə qalır. İstəyirik onları yaşadaq, inkişaf etdirək.

Tədbirdə nağaraçılardan ibarət ansamblın, "Aysel" rəqs qrupunun, pəhləvanların, "Cəngi" qrupu, "Bakı gecələri" musiqi festivalı mükafatçılarının, meyxanaçıların və məzhəkəçilərin çıxışları da buraya gələnlərə olduqca xoş təsir bağışladı.

R.RZALI

Azərbaycan.- 2009.- 7 iyul.- S. 6.