Suriya Prezidenti Bəşşar əl-Əsəd Təzəpir məscid kompleksində olmuşdur

İyulun 8-də Suriya Ərəb Respublikasının Prezidenti Bəşşar əl-Əsəd Təzəpir məscid kompleksində olmuşdur. Ali qonağı Qafqaz Müsəlmanları İdarəsinin sədri şeyxülislam Allahşükür Paşazadə qarşılamışdır.

Prezident Bəşşar əl-Əsəd Təzəpir məscidi ilə tanış oldu. Məlumat verildi ki, Prezident İlham Əliyevin göstərişi əsasında 2005-ci ildə məscidin bərpası və ətraf ərazilərin yenidən qurulması layihəsi hazırlanmışdı. Layihədə Təzəpir məscidinin ilkin görkəminə qaytarılması məqsədi ilə yenidən bərpası və əzəli memarlığına xələl gətirməyən elementlərin əlavə edilməsi öz əksini tapmışdı. Məscidin bərpasında Azərbaycan nəqqaşlıq məktəbinin və Şərq oriyentalistikasının nadir nümunələrindən istifadə olunmuşdur.

Təzəpir məscidinin tamamlayıcı dekorativ elementlərinin üstü, minarələrin başı və kəmərbənd yazıları ən yüksək əyarlı qızıl lövhələrdəndir. Yuxarı hissədə "La İlahə-İlləllah" kəlməsi 6 dəfə təkrar olunmuş günbəzin tən ortasında Qurani-Kərimdən "Nas", dairələrdə "Ayətül-kürsü", kiçik gümbəzlərdə isə "Həmd" surələri həkk edilmişdir.

Bildirilmişdir ki, kompleksdə Bakı İslam Universitetinin tədris korpusu yerləşir. Korpusun hər mərtəbəsində 10 sinif otağı olmaqla 250 tələbənin təhsil alması üçün hər cür şərait yaradılmışdır.

Suriya Prezidenti Bəşşar əl-Əsəd kompleksdə Qafqaz Müsəlmanları İdarəsinin 6 min ədəbiyyatın mühafizə edildiyi kitabxanası ilə tanış olmuşdur. Kitabxananın bir hissəsində dini verilişlərin hazırlanması üçün yaradılmış ministudiya ali qonaqda böyük maraq doğurmuşdur.

Prezident Bəşşar əl-Əsəd burada nümayiş olunan qədim kitablara, Təzəpir məscidi haqqında CD-lərə baxdı, xatirə kitabına ürək sözlərini yazdı.

Təzəpir məscid kompleksi ilə tanışlıqdan sonra Qafqaz Müsəlmanları İdarəsinin sədri şeyxülislam Allahşükür Paşazadənin və Suriya Prezidenti Bəşşar əl-Əsədin görüşü olmuşdur.
Görüşdə tərəflər ölkələrimiz arasında münasibətlərin inkişafından məmnunluqlarını ifadə etmişlər.

Şeyxülislam Allahşükür Paşazadə və Prezident Bəşşar əl-Əsəd dövlətlərimiz arasında əlaqələrin bundan sonra da genişlənəcəyinə ümidvar olduqlarını bildirərək bu səfərin Azərbaycan-Suriya ikitərəfli münasibətlərinin yeni mərhələyə yüksəlməsinə təkan verəcəyini vurğulamışlar.

Görüşdə ikitərəfli münasibətlər, dini məsələlər barədə fikir mübadiləsi aparılmışdır.

Ali qonağa xatirə hədiyyələri təqdim olunmuşdur.

AzərTAc

Azərbaycan.- 2009.- 9 iyul.- S. 3.