Müdafiə Nazirliyi və Respublika Hərbi Prokurorluğu rəsmi məlumat yaymışlar

Müdafiə Nazirliyi və Respublika Hərbi Prokurorluğu mətbuat xidmətlərinin birgə məlumatında bildirilir ki, Tovuz rayonundakı "N" saylı hərbi hissənin əsgəri Samir Tahir oğlu Mustafayev barədə "Azadlıq" qəzetinin 4 iyul 2009-cu il tarixli sayında dərc edilən yazı təhrif edilmiş formada - əsgərin atası Tahir Mustafayevin mülahizələrinə əsaslanaraq qələmə alınmışdır.

Vəziyyət əslində belə olmuşdur: Samir Mustafayev aprelin 17-də hərbi hissəyə qəbul olunarkən aparılan tibbi yoxlama zamanı baş və ürək ağrılarından şikayət etmişdir. O, hospitala göndərilmiş və 15 gün müddətində kəskin respirator xəstəlik diaqnozu ilə müalicə olunmuşdur.

İyunun 14-də S.Mustafayevin yanına gələn valideynləri ona bacısının toyu olacağını deyərək Samiri özləri ilə aparmaq istəmişlər. Lakin onların diqqətinə çatdırılmışdır ki, gənc, əsgər olduğu üçün ona yalnız ailə vəziyyəti ilə əlaqədar məzuniyyət verilə bilər və bunun üçün də təsdiqedici sənəd lazımdır. S.Mustafayev yoldaşlarına bildirmişdir ki, necə olursa-olsun bacısının toyunda iştirak edəcəkdir. Əks təqdirdə özünə qəsd edəcəyini və nizamnamədənkənar digər addımlar atacağını söyləmişdir. Beləliklə, yeməkxanada növbədə olan zaman əsgər S.Mustafayevə yeməkxana növbətçisinin köməkçisi, kiçik çavuş Davud Mahmudov tapşırığı yerinə yetirmədiyinə görə irad tutarkən əvəzində çavuşa yumruq və təpiklə zərbələr endirmişdir. Bundan sonra onlar arasında dava düşmüşdür. Həmin gün əsgərlər növbəni qurtardıqdan sonra bölüyə qayıtmışlar. S.Mustafayev isə ayaqyoluna getmək adı ilə bölükdən çıxmış və ülgüclə hər iki qolunu bilək nahiyəsindən kəsərək özünə xəsarət yetirmişdir.

İyunun 24-də isə saat 09.00 radələrində tibb xidməti kapitanı Elşad Abbasov xəstələri müayinə edərkən əsgər S.Mustafayevdən səhhətində hər hansı problemin olub-olmadığını soruşarkən heç bir cavab verməmiş və yerdən daş götürərək kapitan Abbasovun çiyninə xəsarət yetirmişdir. Bundan sonra əsgər S.Mustafayev hərbi hissə komandirinin yanına aparılmış və nəyə görə belə hərəkət etdiyi soruşularkən yenə heç bir cavab verməmişdir. Həmin gün əsgər S.Mustafayevin təkrar müayinə üçün hospitala göndərilməsi barədə göstəriş verilmişdir.

Bu hadisədən sonra S.Mustafayev yenə özünə qəsd etmək istəmiş və bu barədə hərbi hissə rəhbərliyi dərhal məlumatlandırılmışdır. Samirlə söhbət etmək üçün onu qərargahdakı hüquqşünasın otağına aparmaq istəmişlər. Bölük komandirinin otağından çıxan kimi o, kazarmanın daxilindəki 2-ci mərtəbənin pilləkənlərindən tullanaraq arxası üstə 1-ci mərtəbəyə düşmüşdür. Həmin vaxt xəsarət almamış, qərargah hüquqşünasının iş otağına daxil olan kimi isə özünü pəncərədən atmışdır. O, əvvəl pəncərənin altında quraşdırılmış çardağa düşmüş, sonra isə oradan özünü başıaşağı yerə tullamışdır.

Nəticədə əsgər S.Mustafayev qapalı kəllə-beyin travması, alın nahiyəsinin, sol qaş nahiyəsinin, körpücük sümüyünün çapılmış-sıyrılmış yarası, sol bazu və saidin kəsilmiş yaraları xəsarəti ilə Mərkəzi Hərbi Klinik Hospitala köçürülmüşdür.

Hazırda Qazax Hərbi Prokurorluğunda həm S.Mustafayev tərəfindən törədilmiş qeyri-qanuni hərəkətlər, həm də onun atası T.Mustafayevin ərizəsində göstərdiyi xüsusatlar, o cümlədən S.Mustafayevin hərbi xidmət dövründə qeyri-adi davranışı nəzərə alınmaqla hərbi xidmətə çağırılarkən və indi xidmətə yararlı olub-olmaması xüsusatları üzrə araşdırma davam etdirilir.

Obyektiv, hərtərəfli araşdırma aparılmaqla bütün xüsusatlara ədalətli hüquqi qiymət verilməsi təmin ediləcək və bu barədə ictimaiyyətə əlavə məlumat veriləcəkdir.

AzərTAc

Azərbaycan.- 2009.- 9 iyul.- S. 6.