Suriya Prezidenti Bəşşar əl-Əsəd Azərbaycanın Baş naziri Artur Rasizadə ilə görüşmüşdür

Azərbaycanda rəsmi səfərdə olan Suriya Prezidenti Bəşşar əl-Əsəd iyulun 9-da onun üçün ayrılmış iqamətgahda Baş nazir Artur Rasizadə ilə görüşmüşdür.

Suriya dövlətinin başçısı Azərbaycan Prezidenti İlham Əliyevlə apardığı danışıqları yüksək qiymətləndirərək bildirmişdir ki, onun fikrincə, bu danışıqlar bütün sahələrdə ikitərəfli əlaqələrin genişləndirilməsi üçün zəmin yaratmışdır. Suriya Prezidenti Suriya-Azərbaycan iqtisadi əməkdaşlığının perspektivlərindən söhbət açaraq iki ölkənin işgüzar dairələri arasında əlaqə yaradılması və qarşılıqlı faydalı münasibətlərin inkişaf etdirilməsi üçün səfər müddətində imzalanmış ikitərəfli sənədlərin əhəmiyyətini vurğulamışdır.

Baş nazir Artur Rasizadə son vaxtlar ölkədə həyata keçirilmiş iqtisadi islahatlar barədə Suriya Prezidentinə məlumat vermişdir. O, əmin olduğunu bildirmişdir ki, Suriyanın dövlət başçısının Azərbaycana ilk rəsmi səfəri iki ölkə arasında iqtisadi əməkdaşlığın genişlənməsinə təkan verəcəkdir.

AzərTAc

Azərbaycan.- 2009.- 10 iyul.- S. 3.