Türkiyənin Ədalət və İnkişaf Partiyası Gənclər Birliyinin nümayəndələri Milli Məclisdə olmuşlar

Ölkəmizdə səfərdə olan Türkiyənin Ədalət və İnkişaf Partiyası Gənclər Birliyinin nümayəndələri iyulun 9-da Milli Məclisdə olmuşlar. Azərbaycan parlamentinin fəaliyyəti ilə tanış olan türkiyəli gənclər Milli Məclisin Sədr müavini Bahar Muradova və bir qrup millət vəkili ilə görüşmüşlər.

B.Muradova demişdir ki, Azərbaycan və Türkiyə hər zaman bir yerdə olub və gələcəkdə də iki ölkənin dostluq və qardaşlıq münasibətlərini qoruyub saxlamaq, bunu daha da inkişaf etdirmək məsuliyyəti gənclərin üzərinə düşür.

Milli Məclis Sədrinin müavini qeyd etmişdir ki, hər iki ölkədə gəncliyin inkişafı üçün bütün zəruri addımlar atılır. Gənclər də bundan maksimum dərəcədə bəhrələnməli, dövlətçiliyimizin, dostluğumuzun möhkəmlənməsində, ortaq problemlərimizin həllində qətiyyətli mövqe nümayiş etdirməlidirlər.

B.Muradova türkiyəli gənclərin ölkəmizə əlamətdar bir hadisə - ulu öndər Heydər Əliyevin hakimiyyətə gəlişinin 40 illiyinin qeyd olunduğu ərəfədə səfər etmələrini yüksək qiymətləndirmiş, ümummilli liderin Azərbaycan gəncliyinə diqqət və qayğısından danışmışdır. O qeyd etmişdir ki, Heydər Əliyevin ölkəyə rəhbərlik etdiyi 40 il Azərbaycanın yüksəliş və inkişaf dövrü olmuşdur. Bu gün həm Azərbaycan, həm də Türkiyə gəncləri bu böyük şəxsiyyətin dühasından faydalanırlar.

İki ölkənin gələcək əməkdaşlığının inkişafı bizim əlimizdədir,- deyən Türkiyə Ədalət və İnkişaf Partiyası Gənclər Birliyinin sədri Fatih Şahin belə bir əlamətdar hadisə ərəfəsində Azərbaycana səfər etməkdən qürur duyduqlarını bildirmişlər.

O qeyd etmişdir ki, eyni məqsəd, eyni amal uğrunda birgə fəaliyyətin genişləndirilməsi üçün bundan sonra da əllərindən gələni edəcəklər.

Yeni Azərbaycan Partiyası Gənclər Birliyinin sədri Ramil Həsənov isə yaxın zamanlarda ümumi maraqlara xidmət edən Azərbaycan-Türkiyə Gənclər Günü adı altında yeni layihə həyata keçirəcəklərini bildirmişdir.

Milli Məclisin deputatları Rövşən Rzayev, Fuad Muradov gənclərə tövsiyələrini vermiş, onlara uğurlar arzulamışlar.

Azərbaycan.- 2009.- 10 iyul.- S. 3.