"Heydər Əliyev. 40 il Azərbaycan uğrunda" diskinin təqdimat mərasimi keçirilmişdir

Ümummilli lider Heydər Əliyevin siyasi hakimiyyətə gəlməsinin 40 illiyi münasibətilə Prezident Kitabxanasının və "Səs" qəzetinin birgə layihəsi əsasında "Heydər Əliyev. 40 il Azərbaycan uğrunda" adlı multimedia diski hazırlanmışdır.

İyulun 13-də Prezident Kitabxanasında diskin təqdimatı keçirilmişdir. Əvvəlcə kitabxananın direktoru Mayıl Əhmədov layihə barədə məlumat vermişdir.

Layihənin məsləhətçisi, "Azərbaycan" nəşriyyatının baş direktoru Ağabəy Əsgərov çıxışında ulu öndər Heydər Əliyevin ilk dəfə siyasi hakimiyyətə gəldikdən sonra keçmiş Sovet İttifaqının ən zəif inkişaf etmiş respublikalarından biri olan Azərbaycanı ən qabaqcıllar sırasına çıxardığını xüsusi vurğulamışdır.

"Səs" qəzetinin baş redaktoru Bəhruz Quliyev ulu öndərin zəngin siyasi fəaliyyətinin diskdə bölmələr şəklində əks olunduğunu bildirmişdir.

Milli Məclisin deputatları Fəttah Heydərov, Musa Quliyev, Asəf Hacıyev, YAP idarə heyətinin üzvü professor Şahlar Əsgərov çıxışlarında ümummilli lider Heydər Əliyevin dərin mənalı həyatından, ölkə və xalq qarşısında misilsiz xidmətlərindən danışmışlar.

YAP icra katibinin müavinləri, Milli Məclisin deputatları Siyavuş Novruzov və Mübariz Qurbanlı çıxışlarında 14 iyulun ölkəmizin həyatında ən tarixi günlərdən biri olduğunu vurğulamış, siyasi quruluşdan asılı olmayaraq, Heydər Əliyevin hər zaman qəlbən bağlı olduğu xalqı, Vətəni uçün gördüyü böyük işləri xatırlatmışlar.

Sonra diskdəki materiallar slaydlarla nümayiş etdirilmişdir.

Mayıl Əhmədov Prezident Kitabxanasının saytının elektron sənədlər toplusu bölümündə ulu öndər Heydər Əliyevin həyatının bütün dövrlərini əks etdirən məlumatların yerləşdirildiyini və təqdim olunan diskin həmin materiallar əsasında hazırlandığını bildirmişdir.

Prezident Administrasiyasının İctimai-siyasi məsələlər şöbəsinin mətbuat və informasiya orqanları ilə iş sektorunun müdiri Vüqar Əliyev təqdimat mərasimində iştirak etmişdir.

AzərTAc

Azərbaycan.- 2009.- 14 iyul.- S. 3.