Naxçıvanda müasir tipli səhiyyə ocaqlarının sayı artır

Ümummilli lider Heydər Əliyevin belə bir kəlamı var: "Səhiyyə həddindən artıq geniş, həyatın bütün sahələrini əhatə edən, cəmiyyət üçün, dövlət üçün, hər bir insan üçün lazımi sahədir". Ölkə səhiyyəsinin bugünkü inkişafı da ötən əsrin 70-80-ci illərində yaradılan möhkəm bazaya, təmələ istinad edir. Həmin dövrdə müdrik rəhbərin apardığı məqsədyönlü siyasət nəticəsində həyatımızın bir çox sahələri kimi səhiyyə sistemi də sürətlə inkişaf etmiş, şəbəkəsi genişləndirilmiş, tibbi kadrların hazırlanmasında böyük uğurlar qazanılmışdır.

Cənab İlham Əliyevin prezidentlik fəaliyyəti dövründə də ölkədə sosial problemlərin həlli, eləcə də səhiyyənin inkişafı ümdə vəzifələr sırasındadır. Ona görə də hər il dövlət büdcəsinin xeyli hissəsi həmin problemlərin həllinə yönəldilir. Bu siyasətin davam etdirilməsinin vacibliyindən danışan ölkə başçısı bir amili də həmişə xüsusi vurğulayıb: "...Sosial sahə ən böyük diqqətə layiq olan sahədir. İnsanların həyat səviyyəsinin, iş şəraitinin yaxşılaşdırılması, işsizliyin aradan qaldırılması, məktəb və xəstəxanaların tikintisi, əlbəttə ki, ölkənin ümumi inkişaf potensialını müəyyən edir".

Regionların sosial-iqtisadi inkişafının Dövlət Proqramı çərçivəsində Naxçıvan Muxtar Respublikasının səhiyyə sistemində həyata keçirilən tədbirlər nəticəsində 40-dan artıq obyekt istifadəyə verilib. İlk tədbir 2004-cü ilin may ayında ölkə Prezidentinin iştirakı ilə muxtar respublika xəstəxanasında Kompüter-Tomoqrafiya Mərkəzinin istifadəyə verilməsi olub.

Yaponiyanın istehsalı olan bu avadanlıq müasir səhiyyə sistemində ən gərəkli cihazlardan hesab olunur. Mərkəzin fəaliyyətə başlaması müalicə və müayinə üçün xarici ölkələrə, hətta Bakı şəhərinə gedib-gəlməyə məcbur olanlara elə muxtar respublikanın özündə hərtərəfli xidmət göstərilməsinə imkan yaradıb.

Tibbi xidmətin səviyyəsini artırmaq üçün görülən işlər bu yeniliklə kifayətlənməyib, sonrakı illərdə problemlərin kompleks həllinə başlanılıb. Bölgədə ən müasir standartlara cavab verən Müalicə-Diaqnostika Mərkəzi tikilib. Gözəl memarlıq üslubunda inşa olunan, beşmərtəbəli bu səhiyyə ocağı dünyanın qabaqçıl ölkələrində son texnologiyalar əsasında istehsal edilmiş cihaz və avadanlıqlarla, o cümlədən süni böyrək aparatı ilə təchiz olunub. Burada hazırda ən mürəkkəb, o cümlədən mikrocərrahiyyə əməliyyatları həyata keçirilir. Təkcə ötən il 463 xəstə üzərində yüksək ixtisaslı həkimlərin iştirakı ilə cərrahiyyə əməliyyatı aparılıb. Müayinə və cərrahiyyə əməliyyatlarının təşkili üçün çəkilən xərclər dövlət vəsaiti hesabına ödənilib.

Prezident İlham Əliyev 2007-ci ilin oktyabr ayında muxtar respublikaya səfəri zamanı daha bir səhiyyə müəssisəsinin - Şərur Rayon Mərkəzi Xəstəxanasının açılış mərasimində iştirak edib. Bu xəstəxana 65 çarpayılıq əsas korpusdan və ayrılıqda yerləşən 16 çarpayılıq yoluxucu xəstəliklər şöbəsindən ibarətdir. Müasir tibbi avadanlıqlarla təmin olunan bu xəstəxanada da ümumi cərrahiyyə, göz və ginekoloji əməliyyatların yüksək səviyyədə aparılması üçün normal şərait yaradılıb.

Ölkə Prezidenti çıxışında bu obyektdə görülən işləri yüksək qiymətləndirib dedi: "Mən xəstəxana ilə indi tanış oldum, gördüm ki, sözün əsl mənasında, bütün dünyada mövcud olan yüksək standartlara cavab verən bir tibb ocağıdır. Burada insanlar yaxşı tibbi xidmət alacaq, müalicə olunacaq, müayinədən keçəcəklər..."

Azərbaycan Prezidenti 2008-ci ilin iyun ayının əvvəllərində muxtar respublikaya səfər edərkən daha iki səhiyyə müəssisəsinin - Culfa Rayon Mərkəzi Xəstəxanasının və Duzdağ Fizioterapiya Mərkəzinin açılış mərasimlərində də iştirak edib.

Culfa Rayon Mərkəzi Xəstəxanasında terapiya, ginekologiya və doğuş, cərrahiyyə, təcili tibbi yardım şöbələri, pediatriya, hemodializ, reanimasiya bölmələri fəaliyyət göstərir. 23 həkim və 64 orta tibb işçisinin çalışdığı xəstəxana müasir aparat və avadanlıqlarla təmin olunub.

Müasir layihə əsasında inşa olunan xəstəxana binası ilə ətraflı tanışlıqdan sonra dövlətimizin başçısı bu səhiyyə ocağında da görülən işləri, yaradılan şəraiti yüksək qiymətləndirib. "Çox sevindirici haldır ki, Naxçıvanın bütün rayonlarında gözəl, yeni, müasir tibb ocaqları tikilir. Burada quraşdırılan avadanlıqlar ən yüksək səviyyəyə layiqdir" - deyən ölkə rəhbəri əmin olduğunu bildirib ki, yaxın gələcəkdə belə xəstəxanaların sayı daha çox olacaq.

Duzdağ Fizioterapiya Mərkəzində də müalicə və müayinə üçün normal şərait yaradılıb.

Mərkəzin 220 çarpayılıq yeraltı müalicəxanasındakı 2 qadın və 3 kişi palatasında bronxial astma, onun infeksion allergik və qarışıq formalarından, predastmadan, xroniki bronxitdən, allergik rinitlərdən, atopik dermatitlərdən, neyrodermitlərdən əziyyət çəkən xəstələr müalicə olunurlar. Xəstələr burada təbii müalicə - speleoterapiya kursu alırlar ki, bu da onların səhhətini natrium-xlor ionlarının təsiri ilə yaxşılaşdırır.

Yaxın günlərdə Naxçıvanda fəaliyyət göstərən müasir tipli səhiyyə müəssisələrinin sırasına daha iki obyekt daxil olacaqdır. Onlardan biri ötən ilin iyun ayının əvvəllərindən inşasına başlanılan Naxçıvan Şəhər Doğum Mərkəzidir. Avropa standartları əsasında tikilən bu mərkəz bölgədə analoqu olmayan tibb ocağı olacaq. Ölkə başçısı cənab İlham Əliyev obyektin təməlqoyma mərasimində iştirak edərkən inşaat işlərinin yüksək səviyyədə aparılması barədə tapşırıqlar vermişdi. İş prosesində yerli hakimiyyət orqanları Prezidentin tövsiyə və tapşırıqlarına ciddi əməl ediblər.

Mərkəzin birinci-üçüncü mərtəbələri müalicə və müayinə şöbələri üçün nəzərdə tutulub. Təcili yardım, poliklinika, izolyator doğuş, hamiləliyin patologiyası, uşaq neonatalogiyası, ginekologiya və perinatologiya şöbələri, qadın məsləhətxanası burada yerləşir. Təkcə ginekologiya şöbəsində 2 əməliyyat və müayinə, həkim-ordinator otaqları və birçarpayılıq 12 palata vardır.

Şahbuz şəhərində rayon mərkəzi xəstəxanası üçün 30 yerlik səhiyyə ocağı da Avropa standartları əsasında tikilir. Bu xəstəxanada isə terapiya, pediatriya, doğuş və yeni doğulmuşlar, cərrahiyyə, poliklinika şöbələri fəaliyyət göstərəcək. Burada 32 həkim və 44 orta tibb işçisi çalışacaq.

Muxtar respublikanın səhiyyə naziri Niyazi Novruzov söhbət əsnasında bildirdi ki, yeni tikilən tibb müəssisələrində ən son texnologiyalar əsasında istehsal edilmiş cihaz və avadanlıqlar quraşdırılıb. Onlar əsasən Almaniya, ABŞ, İsveçrə, Fransa, Danimarka və Türkiyədə tibb sənayesi ilə məşğul olan qabaqcıl şirkətlərdən alınıb.

Məmməd MƏMMƏDOV

Azərbaycan.- 2009.- 14 iyul.- S. 15.