"Asiyada islam tibbi əlyazmalarının vəziyyəti" mövzusunda regional seminar başlanmışdır

İyulun 13-də Azərbaycan Mədəniyyət və Turizm Nazirliyinin, İSESKO-nun və Milli Elmlər Akademiyasının birgə təkilatçılığı ilə "Asiyada islam tibbi əlyazmalarının vəziyyəti" mövzusunda regional seminar başlanmışdır.

"Bakı İslam mədəniyyətinin paytaxtı-2009" tədbirlər çərçivəsində keçirilən seminarda Misir, Tunis, Səudiyyə Ərəbistanı, Liviya, Bəhreyn, İran və digər ölkələrin nümayəndələri iştirak edirlər.

İSESKO-nun və Azərbaycanın himnlərinin səslənməsi ilə açılmış seminarda çıxış edən M.F.Axundov adına Azərbaycan Milli Kitabxanasının direktoru Kərim Tahirov tədbirin əhəmiyyətindən danışmış, mədəniyyət və turizm nazirinin müavini Sevda Məmmədəliyeva islam dünyasında tibbin inkişafından, qədimliyindən söhbət açmış, Azərbaycanda da tibbə dair əlyazmaların olduğunu, onların zəmanəmizə qədər gəlib çatdığını bildirmişdir.

İSESKO-nun Tehran filialı idarəsinin mədəniyyət üzrə proqram icraçısı Hassan Fartousi islam mədəniyyətinin bütün dünyada təbliğinin vacibliyini vurğulamışdır.

İyulun 15-dək davam edəcək seminarda orta əsr əlyazmalarının mühafizəsi, elektron mətnlərinin yaradılması, gələcək nəslə çatdırılması və s. məsələlər müzakirə olunacaqdır.

Seminar çərçivəsində "Orta əsr Azərbaycan tibb əlyazmaları" mövzusunda sərgi təşkil edilmişdir.

AzərTAc

Azərbaycan.- 2009.- 14 iyul.- S. 15.