1969-cu ildən Azərbaycanın bütün sahələrində sürətli inkişaf və yüksəliş dövrü başlanmışdır

Ümummilli liderin hakimiyyətə gəlməsinin 40 illiyi münasibətilə iyulun 14-də Nizami Rayon İcra Hakimiyyətində "Heydər Əliyev və Azərbaycan" mövzusunda ümumrayon toplantısı keçirilmişdir.

İştirakçılar əvvəlcə ulu öndərin foyedəki büstü önünə gül-çiçək dəstələri düzmüşlər.

İcra hakimiyyətinin başçısı Mehbalı Əliyev toplantını açdıqdan sonra ümummilli lider Heydər Əliyevin əziz xatirəsi bir dəqiqəlik sükutla yad olunmuşdur.

M.Əliyev çıxışında demişdir ki, müstəqil Azərbaycanın dövlətçilik tarixinin ən parlaq səhifəsi məhz Heydər Əliyev tərəfindən yazılmışdır. Heydər Əliyev hakimiyyətə gəlişi ilə həm yeni dövlət qurmuş, həm də bu dövlətin ideoloqu, nəzəriyyəçisi, yolgöstərəni olmuşdur.

Milli Məclisin İqtisadi siyasət komitəsinin sədri Z.Səmədzadə çıxışında bildirmişdir ki, 1960-cı illərin axırlarında Azərbaycan iqtisadi və mənəvi tənəzzül dövrünü yaşayırdı. 1969-cu ildə Heydər Əliyevin respublikanın siyası rəhbəri seçilməsi ilə cəmiyyətin həyatının bütün sahələrində sürətli inkişaf və yüksəliş dövrü başlanmışdır. 1970-1982-ci illərdə Azərbaycanda 200-dən çox yeni müəssisə tikilmiş, neftayırma və neft maşınqayırması müəssisələri tamamilə yenidən qurulmuşdur. İri elektron, elektrotexnika, radiotexnika və cihazqayırma sənayesi zavodları inşa edilmiş, həmin illərdə Azərbaycanda sənaye istehsalı 2 dəfədən çox artmışdır.

Heydər Əliyevin Azərbaycana rəhbərlik etdiyi illərin ən böyük nailiyyətlərindən biri də yüksək ixtisaslı kadrların hazırlanması ilə əlaqədar görülmüş uzaqgörən tədbirlər idi. YAP icraçı katibinin müavini, deputat Siyavuş Novruzov çıxışında bu məsələdən ətraflı danışaraq demişdir ki, məhz Heydər Əliyev Azərbaycanın gələcəyini düşünərək azərbaycanlı gəncləri mükəmməl təhsil almaq üçün keçmiş İttifaqın ən nüfuzlu ali məktəblərinə göndərmişdir. C.Naxçıvanski adına ixtisaslaşdırılmış məktəbin açılması isə gələcəkdə ordu quruculuğunda mühüm rol oynamışdır.

Milli Məclis sədrinin birinci müavini Ziyafət Əsgərov da ümummilli liderlə bağlı xatirələrindən danışmışdır. O demişdir ki, məhz Heydər Əliyevin gərgin əməyi, zəngin dövlətçilik təcrübəsi nəticəsində milli mənəvi dəyərlərin qorunub saxlanılmasına və ana dilinin inkişafına zəmin yaradılmışdır. Bir sözlə, 1969-1982-ci illər Azərbaycanın tarixinə böyük quruculuq və iqtisadi tərəqqi dövrü kimi daxil olmuşdur.

Heydər Əliyevin 1993-cü ildə Azərbaycan rəhbərliyinə qayıdışı ilə ölkənin ictimai-siyasi, sosial, iqtisadi, eimi-mədəni həyatında, beynəlxalq əlaqələrində dönüş yaranmış, müstəqil dövlət quruculuğu prosesi başlanmışdır. Ulu öndərin rəhbərliyi altında ölkəmizdə müstəqil dövlət təsisatlarının yaranması və dövlət quruculuğu prosesi böyük vüsət almışdır. Bunun da əsasını müstəqil Azərbaycanın ilk Konstitusiyası təşkil edirdi. Sonrakı dövrdə Azərbaycanda dövlətçiliyin möhkəmlənməsi və demokratik prinsiplərin bərqərar olması, hüquqi, dünyəvi dövlət quruculuğu prosesinin uğurla, sürətlə həyata keçirilməsi şəxsən Heydər Əliyevin adı ilə bağlıdır. Onun apardığı daxili siyasət Azərbaycanın hər bir vətəndaşına azad, sərbəst yaşamaq hüquqlarını təmin etməkdən və öz rifahını yaxşılaşdırmaq imkanları yaratmaqdan ibarət idi. Heydər Əliyev demokratik, hüquqi dövlət quruculuğu istiqamətində davamlı siyasət yeridərək ölkədə insan hüquq və azadlıqlarının başlıca prinsiplərinin bərqərar olması üçün əsaslı zəmin yaratmışdır.

Çıxışlarda bir fikir xüsusi vurğulanmışdır ki, Heydər Əliyevin siyasi varisi, onun ideyalarının ən layiqli davamçısı Prezident İlham Əliyevin rəhbərliyi ilə Azərbaycan gündən-günə inkişaf edir, möhkəmlənir.

Sonra "SPACE" Müstəqil Teleradio MMC-nin prezidenti, görkəmli rejissor Vaqif Mustafayevin ümummilli lider Heydər Əliyevə həsr olunmuş "Patriot" filmi nümayiş etdirilmişdir.

AzərTAc

Azərbaycan.- 2009.- 15 iyul.- S. 2.