Vətənə və xalqa sədaqət andı əməli fəaliyyətdə peşəkarlıq və əzmlə doğrulacaq

AzərTAc xəbər verir ki, Milli Təhlükəsizlik Nazirliyinin Heydər Əliyev adına Akademiyasının əməliyyat işçilərinin hazırlanması fakültəsinin birinci və Sərhəd Qoşunları fakültəsinin növbəti buraxılışına həsr olunmuş təntənəli mərasim keçirilmişdir.

Akademiyanın döyüş bayrağı hərbi marşın sədaları altında meydana gətirilmişdir. Milli təhlükəsizlik naziri general-leytenant Eldar Mahmudov, Dövlət Sərhəd Xidmətinin rəisi general-leytenant Elçin Quliyev, Azərbaycan Prezidentinin müdafiə məsələləri üzrə köməkçisi general-leytenant Vahid Əliyev, akademiyanın rəisi general-leytenant Ziya Yusifzadə və digər rəsmi qonaqlar ümummilli lider Heydər Əliyevin Akademiyanın həyətindəki abidəsi önünə əklil qoymuş, ulu öndərin xatirəsini ehtiramla anmışlar.

Tədbir iştirakçıları ulu öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda mübarizədə həlak olmuş şəhidlərin əziz xatirəsini bir dəqiqəlik sükutla yad etmişlər. Azərbaycanın dövlət himni səsləndirilmişdir.

Milli Təhlükəsizlik Nazirliyinin Heydər Əliyev adına Akademiyasının əməliyyat işçilərinin hazırlanması fakültəsinin ilk və Sərhəd Qoşunları fakültəsinin növbəti buraxılışı münasibətilə məzunları, onların valideynlərini, akademiyanın professor-müəllim heyətini təbrik edən general-leytenant Eldar Mahmudov, təcrübəli müəllimlərindən aldıqları biliklərin, qazandıqları peşə vərdişlərinin vəzifə borclarını layiqincə yerinə yetirməkdə onlara kömək olacağını gənc məzunların diqqətinə çatdırmışdır. Fəaliyyət göstərdiyi on bir il ərzində, xüsusən son dövrlər akademiyanın xeyli inkişaf etdiyini söyləyən Eldar Mahmudov məzunların xidmətə başladıqları sahələrdə əzmlə çalışmalarını ulu öndərin peşəkarlıq və vətənpərvərlik məktəbinə, Heydər Əliyevin milli maraqların qorunması amallarına sədaqət kimi qiymətləndirmişdir.

Dövlətimizin başçısı, Ali Baş Komandan İlham Əliyev akademiyaya Döyüş bayrağının təqdim edilməsi və "Şöhrət" Muzeyinin açılışında iştirakı zamanı burada görülmüş işləri yüksək qiymətləndirdiyini vurğulayan nazir hazırda onun tövsiyələrinə uyğun olaraq akademiyada təlim-tədris, xidmət və istirahət şəraitinin müasir tələblər səviyyəsində təkmilləşdirildiyini diqqətə çatdırmışdır. Akademiyanın qarşısında duran mühüm vəzifələrdən danışan Eldar Mahmudov gənclərin yüksək vətənpərvərlik ruhunda tərbiyə olunduğunu xüsusi qeyd etmiş, vəzifə borcuna məsuliyyətlə yanaşmağın, nizam-intizama riayət etməyin, biliklərə və peşəkarlıq vərdişlərinə dərindən yiyələnməyin vacibliyini bildirmişdir. "Vətənpərvərlik, dövlətçiliyə və müstəqilliyə sədaqət hər iki dövlət strukturunda çalışan şəxslər üçün başlıca şərtdir", - deyən nazir ən ümdə vəzifə borcumuzun işğal altındakı ərazilərimizin azad edilməsi olduğunu vurğulamışdır.

İyulun 14-də ulu öndər Heydər Əliyevin siyasi hakimiyyətə gəlməsinin 40 ilinin tamam olduğunu xatırladan Eldar Mahmudov ötən bu dövrü Azərbaycanın ən yeni tarixinin şanlı səhifəsi adlandıraraq demişdir: "Biz fəxr edirik ki, Heydər Əliyev epoxasının müasirləri və onun məktəbinin yetirmələriyik. Bu həm böyük iftixar, həm də yüksək məsuliyyət deməkdir. Bütün fəaliyyətimiz ümummilli liderin ideyaları üzərində qurulmalıdır".

Milli təhlükəsizlik naziri respublikanın sosial-iqtisadi, ictimai-siyasi həyatının bütün sahələrində uğurlu islahatların həyata keçirildiyini, Azərbaycanın dinamik inkişaf edərək bölgənin lider dövlətinə çevrildiyini qeyd etmiş, ölkəmizin təşəbbüsü və yaxından iştirakı ilə reallaşan beynəlxalq iqtisadi layihələrin təhlükəsizliyinin daha etibarlı təmin edilməsinin çox məsuliyyətli vəzifə olduğunu, milli təhlükəsizliyə cavabdeh orqanların əməkdaşlarından daha yüksək peşəkarlıq, tapşırıqların icrasında çeviklik və səriştə tələb edildiyini məzunların diqqətinə çatdırmışdır.

Eldar Mahmudov əsası ulu öndərimiz tərəfindən qoyulmuş Milli Təhlükəsizlik Nazirliyi Akademiyasının ötən il 10 illik və bu il isə Azərbaycanın təhlükəsizlik orqanlarının 90 illik yubileylərinin təntənəli surətdə qeyd edildiyini və bu əlamətdar hadisələrlə əlaqədar "Heydər Əliyev və milli təhlükəsizlik orqanları", "Milli təhlükəsizlik orqanlarının tarixi" kitablarının nəşr olunduğunu da xatırlatmış, "SPACE" telekanalı ilə birgə çoxseriyalı sənədli filmin çəkilib ölkə ictimaiyyətinə təqdim olunduğunu bildirmişdir.

Nazir Eldar Mahmudov Azərbaycan Respublikasının Prezidenti, Ali Baş Komandan İlham Əliyevin bütün əmr və göstərişlərinin, tövsiyələrinin bundan sonra da dərhal və qüsursuz yerinə yetiriləcəyini bildirmiş və xatirələrində əbədi qalacaq bu gün münasibətilə gənc zabitləri bir daha təbrik etmiş, onlara gələcək fəaliyyətlərində uğurlar arzulamışdır.

Dövlət Sərhəd Xidmətinin rəisi general-leytenant Elçin Quliyev də çıxış edərək məzunları təbrik etmiş, Silahlı Qüvvələrimizin tərkibinə növbəti zabit nəslinin verilməsində zəhməti və əziyyəti olan hər bir kəsə, o cümlədən Milli Təhlükəsizlik Nazirliyinin rəhbərliyinə, akademiyanın professor-müəllim heyətinə, məzunların valideynlərinə dərin minnətdarlığını bildirmişdir.

"Bu günə qədər hər biriniz üçün məsuliyyət daşıyırdılar, bu gün bu zabit libasını geyinərək hər biriniz məsuliyyət daşıyıcı oldunuz", - deyən Elçin Quliyev gənc zabitlərin bu səviyyəyə gəlib çatmasında dövlətin diqqət və qayğısını xüsusi qeyd etmişdir. Əsası ulu öndərimiz Heydər Əliyev tərəfindən qoyulmuş ordumuzun qüdrətinin artırılması, təhlükəsizliyimizin daha da möhkəmlənməsi işində Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin gördüyü işlərdən danışan Dövlət Sərhəd Xidmətinin rəisi zabitlərin peşəkarlığının, Vətənimizə, xalqımıza, Prezidentimizə sədaqətli xidmətin bu işlərin görülməsində böyük rol oynadığını vurğulamışdır.

Milli Təhlükəsizlik Nazirliyinin Heydər Əliyev adına Akademiyasının rəisi general-leytenant Ziya Yusifzadə çıxış edərək Prezident İlham Əliyevin milli təhlükəsizlik orqanlarına olan diqqət və qayğısı, milli təhlükəsizlik naziri general-leytenant Eldar Mahmudovun yüksək təşkilatçılığı sayəsində akademiyanın inkişafından danışmışdır.

Ziya Yusifzadə sıralarında bir Prezident təqaüdçüsü və iki Heydər Əliyev təqaüdçüsü olan fakültələrin məzunlarının 5 illik tədris müddətində daim yüksək nailiyyətlər qazandıqlarını, akademiyanın elmi, ictimai, siyasi həyatında fəal iştirak etdiklərini, 31 nəfər zabitin akademiyanı fərqlənmə diplomu ilə bitirdiyini diqqətə çatdırmışdır.

Akademiyanın məzunları, gənc leytenantlar Atamoğlan Hüseynov və Seymur Xəlilov çıxış edərək, ümummilli lider Heydər Əliyevin adını daşıyan xüsusi ali təhsil ocağını bitirmələrindən qürur hissi keçirdiklərini bildirmiş, onlara göstərilən yüksək diqqət və qayğıya görə Azərbaycan Prezidenti, Ali Baş Komandan İlham Əliyevə, Milli Təhlükəsizlik Nazirliyinin, Dövlət Sərhəd Xidmətinin və akademiyanın rəhbərliyinə, müəllim kollektivinə minnətdarlıq etmiş, bütün məzunların adından Vətənə sədaqətlə xidmət edəcəklərini bildirmişlər.

Sonra milli təhlükəsizlik naziri Eldar Mahmudov və Dövlət Sərhəd Xidmətinin rəisi Elçin Quliyev akademiyanı fərqlənmə ilə bitirən məzunlara diplomları təqdim etmişlər.

Digər zabitlərə də diplomlar təqdim olunduqdan sonra akademiyanın zabit və kursantları orkestrin müşayiəti ilə hərbi marşla tribunanın önündən keçmişlər. Sonra tədbir akademiyadakı "Şöhrət" Muzeyində davam etdirilmişdir.

Azərbaycan.- 2009.- 15 iyul.- S. 2.