"Yevlax Azərbaycanın ən inkişaf etmiş şəhərləri sırasındadır"

Bir zamanlar ulu öndər bu şəhər haqqında demişdir: "Mən Yevlaxı daha abad, daha gözəl görmək istəyirəm". Sonralar isə onun siyasi kursunun davamçısı, respublika Prezidenti İlham Əliyev rayonda görülən işlərə çox yüksək qiymət vermişdir: "...Deyə bilərəm ki, son beş il ərzində Yevlax iqtisadi inkişaf baxımından Azərbaycanda ən sürətlə inkişaf edən rayonlardan biridir".

Deyirlər ki, insanlar kimi, şəhərlərin də həyat tərzini onun görkəmindən öyrənmək mümkündür. Yaxın keçmişimizdə, xüsusən yay aylarında Yevlaxın miskin görünüşü olardı. Şəhərdə tət-tək adama rast gələrdin. Qışda palçıqdan, yayda toz-torpaqdan heç kim rayonda qalmaq istəmirdi. İndi bu adət çoxdan dəyişib. Respublikamızın müxtəlif şəhərlərində və ölkədən kənarda yaşayan yevlaxlılar axışıb doğma ocağa gəlirlər. Nə çoxdur şəhərdə yaraşıqlı seyrəngahlar, fəvvarələr, parklar. Müstəqillik abidəsi, Nizami parkı, Xaldan kəndində Heydər parkı, Dostluq parkı, Dədə Qorqud parkı, Səməd Vurğun parkı əhalinin sevimli istirahət yeridir. Qeyd edək ki, Dədə Qorqud parkının və Uşaq Əyləncə Mərkəzinin açılışında ölkə Prezidenti İlham Əliyev iştirak etmişdir.

Yevlaxdakı fəvvarələrin öz füsunkarlığı var. Son beş ildə şəhərdə 22 fəvvarə kompleksi quraşdırılmışdır. Heykəllərdə yaşayan tarix isə insanlarda heyrət və sonsuz maraq doğurur.
Şəhərdə hara baxırsan, yaşıllıqdan, gül-çiçəkdən göz dincəlir, ürək rahatlıq tapır. Yevlaxa səfərlərindən biri zamanı Azərbaycan Respublikasının Prezidenti İlham Əliyev demişdir: "Şəhərin bu axşam görüntüsü... elə bil ki, dünyanın ən qabaqcıl şəhəri səviyyəsindədir".

Yevlax nəinki gözəlləşir, həm də onun iqtisadi potensialı möhkəmlənir. Şəhərdə iqtisadi və sosial inkişaf paralel aparılır, insanlara qayğı və diqqət rayon rəhbərliyinin gördüyü işlərin qayəsini təşkil edir. Ölkə başçısının bu bölgəyə çoxsaylı səfərləri yevlaxlılara daha böyük işlər görmək üçün stimul verir. Burada xüsusən sənayenin sürətli inkişafı təmin edilmişdir. Rayonda iri sənaye komplekslərində istehsal edilən məhsullar nəinki ölkəmizdə, onun hüdudlarından kənarda da həvəslə alınır.

"Lalə Tekstil" MMC haqlı olaraq yevlaxlıların fəxr etdiyi müəssisələrdən biridir. Fabrikin ümumi ərazisi 10,4 hektardır. Smeta dəyəri 4701 min manatdır. Fabrikdə 650 nəfər işləyir və yaxın gələcəkdə onların sayı 1200 nəfərə çatacaqdır. Müəssisədə uşaqlar, böyüklər üçün müxtəlif ölçüdə paltarlar tikilir. Ölkənin güc nazirliklərinin sifarişləri də yerinə yetirilir. Buradakı avadanlıq Türkiyə, Almaniya və Yaponiyadan gətirilmişdir. Fabrikin istehsal gücü ildə 7 milyon manatlıq məhsul buraxmağa imkan verir.

"Rövşən Oğuz" şirkətlər qrupuna daxil olan "Arfa" mebel fabrikinin tikintisi 2006-cı ilin sonunda başa çatmışdır. 1 məktəb, uşaq və qonaq otağı mebellərinin istehsal olunduğu fabrikdə quraşdırılmış avadanlıq Almaniya və İtaliyadan gətirilmişdir. Müəssisə öz məhsullarını satmaq üçün 20 regionda sərgi-satış salonları açmışdır.

2007-ci ilin oktyabr ayında Yevlaxda "Gilan" dəri fabriki işə düşmüşdür. Fabrikin açılışında dövlətimizin başçısı İlham Əliyev iştirak etmişdir. İndi müəssisə İtaliya, İspaniya, Ukrayna, Türkiyə və Çinə məhsul göndərir. Fabrikdə 320 nəfər işləyir.

Bunlardan əlavə, Yevlaxda ən müasir avadanlıqla təchiz olunmuş "DAN" MMC kərpic, asfalt, beton zavodları, "Yevlax-təmir" ASC, makaron, konserv, çörək sexləri fəaliyyət göstərir.
"Azərbaycan Respublikası regionlarının sosial-iqtisadi inkişafı Dövlət Proqramı"na uyğun olaraq rayonun Yuxarı Qarxun kəndində orta, Hacımahmudlu kəndində əsas, Bəydili kəndində ibtidai məktəb binaları tikilib istifadəyə verilmişdir.

Heydər Əliyev Fondu tərəfindən həyata keçirilən "Yeniləşən Azərbaycana yeni məktəb" proqramı çərçivəsində Hacıselli və Nəmərli kəndlərində yeni orta məktəb binaları inşa edilmişdir. Rayonun İrəvanlı qəsəbəsində qaçqın və məcburi köçkünlər üçün 211 min manat smeta dəyərində 198 yerlik orta məktəb tikilmişdir.

Şəhər icra hakimiyyətinin qeyri-hökumət təşkilatları ilə apardığı uğurlu təşkilatçılıq işi nəticəsində Qaraoğlan və Əkşəm kəndlərində orta, Duzlaq kəndində ibtidai məktəb binaları inşa edilmişdir. Şəhərdəki 8 saylı məktəb bu yaxınlarda əsaslı təmir və yenidənqurma işlərindən sonra istifadəyə verilmişdir. Məktəbin direktoru Mehriban Məcnunova deyir:

- Bütün qüvvə və bacarığımızı, təcrübəmizi sərf edəcəyik ki, möhtərəm Prezident İlham Əliyevin söylədiyi "Biz çox istəyirik ki, gənc nəsil dünyanın ən müasir standartlarına cavab verən şəraitdə oxusun, bilikli, savadlı olsun" fikrini layiqincə həyata keçirək.

Rayonda uşaqların məktəbəqədər tərbiyəsi işi də diqqət mərkəzində saxlanılır. Şəhər 2, 3, 4 saylı uşaq bağçası - körpələr evləri əsaslı təmir olunmuş, sağlamlıq imkanları məhdud uşaqların tərbiyəsi işinin təşkili məqsədilə şəhər 4 saylı uşaq bağçası - körpələr evində "Günəş" Uşaq İnkişaf Mərkəzi yaradılmışdır.

Yevlax səhiyyəsi respublikamızda bu sahənin ən müasir səviyyədə inkişafının bariz nümunəsidir. Bu ilin mart ayında Yevlax şəhərinə növbəti səfəri zamanı Azərbaycan Respublikasının Prezidenti İlham Əliyev, Heydər Əliyev Fondunun prezidenti Mehriban xanım Əliyeva rayonda müasir tipli uşaq xəstəxanasının açılışında iştirak etmişlər. Xəstəxananın smeta dəyəri 3 milyon 800 min manatdır. Burada ən müasir tibbi avadanlıqdan istifadə olunur. Təməli 2007-ci ilin oktyabrında qoyulmuş Mərkəzi Şəhər Klinik Xəstəxanası, Təcili Təxirəsalınmaz Tibbi Xidmət Stansiyası və digər tibb ocaqları səhiyyənin inkişafından xəbər verir.

Cəmi bir neçə il bundan əvvəl Yevlaxdan ayrılmış insanlar bu aran şəhərinin indiki mədəni həyatına heyran qalırlar. Yevlax Rayon Mədəniyyət Şöbəsinin müdiri İlqar Əhmədov bizimlə söhbətində deyir:

- Yevlaxın tarixində ilk dəfə olaraq burada Elektron kitabxana inşa edilmişdir. Şəhər və uşaq kitabxanalarında aparılan əsaslı təmir və yenidənqurma işlərindən sonra buranın görkəmi dəyişmiş, xidmətin səviyyəsi yüksəlmişdir. Yaxın keçmişdə rayonda yaşayan insanlar teatr tamaşalarını nadir hallarda görərdilər. İndi Yevlax Xalq Teatrı rayon sakinlərinin ixtiyarına verilib. Son illərdə inşa olunan Heydər Əliyev adına muzey və xiyaban, 5000 ədəd eksponatı olan tarix-diyarşünaslıq muzeyi, Heydər Əliyev adına unikal saray Yevlaxın bugünkü mədəni həyatından xəbər verir.

Ölkəmizin ərazi bütövlüyünün müdafiəsi uğrunda savaşlarda fiziki sağlamlığını itirmiş vətəndaşların və şəhid ailələrinin mənzil-məişət şəraitinin yaxşılaşdırılması ilə bağlı Azərbaycan Respublikasının Prezidenti İlham Əliyevin göstərişləri rayonda uğurla həyata keçirilir. Son illər onların ailələri üçün 2 ədəd 16 mənzilli və 1 ədəd 4 mənzilli yaşayış binası inşa olunmuşdur.

Hazırda 16 mənzilli yaşayış binasının inşası davam etdirilir. Bu yaxınlarda isə rayonda Əlillərin Bərpa Mərkəzi istifadəyə verilmişdir. 2 mərtəbədən ibarət olan mərkəzin ümumi ərazisi 4480 kvadratmertdir. Burada akt zalı, müasir tipli diş kabineti, trenajor zalı, hovuz, işıq, elektrik və istiliklə müalicə kabinetləri vardır.

Yevlaxlılar Azərbaycan Respublikası regionlarının sosial-iqtisadi inkişafına dair dövlət proqramının ikinci mərhələsində qarşıya qoyulan vəzifələri də müvəffəqiyyətlə yerinə yetirməyə çalışırlar. Yevlax bu gün də inşaat meydanını xatırladır. Ana Kürün sağ sahilində böyük bir ərazidə xüsusi layihə ilə bulvar inşa olunur. Qarabağ müharibəsi əlilləri və şəhid ailələri üçün dördmərtəbəli yaşayış binasının üçüncü mərtəbəsi tikilir. Mərkəzi Bankın Yevlax ərazi idarəsi üçün müasir tələblər səviyyəsində yeni inzibati binanın tikintisi sürətlə davam edir.

Ölkə başçısı İlham Əliyevin bu şəhərə böyük diqqət və qayğısı yevlaxlıların əhvali-ruhiyyəsini daim artırır, onları yeni nailiyyətlərə ruhlandırır. Möhtərəm Prezidentin söylədiyi kimi, bu gün "Yevlax Azərbaycanın ən inkişaf etmiş şəhərləri sırasındadır".

Lazım QULİYEV

Azərbaycan.- 2009.- 18 iyul.- S. 2.