Konstitusiya Məhkəməsi Plenumunun növbəti iclası olmuşdur

İclasda Novruz Şəmil oğlu Manafovun şikayəti üzrə Ali Məhkəmənin mülki işlər üzrə məhkəmə kollegiyasının 2008-ci il 6 avqust tarixli qərarının Azərbaycan Respublikasının Konstitusiyasına və qanunlarına uyğunluğunun yoxlanılmasına dair konstitusiya işinə baxılmışdır.

Konstitusiya Məhkəməsinin Plenumu iş üzrə hakim S.Salmanovanın məruzəsini, ərizəçi N.Manafovun və onun nümayəndəsi Z.Əsgərovun, cavab verən orqanın nümayəndəsi - Ali Məhkəmənin əməkdaşı R.Əkbərovun, mütəxəssislərin və maraqlı şəxslərin çıxışlarını dinləyib, işin materiallarını araşdırıb müzakirə edərək qərar qəbul etmişdir.

Qərarda deyilir ki, Azərbaycan Respublikası Dövlət Torpaq və Xəritəçəkmə Komitəsinin Qax rayon şöbəsinin Qax rayon Qaşqaçay bələdiyyəsinə və Manafov Novruz Şəmil oğluna qarşı torpaq sahəsinin satılmasına dair qərarın və kadastr planının etibarsız hesab edilməsi tələbi barədə mülki iş üzrə Azərbaycan Respublikası Ali Məhkəməsi Mülki İşlər üzrə Məhkəmə Kollegiyasının 2008-ci il 6 avqust tarixli qərarı Azərbaycan Respublikası Konstitusiyasının 60-cı maddəsinin I hissəsinə, 127-ci maddəsinin II, VII hissələrinə, 129-cu maddəsinin III hissəsinə və Azərbaycan Respublikası Mülki Prosessual Məcəlləsinin 417.1.3, 418.1-ci maddələrinə uyğun olmadığı üçün qüvvədən düşmüş hesab edilsin. İşə bu qərarın təsviri və əsaslandırıcı hissələrinə uyğun olaraq Azərbaycan Respublikasının mülki prosessual qanunvericiliyi ilə müəyyən edilmiş qaydada yenidən baxılsın.

Qərar dərc edildiyi gündən qüvvəyə minir, qətidir, heç bir orqan və ya şəxs tərəfindən ləğv edilə, dəyişdirilə, yaxud rəsmi təfsir oluna bilməz.

AzərTAc

Azərbaycan.- 2009.- 18 iyul.- S. 5.