Moskvada Rusiya Prezidentinin mükafatı uğrunda cıdır yarışları keçirilmişdir

Yarışı Rusiya Prezidenti Dmitri Medvedevlə birlikdə Azərbaycan Prezidenti İlham Əliyev, Qazaxıstan Prezidenti Nursultan Nazarbayev, Moldova Prezidenti Vladimir Voronin, Tacikistan Prezidenti Emoməli Rəhmon və Ermənistan Prezidenti Serj Sarkisyan da izləmişlər.

"Rusiya Prezidentinin 2009-cu il üçün mükafatı" uğrunda cıdır yarışlarında Rostov vilayətindəki "Donskoy" atçılıq zavodunun "Monomax" ləqəbli kəhər ayğırı qalib gəlmişdir. Azərbaycan Respublikası Atçılıq Federasiyası həmin yarışlarda çıxış etmək üçün İrlandiyadan gətirilmiş "Leyk Poet" ləqəbli ayğırı göndərmişdi.

"Rusiya Prezidentinin 2009-cu il üçün mükafatı" uğrunda cıdır yarışları 2004-cü ildən başlayaraq hər il keçirilir. Bu tədbir həm də MDB-nin üzvü olan ölkələrin dövlət başçılarının qeyri-rəsmi ünsiyyəti üçün bir fürsətə çevrilmişdir.

Builki cıdır yarışları Moskva Mərkəzi cıdır meydanının 175 illik yubileyinə həsr edilmişdi.

"Rusiya Prezidentinin 2009-cu il üçün mükafatı" uğrunda cıdır yarışlarının ümumi mükafat fondu 7 milyon rubl idi. Bu məbləğin yarısı yarışların qalibinə çatmışdır.

AzərTAc

Azərbaycan.- 2009.- 19 iyul.- S. 1.