Heydər Əliyev Fondunun təşəbbüsü bölgələrdə mütəşəkkil həyata keçirilir

Son dövrlər ölkəmizdə səhiyyə ilə bağlı aparılan islahatlar, bu sahənin inkişafına dövlət qayğısı, Prezident İlham Əliyevin imzaladığı sərəncamlar əhaliyə tibb xidmətinin səviyyəsinin yüksəldilməsində mühüm əhəmiyyət kəsb edir. Qeyd etmək lazımdır ki, hazırda əhaliyə tibb xidməti ilə bağlı ölkəmizdə 9 dövlət proqramı uğurla həyata keçirilir. Həmin proqramlardan biri talassemiya və digər qan xəstəliklərinin müayinə və müalicəsinin təşkili ilə bağlıdır.

Bu proqramın ən vacib hissəsi qan və qan ləvazimatları ilə təminat məsələsidir. Bu baxımdan Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə regionlarda qanvermə aksiyalarının keçirilməsi böyük humanizm nümunəsidir.

Bu günlərdə Qəbələ rayonunda da belə bir tədbir keçirildi. Respublika Səhiyyə Nazirliyinin təşkilatçılığı, Qəbələ Rayon İcra Hakimiyyətinin dəstəyi ilə mərkəzi rayon xəstəxanasında keçirilən qanvermə aksiyası mütəşəkilliyi ilə seçilirdi.

Rayon mərkəzi xəstəxanasının baş həkimi Sabir Bayramovun bildirdiyinə görə, gün ərzində 200-dən artıq rayon sakini bu humanist aksiyaya qoşulub. Qan verənlər arasında tibb işçiləri, RİH, rayon polis şöbəsinin, eləcə də digər təşkilatların nümayəndələri vardı. Onlar qan vermək üçün böyük həvəslə növbəyə dururdular.

Qanın toplanması işini B.Eyvazov adına Elmi Tədqiqat Hemotologiya və Transfuziologiya İnstitutunun əməkdaşları yerinə yetirirdilər.

Söhbət etdiyimiz rayon sakinləri aksiyanın çox vacib bir iş olduğunu və bu işdə böyük məmnuniyyətlə iştirak etdiklərini bildirdilər.

Telman NƏZƏRLİ

Azərbaycan.- 2009.- 19 iyul.- S. 3.