YAP Kəngərli rayon təşkilatının yeni binası istifadəyə verilmişdir

Yeni Azərbaycan Partiyası Kəngərli rayon təşkilatının yeni inzibati binası istifadəyə verilmişdir.

Mərasimdə çıxış edən rayon təşkilatının sədri Fazil Abbasov müasir tələblərə cavab verən yeni binanın istifadəyə verilməsini təşkilatın 5 illik yubileyinə böyük töhfə kimi dəyərləndirmişdir. O bildirmişdir ki, cari ildə rayonda partiya sıralarına 86 nəfər qəbul edilmişdir. Onların 30-u qadın, 47-si isə gənclərdir.

Yeni Azərbaycan Partiyası Naxçıvan Muxtar Respublika Təşkilatının və Naxçıvan Ali Məclisinin sədri Vasif Talıbov vurğulamışdır ki, YAP yarandığı gündən Azərbaycanda dövlətçiliyin möhkəmləndirilməsi, ölkəmizin inkişafı, əhalinin rifah halının yaxşılaşdırılması naminə fəaliyyət göstərir. YAP artıq 16 ildir ki, Azərbaycanda iqtidar partiyasıdır. Bu illər ərzində sübuta yetdi ki, ulu öndər Heydər Əliyevin yaratdığı partiya və Azərbaycan xalqı birdir, yekdildir. Ulu öndərin yolunu uğurla davam etdirən Prezident İlham Əliyev partiyanın fəaliyyətinin müasir tələblər baxımından qurulmasına, gənclər təşkilatlarının yaradılması və formalaşmasına xüsusi diqqət və qayğı göstərir.

Ali Məclisin sədri demişdir ki, 2004-cü ildə partiyanın Kəngərli rayon təşkilatı yarananda 1.215 nəfər üzvü vardısa, hazırda onların sayı 2.409 nəfərdir. Kəngərli rayonu Prezident İlham Əliyevin sərəncamı ilə təşkil olunmuşdur və hazırda inkişaf yolundadır.

AzərTAc

Azərbaycan.- 2009.- 19 iyul.- S. 3.