Azərbaycan Prezidenti İlham Əliyev İsveç Krallığının xarici işlər naziri Karl Bildti və onun başçılıq etdiyi Avropa İttifaqı "Üçlüyü"nün (Troyka) nümayəndə heyətini qəbul etmişdir

Azərbaycan Respublikasının Prezidenti İlham Əliyev iyulun 20-də İsveç Krallığının xarici işlər naziri Karl Bildti qəbul etmişdir.

Görüşdə iki ölkə arasında münasibətlərin inkişafından məmnunluq ifadə olundu, siyasi dialoqun genişləndirilməsinin zəruriliyi, ikitərəfli əlaqələrin daha da inkişaf etdirilməsi üçün geniş imkanların olduğu vurğulandı. Azərbaycan-İsveç ikitərəfli münasibətlərinin Avropa İttifaqı əməkdaşlığı çərçivəsində genişləndirilməsi baxımından vacibliyi bildirildi. İsveç Krallığının xarici işlər nazirinin Azərbaycana bu səfərinin iki ölkə arasında əlaqələrin daha da möhkəmləndirilməsinə xidmət edəcəyinə əminlik ifadə olundu.

Sonra isə Prezident İlham Əliyev İsveç Krallığının xarici işlər naziri Karl Bildtin başçılıq etdiyi Avropa İttifaqı "Üçlüyü"nün (Troyka) nümayəndə heyətini qəbul etmişdir.

Azərbaycanla Avropa İttifaqı arasında əməkdaşlığın hazırkı səviyyəsindən məmnun olduğunu deyən Prezident İlham Əliyev Şərq tərəfdaşlığı proqramının bu əməkdaşlığın daha da möhkəmlənməsinə xidmət edəcəyinə əminliyini vurğuladı və eyni zamanda, Proqramın Azərbaycanın Avropaya daha sıx inteqrasiyası üçün geniş imkanlar yaratdığını bildirdi.

Avropaya inteqrasiya məsələsinin ölkəmizin strateji məqsədlərindən biri olduğunu deyərək, bu siyasətin 15 ildir uğurla davam etdirildiyini vurğuladı. Dövlətimizin başçısı Avropa İttifaqı "Üçlüyü"nün nümayəndə heyətinin ölkəmizə bu səfərinin əməkdaşlığa dair bir çox məsələlər ətrafında fikir mübadiləsi aparılması baxımından əhəmiyyətli olduğunu söylədi.

Nümayəndə heyətinin rəhbəri, İsveç Krallığının xarici işlər naziri Karl Bildt Avropa İttifaqının Azərbaycanla əməkdaşlığa maraqlı olduğunu bildirdi. Qonaq təmsil etdiyi təşkilatla ölkəmiz arasında enerji, terrorizmə qarşı mübarizə və digər sahələrdə əməkdaşlığın yüksək səviyyədə olduğunu və bu əməkdaşlığın daha da genişləndirilməsinin vacibliyini vurğuladı. Karl Bildt Ermənistan-Azərbaycan, Dağlıq Qarabağ münaqişəsinin sülh yolu ilə həllinə dair aparılan danışıqlar prosesinin Avropa İttifaqı tərəfindən yaxından izləndiyini bildirdi.

AzərTAc

Azərbaycan.- 2009.- 21 iyul.- S. 1.