Azərbaycanın birinci xanımı Mehriban Əliyeva London Siti merinin xanımı Lin Luder ilə görüşmüşdür

İyulun 20-də Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva ölkəmizdə səfərdə olan London Siti merinin xanımı Lin Luder ilə görüşmüşdür.

Azərbaycanın birinci xanımı Mehriban Əliyeva Lin Luderi Bakıda görməkdən məmnun olduğunu bildirdi.

Bu yaxınlarda Böyük Britaniyada səfərdə olduğunu deyən Mehriban xanım iki ölkə arasında dostluq əlaqələrinin uğurla inkişaf etdiyini vurğuladı.

Xanım Lin Luder xoş sözlərə və səmimi münasibətə görə Mehriban Əliyevaya təşəkkür etdi.

Görüşdə ölkələrimiz və xalqlarımız arasında münasibətlərin yüksək səviyyədə olması xüsusi vurğulandı, əlaqələrin bundan sonra da inkişaf edəcəyinə əminlik ifadə olundu.

AzərTAc

Azərbaycan.- 2009.- 21 iyul.- S. 3.