Azərbaycanın uğurları digər ölkələr üçün örnək ola bilər

Bu sözləri ATƏT-in Bakı ofisinin rəhbəri Əli Bilge Cankorel iyulun 21-də Milli Məclis sədrinin müavini Bahar Muradova ilə görüşdə demişdir.

Bahar Muradova ATƏT-in baş katibinin bu günlərdə ölkəmizə səfərini xatırlatmış, bu cür səfərlərin ikitərəfli əlaqələrin inkişafı, regional problemlərin həlli və digər məsələlərdə birgə əməkdaşlıq üçün böyük əhəmiyyət kəsb etdiyini vurğulamışdır. O demişdir ki, Azərbaycan istər qanunvericilikdə, istərsə də digər sahələrdə Avropa Şurası, ATƏT və s. beynəlxalq təşkilatlarla əməkdaşlıqda maraqlıdır.

Sonra B.Muradova ölkəmizdə həyata keçirilən hüquqi, demokratik islahatlar barəsində ətraflı məlumat vermiş, Milli Məclisin bu istiqamətdəki rolundan danışmışdır.

Əli Bilge Cankorel Azərbaycan ilə ATƏT arasındakı əməkdaşlığı da yüksək qiymətləndirmişdir. O, dünyada və Avropada məişət zorakılığına və insan hüquqlarının digər üsullarla pozulmasına qarşı mübarizədən danışmış, bununla bağlı qanunvericilik bazasının yaradılmasının vacibliyini vurğulamışdır.

B.Muradova bildirmişdir ki, 2006-cı ildə Milli Məclisdə məişət zorakılığına qarşı mübarizəyə həsr olunmuş dinləmələr keçirilmişdir. Bu dinləmələrdə beynəlxalq qurumların, qeyri-hökumət təşkilatlarının və ictimaiyyətin nümayəndələri iştirak etmişlər. Hazırda məişət zorakılığına qarşı mübarizə ilə bağlı qanun layihəsi hazırlanır. Bununla əlaqədar beynəlxalq təşkilatlardan və ölkə ictimaiyyətinin nümayəndələrindən də rəy və təkliflər alınmışdır.

Sonra görüşdə qarşılıqlı maraq doğuran digər məsələlər ətrafında fikir mübadiləsi edilmişdir.

AzərTAc

Azərbaycan.- 2009.- 22 iyul.- S. 1.