Strateji tərəfdaşlıq müqaviləsi imzalandı

Dünən "Hyatt Regency" otelində "Azerfon" MMC və "Vodafone" şirkəti arasında strateji tərəfdaşlıq müqaviləsi imzalanmışdır.

Mərasimdə "Azerfon" MMC-nin baş icraçı direktoru Gido Helbix, "Vodafone" şirkətinin Tərəfdaş Bazarları üzrə icraçı direktoru Riçard Deyli, Britaniyanın Azərbaycandakı səfiri Karolin Braun və Azərbaycanın rabitə və informasiya texnologiyaları nazirinin müavini Elmir Vəlizadə iştirak edirdilər.

Müqaviləyə əsasən, "Azerfon", "Vodafone" şirkətlərinin məhsulları "Azerfon"un hazırkı və gələcək abunəçilərinə təqdim olunacaq.

Azərbaycanda "Vodafone" şirkətinin məhsulları və xidmətləri hər iki şirkətin birgə ticarət nişanları ilə satılacaq. Mərhələlərlə həyata keçirilən prosesin bir hissəsi kimi "Vodafone" şirkəti "Azerfon"un istifadəçilərini fəaliyyət göstərdiyi 67 ölkədə təkmilləşdirilmiş səs və rouminq xidmətləri ilə təmin edəcək.

"Azerfon" şirkətinin baş icraçı direktoru Gido Helbix bildirdi ki, "Azerfon" və "Vodafone" arasında strateji tərəfdaşlıq hər iki şirkət üçün önəmlidir. Belə ki, "Azerfon" "Vodafone" şirkətinin təcrübəsindən istifadə edərək qabaqcıl və ən innovativ məhsulları yerli bazarda təqdim edə biləcəkdir.

V.CƏFƏROV

Azərbaycan.- 2009.- 23 iyul.- S. 8.