Rusiya enerjimarşrutlarının diversifikasiyasını dəstəkləyir

Rusiya hökumətinin başçısı Vladimir Putinin Türkiyəyə səfəri ərəfəsində Ankarada Baş nazir Rəcəb Tayyib Ərdoğan və energetika və təbii ehtiyatlar naziri Taner Yıldız ilə müzakirələr aparan Rusiya Baş nazirinin müavini İqor Seçin jurnalistlərə müsahibəsində bildirmişdir ki, rəsmi Moskva, Nabukko da daxil olmaqla, heç bir başqa layihəyə əngəl törətmək istəmir.

Əksinə, biz enerji marşrutlarının diversifikasiyasını və özünü doğruldan bütün enerji layihələrini dəstəkləyirik. Bununla yanaşı, "Qazprom" şirkətinin layihələri Rusiya üçün prioritet olaraq qalır.

İqor Seçin onu da əlavə etmişdir ki, Nabukko kimi layihələrdə qaz hasilatçıları və alıcıları bütün detallara, başlıcası isə qiymət şərtlərinə diqqət yetirməlidirlər.

Taner Yıldız isə bildirmişdir ki, İqor Seçinlə görüşdə "Cənub axın" və "Mavi axın-2" layihələri müzakirə olunmuşdur.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2009.- 24 iyul.- S. 7.