Azərbaycan ilə Çexiya maliyyə nazirlikləri arasında əməkdaşlıq haqqında memorandum imzalanmışdır

Bu fikir iyulun 24-də Azərbaycanın maliyyə naziri Samir Şərifovun ölkəmizdə rəsmi səfərdə olan Çexiyanın maliyyə naziri Eduard Yanota ilə görüşündə xüsusi vurğulanmışdır. Görüşdən əvvəl Çexiyanın maliyyə naziri E.Yanotanın rəhbərlik etdiyi nümayəndə heyəti Fəxri xiyabanda müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşdur. Görkəmli oftalmoloq alim, akademik Zərifə xanım Əliyevanın məzarı üzərinə də tər çiçəklər düzülmüşdür.

Nümayəndə heyəti Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, "Əbədi məşəl" abidəsi önünə əklil qoymuşlar.

Azərbaycan ilə Çexiya arasında maliyyə sahəsində əməkdaşlığın genişləndirilməsinə dair ətraflı fikir mübadiləsi aparan nazirlər iki ölkənin maliyyə nazirlikləri arasında əməkdaşlıq haqqında memorandumu imzalamışlar.

İmzalanmadan sonra keçirilən mətbuat konfransında vurğulanmışdır ki, Azərbaycan-Çexiya əlaqələri strateji xarakter daşıyır, ölkələrimiz iqtisadi sahədə əməkdaşlığı əsaslı şəkildə genişləndirməkdə maraqlıdırlar. Çexiyanın maliyyə nazirinin Azərbaycana rəsmi səfəri, Prezident İlham Əliyevin E.Yanota ilə görüşü, eləcə də dövlət və hökumət rəsmiləri ilə aparılacaq müzakirələr ölkələrimiz arasında əlaqələrin möhkəmlənməsinə təkan verəcəkdir.

Memorandumun imzalanması ilə əməkdaşlıq üçün münbit hüquqi bazanın yarandığını vurğulayan nazir S.Şərifov bildirmişdir ki, sənədə əsasən Azərbaycan ilə Çexiya maliyyə nazirlikləri arasında büdcənin planlaşdırılması, xəzinədarlıq əməliyyatları, maliyyə nəzarəti, sosial sahələrin maliyyələşdirilməsi və digər sahələrdə qarşılıqlı əlaqələrin qurulması, təcrübə mübadiləsinin aparılması nəzərdə tutulmuşdur.

Azərbaycan.- 2009.- 25 iyul.- S. 5.