Azərbaycan-Amerika Şurası ABŞ-dakı erməni təşkilatlarının bəyanatlarını səmərəsiz adlandırmışdır

Bəyanatda deyilir: "ABŞ-dakı iki erməni təşkilatı Azərbaycan və Ermənistan prezidentlərinin iyulun 17-18-də Moskvada keçirilmiş görüşü ilə əlaqədar bəyanat yayaraq, danışıqlar prosesində əldə olunmuş irəliləyişlərlə bağlı narahatlıqlarını ifadə etmişlər. Amerika-Erməni Milli Komitəsinin sədri Kennet Kaçikiyanın iyulun 14-də ABŞ Prezidenti Barak Obamaya göndərdiyi məktubda bildirilir ki, ATƏT-in Minsk qrupunun həmsədr ölkələri təhlükəli və birtərəfli güzəştlərə getmək üçün Ermənistana güclü təzyiqlər göstərir. Ermənilər bundan çox narahatdırlar".

Prezident Barak Obamanın 2008-ci ildə seçkiqabağı kampaniyası zamanı verdiyi sözü xatırladan komitə sədri qondarma "Dağlıq Qarabağ Respublikasının" danışıqlar prosesində iştirakını vacib sayır.

Amerika Erməni Assambleyası da iyulun 22-də yaydığı bəyanatda Prezident Obamanın verdiyi sözü xatırladaraq, qondarma "Dağlıq Qarabağ Respublikasının" danışıqlar prosesində iştirakına çağırmış və bu təklifi assambleyanın Dağlıq Qarabağda yaşayan insanların fundamental hüquqlarını dəstəkləməsi ilə əsaslandırmışdır.

Azərbaycan-Amerika Şurasının bəyanatında deyilir ki, Barak Obama 2008-ci ilin yanvarında ABŞ-Ermənistan əlaqələrindən danışarkən, Dağlıq Qarabağ münaqişəsinin şəffaf, uzunmüddətli, tərəflər üçün məqbul sayılan demokratiya və öz müqəddəratını təyinetmə prinsipləri əsasında həllinə çalışacağını bildirmişdir.

Azərbaycan-Amerika Şurası bəyan edir ki, Amerika azərbaycanlıları kimi biz, Prezident Obamanın "Dağlıq Qarabağ münaqişəsinin həlli hər iki "prinsipial" tərəf - Ermənistan və Azərbaycan, habelə "maraqlı" tərəflər - Dağlıq Qarabağın erməni və azərbaycanlı icmaları üçün məqbul olmalıdır" sözləri ilə razılaşa bilmərik. Faktik olaraq, münaqişə tərəflərinin kimlər olduğunu, habelə sülh prosesinə kimlərin cəlb oluna biləcəyi "Beyker Qaydalarında" artıq 1992-ci ildə təsbit edilmişdir.

"Beyker Qaydaları" Avropada Təhlükəsizlik və Əməkdaşlıq Müqaviləsinin ABŞ-ın o vaxtkı dövlət katibi Ceyms Beykerin rəhbərlik etdiyi missiyası (ATƏT-in Minsk qrupunun sələfi) tərəfindən irəli sürülmüş və hamı tərəfindən qəbul edilmişdir.

Bəyanatda vurğulanır: "Narahatedici haldır ki, "Dağlıq Qarabağ əhalisinin fundamental hüquqlarını dəstəklədiyini" iddia edən hər iki erməni təşkilatı 1988-ci ildə Dağlıq Qarabağ əhalisinin üçdə birini və Ermənistanın "bufer zona" kimi hazırda işğal altında saxladığı yeddi ətraf rayonun əhalisinin 99 fazini təşkil edən azərbaycanlıların varlığına bilərəkdən göz yumur.

1991-ci ildən 1994-cü ilə kimi 800 min azərbaycanlı erməni qüvvələrinin qəddar etnik təmizləmə kampaniyasına məruz qalmış və yuxarıda qeyd olunan rayonlardan tamamilə didərgin düşmüşlər. Buna görə də mübahisəli ərazidə yalnız bir etnik qrupun maraqlarının önə çıxarılması Amerika dəyərlərinə ziddir. Beynəlxalq ictimaiyyət öz müqəddəratını həll etmək hüququnun etnik təmizləməyə bəraət qazandırmasını heç vaxt qəbul etmir".

Azərbaycan-Amerika Şurası bu səbəblərdən erməni təşkilatlarının qondarma "Dağlıq Qarabağ Respublikasını" münaqişədə bərabərhüquqlu tərəf kimi danışıqlar prosesinə cəlb etmək təkliflərini səmərəsiz adlandırmışdır.

AzərTAc

Azərbaycan.- 2009.- 26 iyul.- S. 8.