Cenevrədə Azərbaycanın Dünya Ticarət Təşkilatına üzv olması üzrə işçi qrupunun iclası keçirilmişdir

Xarici İşlər Nazirliyinin mətbuat xidmətindən bildirmişlər ki, iyulun 24-də Cenevrədə Azərbaycanın Dünya Ticarət Təşkilatına (DTT) üzv olması üzrə işçi qrupunun 7-ci iclası keçirilmişdir.

İclasda Azərbaycanın Xarici İşlər, İqtisadi İnkişaf, Ədliyyə, Sənaye və Energetika, Maliyyə, Vergilər və Kənd Təsərrüfatı nazirliklərinin, o cümlədən Standartlaşdırma, Metrologiya və Patent üzrə Dövlət Komitəsi, Dövlət Gömrük Komitəsi, Əmlak Məsələləri Dövlət Komitəsi və Müəllif Hüquqları Agentliyinin nümayəndələri iştirak etmişlər.

Azərbaycan nümayəndə heyətinin rəhbəri, xarici işlər nazirinin müavini Mahmud Məmmədquliyev iclasda Azərbaycan hökumətinin davamlı sosial-iqtisadi inkişafa, ölkə iqtisadiyyatının şaxələndirilməsinə və qeyri-neft sektorunun inkişafı məsələlərinə mühüm əhəmiyyət verdiyini bildirmiş, bu istiqamətdə son dövrdə görülən işlərdən danışmışdır.

M.Məmmədquliyev Azərbaycanın milli iqtisadi maraqlarını özündə təsbit edən mallar və xidmətlər üzrə təkmilləşdirilmiş təkliflər və digər sənədlər hazırlanaraq DTT katibliyinə və müvafiq ölkələrə təqdim olunduğunu, növbəti ikitərəfli danışıqların aparıldığını söyləmişdir. Bundan əlavə, Azərbaycanın milli qanunvericiliyinin DTT-nin sazişlərinə uyğunlaşdırılması sahəsində ölkədə son altı ayda görülmüş və gələcəkdə görüləcək işlərlə bağlı üzv ölkələrə məlumat verilmişdir.

İclasda iştirak edən bir sıra ölkələrin nümayəndələri - Afrika qrupu adından Misir, açıq dənizə çıxışı olmayan ölkələr adından Paraqvay, habelə Türkiyə, Çin, Braziliya, Pakistan, İordaniya təmsilçiləri çıxış edərək Azərbaycanın əlverişli şərtlərlə DTT-yə üzvlüyünü dəstəkləmiş, ölkəmiz tərəfindən bu istiqamətdə həyata keçirilmiş tədbirləri və onların nəticələrini müsbət qiymətləndirmişlər. Həmçinin ABŞ, Avropa Komissiyası, Kanada, Avstraliya, Koreya Respublikası və digər ölkələrin nümayənədələri Azərbaycanın DTT-yə üzvlüyünü prinsip etibarilə dəstəkləmişlər.

İclas çərçivəsində üzv ölkələr tərəfindən verilən əlavə suallar cavablandırılmış və tədbirin yekununda Azərbaycanın xarici ticarət rejiminə dair yeni sualların üzv ölkələr tərəfindən 2009-cu il sentyabrın 14-dək təqdim olunması, işçi qrupunun növbəti iclasının cari ilin sonunda və yaxud 2010-cu ilin ilk rübündə keçirilməsinə dair qərar qəbul edilmişdir.

Həmçinin cari il iyulun 21-22-də Azərbaycan bazarına girməkdə marağı olan mallar və xidmətlər üzrə müvafiq sorğu təqdim etmiş ABŞ və Avropa Komissiyası ilə ikitərəfli danışıqlar aparılmışdır.

Cari il iyulun 23-də isə ABŞ, Kanada, Avstraliya, Avropa Komissiyası, Türkiyə və digər ölkələrin iştirakı ilə kənd təsərrüfatına daxili dəstək məsələləri üzrə aparılmış çoxtərəfli danışıqlar zamanı Azərbaycan tərəfindən təqdim olunmuş təkmilləşdirilmiş ACC/4 cədvəli, kənd təsərrüfatına daxili dəstəyin səviyyəsi və həcmi müzakirə olunmuşdur.

Səfər çərçivəsində M.Məmmədquliyev DTT, Dünya Bankı və BMT-nin Ticarət və İnkişaf üzrə Konfransının (UNCTAD) yüksək vəzifəli rəsmiləri və mütəxəssisləri ilə Azərbaycanın DTT-yə üzv olması ilə bağlı müzakirələr aparmışdır.

AzərTAc

Azərbaycan.- 2009.- 28 iyul.- S. 1.