Azərbaycanda ilk dəfə "Minimal invaziv cərrahiyyə" mövzusunda beynəlxalq konqres keçirilir

Konqresdə ABŞ, Rusiya, Belçika və Türkiyədən 50-yə yaxın mütəxəssis, həmçinin 200-ə yaxın azərbaycanlı alim və həkim iştirak edir.

Əvvəlcə konqres iştirakçıları Fəxri xiyabana gələrək ulu öndər Heydər Əliyevin xatirəsini ehtiramla anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə gül dəstələri düzülmüşdür.

İştirakçılar Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarlarını ziyarət etmiş, "Əbədi məşəl" abidəsinin və şəhid türk əsgəri memorialının önünə əklil qoymuşlar.

Konqresin açılış mərasimində MNX-nin endoskopik cərrahiyyə və diaqnostika şöbəsinin müdiri, Türkiyə Endoskopik və Laparoskopik Cərrahlar Dərnəyinin, Rusiya Cərrah-Qastroenteroloqlar Cəmiyyətinin həqiqi üzvü Kənan Yusifzadə, MNX-nin baş həkimi Həbib Yüzbaşıyev Azərbaycanda səhiyyə sahəsinə göstərilən dövlət qayğısından danışmışlar.

Bildirilmişdir ki, əhalinin sağlamlığının qorunması, tibbi xidmətlərin keyfiyyətinin daha da yaxşılaşdırılması Azərbaycanda həyata keçirilən sosial-iqtisadi siyasətin başlıca istiqamətlərindən biri kimi daim dövlətin diqqət mərkəzindədir. Son illər iqtisadiyyatın yüksək inkişafı səhiyyəyə də öz təsirini göstərmiş və bu sahədə aparılan islahatlar nəticəsində əhalinin sağlamlığının qorunması istiqamətində bir sıra mühüm işlər görülmüşdür.

Türkiyə Endoskopik və Laparoskopik Cərrahlar Dərnəyinin sədri Emin Ersoy tədbirin əhəmiyyətindən danışaraq vurğulamışdır ki, elmi materialların və praktik təcrübələrin mübadiləsi həm azərbaycanlı, həm də xarici həkimlər üçün çox faydalı olacaqdır.

Konqresdə az müdaxiləli radiologiya metodları, mədə və diafraqma yırtıqlarının endoskopik müalicə üsulları, endoskopik üsulla yoğun bağırsaq, qara ciyər, mədəaltı vəzi və dalaq cərrahiyyəsi, dünyanın son texnologiyalarından olan robot cərrahiyyəsi, çəki artımı - köklük və piylənməyə qarşı endoskopik cərrahiyyənin tətbiqi, öd yolları daşlarının endoskopik müalicəsi, ultrasəs müayinə və müalicə metodları, süd vəzi xəstəliklərinin endoskopik müalicə üsulları və digər mövzularda məruzələr dinlənilmişdir.

Konqresə iyulun 29-da yekun vurulacaqdır.

AzərTAc

Azərbaycan.- 2009.- 28 iyul.- S. 5.