Ədliyyə Nazirliyinin Penitensiar Xidmətinin Bakı istintaq təcridxanasının yeni binası ilə tanışlıq

İyunun 2-də respublikanın güc strukturlarının, hüquq-mühafizə orqanlarının, diplomatik korpusun təmsilçiləri, hüquq müdafiəçiləri, ombudsman, beynəlxalq qurumların, qeyri-hökumət təşkilatlarının və KİV-in nümayəndələri Ədliyyə Nazirliyi Penitensiar Xidmətinin yeni istifadəyə verilmiş Bakı istintaq təcridxanasına gələrək karantin bölməsi, istintaq otaqları, məhbusların saxlanma kameraları, qısa və uzunmüddətli görüşlər üçün otaqlar, mərkəzləşdirilmiş idarəetmə sistemi, tibb-sanitariya və digər bölmələrlə tanış olmuşlar.

Daha sonra təcridxananın akt zalında "dəyirmi masa" keçirilmişdir.

Ədliyyə nazirinin müavini, Penitensiar Xidmətin rəisi, ədliyyə general-mayoru Nazim Ələkbərov burada yaradılan şəraitdən, Prezident İlham Əliyevin bu sahəyə olan diqqət və qayğısından, görüləcək işlərdən danışmışdır. O bildirmişdir ki, 120 il əvvəl inşa edilən və dövrün tələblərinə cavab verməyən 1 saylı Bayıl və 3 saylı Şüvəlan istintaq təcridxanalarının əvəzinə Zabrat qəsəbəsində inşa olunmuş Bakı istintaq təcridxanası beynəlxalq standartlara tam cavab verir. Burada 2500 nəfər saxlanıla bilər. Müəssisədə 1, 2, 4 və 6 nəfərlik 576 kamera vardır. Yaxın gələcəkdə təcridxananın yerləşdiyi ərazinin yaxınlığında Azərbaycan Respublikası Ağır Cinayətlərə dair İşlər üzrə Məhkəmə üçün yeni inzibati binanın inşası planlaşdırılır.

N.Ələkbərov vurğulamışdır ki, Bayıldakı 1 saylı istintaq təcridxanasında saxlanılanlar bu həftə Bakı İstintaq Təcridxanasına köçürüləcəklər. Artıq Şəki və Lənkəranda yeni qarışıq tipli cəzaçəkmə müəssisələrinin inşasına başlanmışdır. Kürdəmir və Gəncədə beynəlxalq standartlara cavab verən həm cəzaçəkmə müəssisəsi, həm də təcridxana tikiləcəkdir.

Milli Məclisin komitə sədri Əli Hüseynov, Baş prokurorun birinci müavini Rüstəm Usubov, Baş prokurorun müavini - hərbi prokuror Xanlar Vəliyev və digər çıxış edənlər burada yaradılan şəraitdən razı qaldıqlarını bildirmiş, penitensiar sistemin fəaliyyətinin yaxşılaşdırılması üzrə kompleks tədbirlərin həyata keçirildiyini diqqətə çatdırmış, məhkumların saxlanma şəraitinin yaxşılaşdırılması istiqamətində dövlətin diqqət və qayğısından bəhs etmişlər. Vurğulanmışdır ki, Azərbaycanda insan hüquqlarının təmin edilməsi sözdə deyil, əməldə özünü göstərir. Bakı istintaq təcridxanasında yaradılan yüksək şərait bunun bariz nümunəsidir.

Tədbirdə təkliflər irəli sürülmüş, ətraflı fikir mübadiləsi aparılmışdır.

AzərTAc

Azərbaycan.-2009.-3 iyun.-S.3.