Suriya Dağlıq Qarabağ münaqişəsinin sülh yolu ilə Azərbaycanın ərazi bütövlüyü çərçivəsində həllinin tərəfdarıdır

İyunun 3-də Azərbaycanın xarici işlər naziri Elmar Məmmədyarov ölkəmizdə səfərdə olan suriyalı həmkarı Valid əl-Muallem ilə görüşmüşdür. Görüşdən sonra birgə mətbuat konfransı keçirən nazirlər müzakirə olunan məsələlər haqqında məlumat vermişlər.

Nazir E.Məmmədyarov bildirmişdir ki, görüşdə siyasi, iqtisadi, humanitar və digər sahələrdə əməkdaşlığın inkişafı ilə bağlı məsələlər müzakirə edilmişdir.

E.Məmmədyarov demişdir ki, görüşdə Dağlıq Qarabağ münaqişəsinin həllinə də toxunulmuş, məsələnin yalnız Azərbaycanın ərazi bütövlüyü, sərhədlərinin toxunulmazlığı prinsipi çərçivəsində nizamlanmasının mümkünlüyü vurğulanmışdır.

Görüşdə, həmçinin Suriya Prezidenti Bəşşar əl-Əsədin Azərbaycana planlaşdırılan səfəri, ölkələrimiz arasında mövcud iqtisadi əlaqələrin genişləndirilməsi ilə bağlı məsələlər, Yaxın Şərq münaqişəsi də müzakirə olunmuşdur. Bildirilmişdir ki, Bakı-Tbilisi-Qars dəmir yolu işə düşdükdən sonra Azərbaycan ilə Suriya arasında ticarət dövriyyəsinin həcmi artacaqdır.

Suriyalı nazir Valid əl-Muallem isə üç il əvvəl Azərbaycanda olduğunu və keçən dövr ərzində Bakının sürətlə inkişaf etdiyini demişdir.

Nazir Valid əl-Muallem Suriya üçün Azərbaycan ilə əməkdaşlığın əhəmiyyətini xüsusi qeyd edərək bildirmişdir ki, səfərinin əsas məqsədi ölkələrimiz arasında dialoqun davam etdirilməsi və möhkəmləndirilməsidir.

Dağlıq Qarabağ probleminin həll edilməməsinin bütün region üçün təhlükə doğurduğunu deyən nazir Valid əl-Muallem vurğulamışdır ki, ölkəsi bu münaqişənin sülh yolu ilə, Azərbaycanın ərazi bütövlüyü çərçivəsində həllinin tərəfdarıdır.

AzərTAc

Azərbaycan.-2009.-4 iyun.-S.5.