Redaksiyada görüş

"Azərbaycan" qəzetinin Baş redaktoru, Milli Məclisin deputatı Bəxtiyar Sadıqov qonağı salamlayaraq qəzetin tarixi və hazırkı fəaliyyəti barədə məlumat verdi. O qeyd etdi ki, 1918-1920-ci illərdə Azərbaycan Xalq Cümhuriyyətinin rəsmi qəzeti olmuş "Azərbaycan" milli müstəqilliyimizin bərpasından sonra yenidən nəşrə başlamış və bu gün eyni funksiyanı yerinə yetirir. Qəzet ölkədə və dünyada cərəyan edən hadisələri işıqlandırarkən ümummilli məsələlərə, cəmiyyəti düşündürən problemlərə xüsusi diqqət yetirir, eyni zamanda, dost ölkələrdə, o cümlədən Səudiyyə Ərəbistanında baş verən yeniliklərlə oxucuları tanış edir.

Baş redaktor qonağın xahişi ilə ölkəmizdə kütləvi informasiya vasitələrinin vəziyyəti ilə bağlı da ətraflı məlumat verdi. O bildirdi ki, Azərbaycan dövləti demokratik cəmiyyətin ayrılmaz tərkib hissəsi olan müstəqil mətbuatın inkişafını daim diqqət mərkəzində saxlayır. Milli müstəqilliyin bərpasından ötən müddət ərzində KİV-in fəaliyyətinin qanunvericilik bazası müntəzəm olaraq təkmilləşdirilmiş, mətbuat azadlığının təmin olunması üçün ardıcıl tədbirlər həyata keçirilmişdir. Ölkədə fəaliyyət göstərən çoxsaylı qəzet, jurnal, informasiya agentliyi, televiziya və radio kanalları daim dövlət qayğısı ilə əhatə olunur. Bu yaxınlarda Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması bu istiqamətdə atılmış növbəti mühüm addım kimi ictimaiyyət tərəfindən rəğbətlə qarşılanmışdır.

"Əl-Cəzirə" qəzetinin baş redaktoru Xalid Malik ölkəmizlə tanışlığından məmnunluğunu ifadə edərək qeyd etdi ki, Azərbaycan dövlət müstəqilliyini bərpa etdikdən sonra qarşısına çıxmış bir-birindən mürəkkəb problemlərə, xüsusilə Ermənistanın hərbi təcavüzünün ağır nəticələrinə baxmayaraq, diqqətəlayiq uğurlar əldə etmişdir. O qeyd etdi ki, Səudiyyə Ərəbistanı Krallığı Azərbaycanla ikitərəfli əlaqələrin inkişafına xüsusi əhəmiyyət verir. Bu istiqamətdə hər iki dövlətin atdığı addımlar dost xalqların mənafeyinə xidmət edir və böyük perspektivlərdən xəbər verir. Eyni zamanda, ölkə mətbuatı, o cümlədən "Əl-Cəzirə" qəzeti öz səhifələrində Azərbaycan həqiqətlərinə həmişə yer ayırır.

Görüşdə iki ölkənin kütləvi informasiya vasitələri, o cümlədən "Azərbaycan" və "Əl-Cəzirə" qəzetləri arasında əməkdaşlığın genişləndirilməsi ilə bağlı fikir mübadiləsi aparıldı, təkliflər irəli sürüldü. Belə bir yekdil fikir vurğulandı ki, bu sahədə qarşılıqlı əlaqələrin dərinləşdirilməsi dost xalqların bir-birinə daha da yaxınlaşmasına şərait yaradar.

Görüşdə ölkəmizin Səudiyyə Ərəbistanındakı səfiri Tofiq Abdullayev, Mədəniyyət və Turizm Nazirliyinin şöbə müdiri Fikrət Babayev iştirak edirdilər.

Azərbaycan.-2009.-7 iyun.-S.3.