Ölkə Prezidentinin sülh danışıqlarını dəstəkləyirik, Ali Baş Komandanın "İrəli!" əmrini yerinə yetirməyə də tam hazırıq

İllərdən bəri ürəklərində vətən həsrəti, yurd nisgili gəzdirən, min bir əzab-əziyyətlərə düçar olan Dağlıq Qarabağ azərbaycanlılarını iyunun 5-də bir araya gətirən tarixi qurultay hər birimizin üzərinə böyük məsuliyyət və vəzifələr qoydu. Qarabağ müharibəsinin dəhşətlərini öz talelərində yaşamış insanlarla yanaşı, Azərbaycanın tanınmış ziyalılarının, o cümlədən görkəmli elm, mədəniyyət və incəsənət xadimlərinin iştirak etdikləri qurultayda ötən dövr ərzində görülmüş işlər bir daha ətraflı təhlil edildi, gələcək məqsəd və hədəflər yenidən müəyyənləşdirildi. Ali məclisimiz yüksək səviyyədə keçdi və qarşısına qoyduğu məqsədə nail oldu.

Ermənistanın əsassız torpaq-ərazi iddiası, etnik təmizləmə siyasəti yürütməsi nəticəsində cəlb olunduğumuz bu ədalətsiz müharibədə Dağlıq Qarabağ vilayəti, Ağdam, Fizuli, Kəlbəcər, Laçın, Cəbrayıl, Zəngilan, Qubadlı rayonları işğal olunmuş, yandırılaraq talan edilmiş, əhalisinə amansız divan tutulmuş, yüz minlərlə soydaşımız məcburi köçkünə çevrilmiş, çoxlu sayda tarixi memarlıq və mədəniyyət abidələri məhv edilmişdir.

Təəssüf ki, ötən əsrdə və yaxın tarixdə münaqişə zamanı ermənilərin Dağlıq Qarabağda törətmiş olduqları bu cinayətlər, soyqırımlar, vəhşiliklər tam araşdırılmamışdır. Nəinki dünya ictimaiyyətinin, hətta ölkə əhalisinin belə, bu hadisələrlə bağlı məlumatları olduqca azdır. Buna görə də qurultaydan sonrakı dövrdə Dağlıq Qarabağ bölgəsi Azərbaycanlı İcması İctimai Birliyi dünya ictimaiyyətinin məlumatlandırılması istiqamətində öz işini fəallaşdırmalı, təxirəsalınmaz tədbirlər həyata keçirməlidir. Bu məqsədlə icma elektron informasiya vasitələrindən geniş istifadə etməli, kompüter mərkəzi, internet şəbəkəsi yaratmalı, təşkilatın saytı və mətbu orqanı olmalıdır. Bütün bunların vasitəsilə mütəmadi olaraq ölkə və dünya ictimaiyyətinə ermənilərin törətmiş olduqları soyqırımı və insanlığa sığmayan cinayətləri, torpaqlarımızın işğala məruz qalması, tarix və mədəniyyət abidələrimizin məhv edilməsi, Dağlıq Qarabağ azərbaycanlılarının pozulmuş hüquq və azadlıqları barəsində ardıcıl məlumatlar çatdırılmalıdır.

Bir məqamı unutmamalıyq ki, Dağlıq Qarabağın hansısa yaşayış məntəqəsi döyüşsüz tərk edilməmişdir. Dörd il ərzində ermənilərə qarşı inadlı müqavimət göstərilmiş, bu torpaqların hər qarışı uğrunda qanlar tökülmüş, şəhidlər verilmişdir. Bu qeyri-bərabər döyüşlərdə Dağlıq Qarabağın və ətraf rayonların uşaqlı-qadınlı, cavanlı-qocalı, bütün azərbaycanlı sakinləri qəhrəmanlıqla iştirak etmişlər. Məhz xocavəndlilərdən təşkil olunmuş özünümüdafiə taburunun apardığı döyüşlər nəticəsində Dağlıq Qarabağın - Xocavənd rayonunun bir hissəsi düşmənlərdən azad edilmiş, qorunub saxlanılmışdır. Təkcə ermənilərlə mübarizədə 4 ay mühasirədə qalan Qaradağlı kəndinin qəhrəman müdafiəçiləri 77 nəfər şəhid vermişdir, bu isə kənd əhalisinin hər 10 nəfərindən biri deməkdir. Əslində isə, erməni vəhşilikləri və işğalı, əsirlik və girovluqda aldıqları fiziki zərbələr, mənəvi və psixoloji sarsıntılar nəticəsində doğma yurdlarını tərk etdikdən sonra həyatdan köçən sakinlərimizin sayı yüzlərlədir. Bu gün müharibənin toxunmadığı bir ailə belə tapmaq mümkün deyildir.

Atəşkəsdən 15 il keçməsinə baxmayaraq, rayonumuzun işğaldan azad olunmuş ərazilərində məskunlaşan sakinlərimizin təhlükəsizliyi yenə də ermənilər tərəfindən pozulur, Xocavənd istiqamətində olan ərazilərimiz demək olar ki, hər gün atəşə tutulur. Dəfələrlə bu ərazidə rayon sakinlərinə, onlara məxsus mal-qaraya, texnikalara ermənilər tərəfindən atılan atəş və basdırılmış minaların partlaması nəticəsində ciddi ziyanlar dəymişdir. Demək olar ki, hər il işğal altında olan ərazilərimiz yandırılır, bəzən bu yanğınlar istifadəmizdə olan ərazilərə keçir, təsərrüfatla məşğul olan əhali üçün böyük çətinliklər yaradır, torpaqlarımıza, meşələrimizə, bir sözlə, ölkəmizin ekologiyasına ciddi ziyan vurulur.

Münaqişənin tənzimlənməsi missiyasını öz üzərinə götürən beynəlxalq təşkilatların, dünyanın aparıcı dövlətlərinin, xüsusilə yaradıldığı dövrdən 17 il keçməsinə baxmayaraq, problemin nizamlanması istiqamətində heç bir ciddi irəliləyişə nail ola bilməyən ATƏT-in Minsk qrupunun bu məsələyə ikili standartlardan yanaşması qəbuledilməzdir. Biz beynəlxalq təşkilatlardan, ATƏT-in Minsk qrupunun üzvlərindən tələb edirik ki, deyilənlərə biganə qalmasınlar, ikili standartlardan əl çəksinlər, işğalçını və işğala məruz qalan tərəfi öz adları ilə çağırsınlar, münaqişənin həllində birmənalı və ədalətli olsunlar.

Regiona səfərləri zamanı Xankəndidə erməni icması ilə görüşən, müzakirələr aparan həmsədrlər Dağlıq Qarabağın azərbaycanlı icmasının haqlı tələblərini dinləməli və nəzərə almalıdırlar. Ümumiyyətlə, gələcəkdə icma Dağlıq Qarabağla bağlı aparılan bütün danışıqlarda iştirak etməli və təmsil olunmalıdır. Eyni zamanda, münaqişə ilə bağlı təşkil olunan tədbirlərdə Qarabağdan olan ictimaiyyət nümayəndələrinin, xüsusilə gənclərin iştirakına şərait yaradılmalı, Qarabağ həqiqətlərinin dünyaya çatdırılmasına nail olunmalıdır. Bütün beynəlxalq təşkilatlar və münaqişənin həlli missiyasını öz üzərinə götürmüş beynəlxalq qurumlar birmənalı olaraq bilməlidirlər ki, Dağlıq Qarabağ azərbaycanlılarının rəyi nəzərə alınmadan, hüquqları tanınmadan münaqişənin həlli yoxdur.

İyunun 5-də Dağlıq Qarabağ bölgəsi Azərbaycanlı İcması İctimai Birliyi İdarə Heyətinin üzvlərinin xarici ölkələrin səfirləri ilə görüşündə də bu məsələyə toxunuldu. Diplomatların diqqətinə çatdırıldı ki, Azərbaycan gec-tez öz problemini həll edəcək, məcburi köçkünlər doğma torpaqlarına qayıdacaqlar. Çünki biz ulu öndər Heydər Əliyevin siyasətinə əsaslanırıq və cənab İlham Əliyev kimi qətiyyətli Prezidentimiz var. Sadəcə olaraq, başqa ölkələr də ədalətli mövqe nümayiş etdirsələr, münaqişə daha tez həll olunar. Görüşdə vurğulandı ki, BMT Təhlükəsizlik Şurasının müvafiq qətnamələri icra olunmadığından, ATƏT-in Minsk qrupu həmsədrlərinin fəaliyyəti nəticə vermədiyindən, münaqişə tərəflərinə münasibətdə ikili standart yeridildiyindən, təcavüzkarla təcavüz qurbanının bərabər tutulduğundan icma üzvləri narazı qalsalar da, bir çox ölkələrdə bu münaqişənin ədalətli həllinin tərəfdarı olan ciddi qüvvələrin olduğuna əmindirlər. Səfirlərdən xahiş olundu ki, bu qüvvələrlə əlaqələrin yaradılmasında dəstəklərini əsirgəməsinlər. Diplomatlarla görüşdə o da qeyd edildi ki, məsələnin sülh yolu ilə həll edilməməsi müharibəyə əl atmaq demək deyildir. Çünki təcavüzkara qarşı sanksiya tətbiqi, müxtəlif təzyiq vasitələri mövcuddur.

Müharibə görən insanlar yaxşı bilir ki, müharibə hansı fəlakətlər törədir. Müharibə anaların göz yaşı, itkilər, ağrı, acı və faciələr deməkdir. Ölkə başçısı bu məsələnin sülh yolu ilə həll olunması üçün gərgin iş aparır. Beynəlxalq hüquq normaları, eləcə də beynəlxalq təşkilatların qəbul etdiyi qərarlar əsasında bu problemin həllinə nail olunmasına çalışır. Ancaq ermənilər də, dünya birliyi də bilməlidirlər ki, danışıqlar əbədi ola bilməz, biz nəyin bahasına olursa-olsun torpaqlarımıza qayıdacağıq. Heç kim unutmamalıdır ki, biz bu torpaqların əzəli sakinləriyik. Hazırda bizim işğal edilmiş torpaqlarımızı hər an azad etməyə qadir güclü ordumuz var. Bugünkü Azərbaycan dövləti Dağlıq Qarabağın işğal olunduğu dövrdəki Azərbaycan deyil. İndi qüdrətli dövlətimiz, qətiyyətli Ali Baş Komandanımız var. Böyük inam və əminliklə bildirirəm ki, vətən həsrəti ilə yaşayan Dağlıq Qarabağ azərbaycanlıları bir nəfər kimi torpaqlarımızın yadelli işğalçılardan təmizlənməsi, ölkəmizin ərazi bütövlüyünün bərpa olunması üçün hər an silaha sarılmağa, ön cərgələrdə döyüşməyə hazırdırlar.

Bu gün ölkəmizdə həssas qayğıya ehtiyacı olan elə insanlar var ki, onların problemlərinin həlli, sosial rifahlarının yüksəldilməsi daha çox diqqət tələb edir. Söhbət Ermənistanın hərbi təcavüzü nəticəsində doğma yurd-yuvalarından, ev-eşiklərindən didərgin düşmüş məcburi köçkünlərdən gedir. Ölkəmizin uğurlu sosial siyasəti, iqtisadi potensialının qüdrətlənməsi məcburi köçkünlərə dövlət qayğısının artmasında və onların həyat şəraitinin yaxşılaşdırılmasında da aydın nəzərə çarpır. Ulu öndər Heydər Əliyevin cəbhəyanı rayonların inkişafına və məcburi köçkünlərə olan diqqət və qayğısının bu gün Prezident İlham Əliyev tərəfindən uğurla davam etdirilməsi hər bir məcburi köçkün ailəsi tərəfindən böyük rəğbətlə qarşılanır. Hələ 2003-cü ildə prezident seçkiləri ərəfəsində cənab İlham Əliyev bəyan etmişdi ki, Azərbaycanda bir dənə də çadır şəhərciyi qalmayacaqdır. Azərbaycan Prezidenti vədinə vaxtından tez əməl etməklə məcburi köçkünlərin ən böyük sosial problemlərindən birini qayğıkeşliklə yoluna qoydu. Prezident İlham Əliyev tərəfindən layiqincə gerçəkləşdirilən inkişaf konsepsiyasının nəticəsidir ki, indi bütün cəbhəyanı rayonlara yeni həyat verilir.

Ötən ilin oktyabrın 4-də Beyləqan rayonuna gələn Prezident İlham Əliyev burada Xocavənd rayonundan olan məcburi köçkünlər üçün salınmış 500 ailəlik qəsəbənin açılışında iştirak etdi. Bu qəsəbə "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"na əlavə tədbirlər planı əsasında inşa edilmişdir. Burada 60 birotaqlı, 245 ikiotaqlı, 180 üçotaqlı və 15 dördotaqlı mənzil var. Qəsəbədə 360 şagird yerlik orta məktəb, 50 yerlik uşaq bağçası, poçt şöbəsi, 25 çarpayılıq xəstəxana, klub, icma mərkəzi, baytarlıq məntəqəsi, yanğınsöndürmə deposu, inzibati və anbar binaları da var. Qəsəbənin yolları, su və elektrik təchizatı normal səviyyədədir.

Yeni qəsəbə ilə tanışlıqdan sonra xocavəndlilərlə görüşündə Prezident İlham Əliyev bildirdi ki, məcburi köçkünlərin sosial rifahlarının yaxşılaşdırılması problemin tam həlli deyildir: "Mən demişdim ki, bir dənə də çadır şəhərciyi qalmayacaqdır. Artıq yoxdur. Bundan sonra da heç vaxt olmayacaqdır. Biz bu səhifəni bağladıq. Növbəti illərdə, mən qeyd etdiyim kimi, məktəblərdə, hərbi hissələrin ərazilərində, digər yerlərdə yaşayan qaçqın-köçkün soydaşlarımızın yaşayış səviyyəsinin yaxşılaşdırılması üçün əlavə tədbirlər görüləcəkdir. Beləliklə, biz bu böyük sosial problemi aradan qaldıracağıq. Amma bu, məsələnin bir hissəsidir. Sosial yükün azaldılması və insanların yaşayış səviyyəsinin yaxşılaşdırılması məsələnin tam həlli demək deyildir. Məsələnin tam həlli torpaqlarımızın işğalçılardan azad olunmasıdır. Bu məqsədə nail olmaq üçün biz bütün gücümüzü səfərbər etməliyik və edirik. Azərbaycanın artan imkanları, iqtisadi gücü, bölgədəki mövqeləri, bizim həm daxili, həm də xarici siyasətimiz o günü yaxınlaşdırır".

İctimai Birliyimizin tarixi qurultayı Ermənistan-Azərbaycan, Dağlıq Qarabağ münaqişəsinin həllinə öz töhfəsini verəcək, bu məsələdə Dağlıq Qarabağ bölgəsinin azərbaycanlı icmasının yerini bir daha müəyyənləşdirəcəkdir. İnanırıq ki, tezliklə dövlət başçısının, Ali Baş Komandanın rəhbərliyi altında doğma yurdlarımızı, şəhidlərimizin uğrunda vuruşduqları müqəddəs torpaqlarımızı düşmən işğalından azad edəcək və növbəti qurultayımızı Cıdır düzündə keçirəcəyik!

Biz Dağlıq Qarabağdan olan xəyanətkar ermənilərlə deyil, Ermənistanla, dünya erməniləri ilə, beynəlxalq terrorçularla, muzdlular və sovet ordusu ilə təkbaşına vuruşduq, şəhidlər verdik. Amma tökülmüş qan yerdə qalmayacaq, nəyin bahasına olursa-olsun torpaqlarımızı azad edəcək, öz tarixi yurd-yuvamıza qayıdacağıq. Həmin gün uzaqda deyildir...

Eyvaz Hüseynov,

Xocavənd Rayon İcra

Hakimiyyətinin başçısı,

Dağlıq Qarabağ bölgəsi

Azərbaycanlı İcması

İctimai Birliyi İdarə

Heyətinin üzvü

Azərbaycan.-2009.-9 iyun.-S.3.