Yeni Azərbaycan Partiyası İmişlidə zona müşavirəsi keçirmişdir

Yeni Azərbaycan Partiyası (YAP) İmişlidə qarşıdakı bələdiyyə seçkiləri ilə bağlı növbəti zona müşavirəsi keçirmişdir.

Tədbirdə YAP Şirvan şəhər, İmişli, Saatlı, Sabirabad, Neftçala, Salyan, Xocavənd, Beyləqan və Füzuli rayon təşkilatlarının, yerli özünüidarəetmə qurumlarının rəhbərləri iştirak etmişlər.

Müşavirədə YAP icra katibinin müavini, Milli Məclisin deputatı Siyavuş Novruzov çıxış edərək ölkə vətəndaşlarının siyasi fəallığının xeyli artdığını, ötən il keçirilən prezident seçkilərində ölkə başçısı İlham Əliyevin yenidən xalqın iradəsi və etimadı ilə hakimiyyət olimpinin zirvəsinə yüksəldiyini vurğulamış, respublikamızda demokratik dəyərlərin tərkib hissəsi sayılan seçki mədəniyyətinin bərqərar olduğunu nəzərə çarpdırmışdır. Natiq bildirmişdir ki, ölkəmizdə bələdiyyələrə qarşıdakı seçkilər də yüksək səviyyədə keçirilməlidir. S.Novruzov kiçik bələdiyyələrin könüllülük prinsipləri əsasında birləşərək yeni ittifaqlar yaratmasının günün tələbi olduğunu vurğulamışdır.

İmişli Rayon İcra Hakimiyyətinin başçısı Əbülfəz Ağayev çıxışında bələdiyyələrin fəaliyyəti ilə bağlı konkret məqamlar üzərində dayanmış, kiçik bələdiyyələrin birləşməsinin yerlərdə sosial problemlərin həllinə yardım göstərəcəyini söyləmişdir.

Tədbirdə YAP rayon təşkilatları rəhbərlərinin qarşıdakı bələdiyyə seçkilərinə hazırlıqla əlaqədar məlumatları dinlənilmişdir.

Azərbaycan.- 2009.- 12 iyun.- S. 3.