Surqutda Azərbaycan gənclərinin milli forumu keçirilmişdir

Regionun neft paytaxtında keçirilmiş tədbirə Ural federal dairəsinə daxil olan şəhərlərdən həmvətənlərimiz toplaşmışlar. Tədbirdə Azərbaycanın Sankt-Peterburqdakı baş konsulu Qüdsi Osmanov, Heydər Əliyev Fondunun RF-dəki nümayəndəliyinin əməkdaşları, RAGT-nin təmsilçiləri, Surqutdakı Azərbaycan Gənclər Klubunun, habelə "Birlik" Azərbaycan Cəmiyyətinin üzvləri iştirak etmişlər. Forum başlanmazdan əvvəl Surqut şəhərindəki Puşkin adına kitabxanaya Heydər Əliyev Fondunun Rusiya Federasiyasındakı nümayəndəliyi adından rus və Azərbaycan dillərində Azərbaycanın ədəbiyyatı, tarixi, incəsənəti haqqında kitablar hədiyyə edilmişdir. Heydər Əliyev Fondunun RF-dəki nümayəndəliyinin rəhbəri Leyla Əliyevanın kitabxana kollektivinə ünvanladığı təbrik məktubunda deyilir: "Xalqlarımız arasında qarşılıqlı münasibətlərin yaxşılaşdırılması və Rusiyada yaşayan azərbaycanlıların öz köklərini yaddan çıxarmaması naminə fond özünün ən mühüm missiyasını yerinə yetirir - Azərbaycanı, Azərbaycan xalqının zəngin tarixi-mədəni irsini təbliğ edir".

Sonra şəhər kitabxanasının konfrans zalında Ural federal dairəsində yaşayan Azərbaycan gənclərinin forumu açıq elan edilmişdir. Təbrik sözü ilə çıxış edən Surqut şəhər qubernatorunun milli məsələlər üzrə köməkçisi Qalina Vıdrina bildirmişdir ki, Azərbaycan gəncləri həm Xantı-Mansı Muxtar dairəsində və həm də Surqut şəhərində çox fəaldırlar. Qalina Vıdrina demişdir: "Bu, əsasən adət-ənənələrin, mədəniyyətin təbliğində, azərbaycanlı gənclərin fəaliyyətində xüsusilə özünü büruzə verir. Bu gənclər Surqut şəhərində anadan olmuş və böyümüşlər. İstərdik ki, onlar Surqutu öz vətəni hesab etsinlər və bu şəhəri doğma Azərbaycan qədər sevsinlər".

Azərbaycan Respublikasının Sankt-Peterburqdakı baş konsulu Qüdsi Osmanov bu il təsis edilmiş RAGT-nin məqsədləri və fəaliyyət dairəsi barədə forum iştirakçılarına ətraflı məlumat vermişdir. O, bu təşkilatın saytı vasitəsilə əlaqələr yaratmağı, tədbirlərdə fəal iştirak etməyi, habelə Rusiyanın qonşu regionlarından gəncləri həmin tədbirlərə cəlb etməyi gənclərə tövsiyə etmişdir.

Surqutdakı Azərbaycan Gənclər Klubunun rəhbəri Xəyalə Quliyeva və digər fəallar onların təşkilatının gördüyü işlərdən bəhs etmişlər. Təkcə Moskvanın deyil, Rusiyanın bütün regionlarının gənclərinin birləşdirilməsində fəal mövqe tutduğuna və bu mühüm işə böyük dəstək verdiyinə görə RAGT-nin rəhbəri Leyla Əliyevaya dərin minnətdarlıq ifadə olunmuşdur. Forum iştirakçıları bildirmişlər ki, son illər özlərinin mahnı və rəqs ansamblını yaratmışlar. Onların sözlərinə görə, milli bayramlar və digər əlamətdar hadisələr şəhərdə yüksək səviyyədə qeyd olunur. Gənc fəallara vəd edilmişdir ki, keçirdikləri bütün tədbirlərdə onlar RAGT-nin yardım və dəstəyinə tam ümid bəsləyə bilərlər.

Forum iştirakçıları, həmçinin onları narahat edən problemlərə, xüsusən miqrasiya məsələlərinə də toxunmuşlar. Qüdsi Osmanov gəncləri əmin etmişdir ki, onların qaldırdıqları bütün problemlər şəhər rəhbərliyi ilə müzakirə ediləcəkdir. Elə həmin gün Qüdsi Osmanov Surqutun DİN və Federal Miqrasiya Xidməti rəhbərliyi ilə görüşmüşdür.

Asya HACIZADƏ,

AzərTAc-ın xüsusi müxbiri

Azərbaycan.- 2009.- 13 iyun.- S. 4.