Hər bir xalqın
tarixi müəyyən mənada ona rəhbərlik etmiş
böyük siyasi liderlərin, parlaq şəxsiyyətlərin
çoxşaxəli fəaliyyətində təcəssümünü
tapır. Azərbaycan kimi özünəməxsus dəyərləri,
mentaliteti, dövlətçilik ənənələri olan
dövlətlərdə şəxsiyyət və lider amili
xüsusi aktuallıq kəsb edir. Bu prizmadan əminliklə demək
olar ki, xalqın əsrlər boyu formalaşan güclü, qətiyyətli,
istiqamətverici milli lider idealı məhz dünya
şöhrətli ictimai-siyasi xadim, ulu öndər Heydər Əliyevin
parlaq şəxsiyyətində həqiqətə
çevrilir. Böyük strateq XX əsr Azərbaycan tarixində
təkcə milli müstəqillik ideyasını praktik surətdə
gerçəkləşdirmiş lider kimi yox, həm də
yaratdığı dövlətin möhkəmliyini,
dayanıqlığını təmin edən, onun hərtərəfli
inkişafı üçün iqtisadi, siyasi və hüquqi zəmin
hazırlayan böyük strateq, müdrik rəhbər kimi daim
xalqın qəlbində yaşayır.
Ulu öndər Heydər
Əliyev bu gün eyni zamanda, Azərbaycanda söz və mətbuat
azadlığının, müstəqil mətbuatın əsasını
qoymuş lider kimi böyük ehtiramla anılır. Sirr deyil
ki, Azərbaycan dövlət müstəqilliyini əldə edəndən
sonra hakimiyyətdə olmuş mürtəce qüvvələrin
dövründə ölkədəki böhranlı
ictimai-siyasi şəraitlə bağlı söz və mətbuat
azadlığından danışmaq mümkün deyildi. Mətbuat
hər addımda sıxışdırılır, azad
sözün müdafiəsində dayanan jurnalistlər
ağır mənəvi və fiziki təzyiqlərə məruz
qalırdılar. Ulu öndər Heydər Əliyevin
1993-cü ilin iyununda xalqın istəyi ilə hakimiyyətə
qayıdışından sonrakı dövrdə isə Azərbaycan
mətbuatının inkişafında tamamilə yeni mərhələ
başlandı. Respublikada ictimai-siyasi sabitliyin bərqərar
olması, vətəndaşların təhlükəsizlik təminatının
və qanunçuluğun tədricən gücləndirilməsi,
sosial-iqtisadi problemlərin həlli istiqamətində ciddi
addımların atılması KİV-nin fəaliyyəti,
söz və mətbuat azadlığının müdafiəsi
sahəsində əsaslı irəliləyişlərin əldə
olunmasına şərait yaratdı.
Həmin dövrdən
etibarən Azərbaycanda mətbuat orqanlarının azad fəaliyyəti
və inkişafı yolunda süni maneələrin aradan
qaldırılması, qanunvericilik bazasının təkmilləşdirilməsi,
qəzetlərin maddi-texniki təchizatının
yaxşılaşdırılması sahəsində
ardıcıl tədbirlərin həyata keçirilməsinə
başlanıldı. Vətəndaş cəmiyyəti
quruculuğunu özünün inkişaf modeli kimi qəbul edən
Azərbaycan Respublikası 1993-cü ildən insan
hüquqları, söz və mətbuat
azadlığının təmin edilməsi ilə
bağlı bir sıra beynəlxalq konvensiyalara, sazişlərə
qoşuldu. 1995-ci ildə ümumxalq referendumu ilə qəbul
edilmiş Azərbaycan Konstitusiyasında ölkə vətəndaşlarının
təhlükəsiz yaşamaq, söz, fikir, vicdan
azadlığı təsbit edildi. Son 10 ildə Əsas Qanunun
tələblərinə müvafiq surətdə həyata
keçirilmiş demokratik-hüquqi islahatlar kütləvi
informasiya vasitələrinin və jurnalistlərin normal fəaliyyətinə
geniş imkanlar açdı.
Azərbaycan
Respublikası Konstitusiyasının 50-ci maddəsində hər
kəsin informasiya əldə etmək hüququ təmin
edilmişdir. Konstitusiyaya bu müddəanın daxil edilməsi
respublikamızın da qoşulduğu beynəlxalq müqavilələrdən
irəli gəlir. 1948-ci ildə BMT tərəfindən qəbul
edilən İnsan Hüquqları Bəyannaməsinin 19-cu maddəsi,
eyni zamanda, 1966-cı ildə yenə BMT tərəfindən qəbul
edilən Mədəni və Siyasi hüquqların
qorunmasına dair Konvensiyanın 19-cu maddəsi, 1950-ci ildə
Romada qəbul edilən Avropa İnsan Hüquqlarının
qorunmasına dair Konvensiyanın 10-cu maddəsi
bütünlükdə hər kəsin məlumat
azadlığını - informasiyanın axtarılması, əldə
edilməsi, hazırlanması, ötürülməsi və
yayılması hüququnu qoruyur.
Ulu öndər Heydər
Əliyevin 1998-ci il 22 iyun tarixli "İnsan
hüquqlarının müdafiəsinə dair Dövlət
Proqramı", eyni zamanda, vətəndaşların Azərbaycan
Konstitusiyasında əksini tapmış söz, mətbuat,
fikir azadlıqlarının təminatına da əlverişli
imkanlar açmışdır. Bu dövlət proqramından
az sonra Azərbaycan Respublikasının Prezidenti tərəfindən
6 avqust 1998-ci il tarixdə imzalanan "Azərbaycan
Respublikasında söz, fikir və mətbuat
azadlığının təmin edilməsi sahəsində tədbirlər
haqqında" fərman kütləvi informasiya vasitələrini
senzuradan azad etmişdir. Mətbuat üzərində dövlət
senzurasının ləğvi barədə fərman kütləvi
informasiya vasitələrinin sürətli inkişafına
ciddi təkan verməklə yanaşı, cəmiyyət həyatında
onların səmərəli rolunun artırılması sahəsində
geniş dövlət proqramının əsas istiqamətlərini
müəyyənləşdirmişdir.
Azərbaycan
Respublikası Prezidentinin 2000-ci il 6 mart tarixli fərmanı ilə
"2000-2001-ci illərdə kütləvi informasiya vasitələrinin
maddi-texniki şəraitinin
yaxşılaşdırılması üçün tədbirlər
proqramı" təsdiq olunmuşdur. Bu fərmandan sonra - 19
iyun 1998-ci il tarixli "Məlumat azadlığı
haqqında", 10 iyun 1997-ci il tarixli "Vətəndaşların
müraciətlərinə baxılması qaydası
haqqında", 3 aprel 1998-ci il tarixli "İnformasiya,
informasiyalaşdırma və informasiyanın mühafizəsi
haqqında", 12 mart 2002-ci il tarixli "Ətraf mühitə
dair informasiya almaq haqqında" Azərbaycan Respublikasının
qanunlarının qəbulu da mühüm addımlardan
olmuşdur. Eləcə də son 8 ildə "Kütləvi
informasiya vasitələri haqqında", "Televiziya və
radio yayımı haqqında", "İnformasiya
azadlığı haqqında", "İctimai televiziya və
radio yayımı haqqında" qanunlar qəbul edilmiş, bu
zaman Avropa Şurasının mütərəqqi rəy və
təklifləri nəzərə alınmışdır. Ölkə
rəhbərliyi demokratik inkişafın qarantı qismində
çıxış etdiyi üçün mətbuatda
özünütənzimləmə funksiyasını həyata
keçirən Mətbuat Şurasının
yaradılmasını mətbuat nümayəndələrinin
öz öhdəsinə buraxmışdır.
Azərbaycan, eyni zamanda,
söz və mətbuat azadlığının təmin edilməsi
sahəsində bir sıra beynəlxalq konvensiyalara, sazişlərə
də qoşulmuşdur. Qüvvədə olan "Kütləvi
informasiya vasitələri haqqında" qanuna əsasən,
KİV-nin təsis olunması, ona sahiblik, ondan istifadə, onun
idarə edilməsi qanunvericilikdə nəzərdə tutulan
hallardan savayı, məhdudlaşdırıla bilməz. Kütləvi
informasiya azadlığı vətəndaşların qanuni
yolla informasiya axtarmaq, əldə etmək, hazırlamaq,
ötürmək, istehsal etmək və yaymaq hüququna
dövlət tərəfindən təminat verilməsinə əsaslanır.
Mətbuat və
İnformasiya Nazirliyinin ləğvi ilə kütləvi
informasiya vasitələrinin təsis olunması sahəsindəki
bəzi süni əngəllər də tam aradan
qaldırılmışdır. Azərbaycan Respublikası
Prezidentinin 11 may 2002-ci il tarixli "Kütləvi informasiya
vasitələri haqqında" Azərbaycan Respublikası
Qanununda dəyişikliklər və əlavələr edilməsi
barədə" fərmanı yazılı medianın təsis
edilməsini və ondan istifadə imkanlarını qat-qat
asanlaşdırmaqla, bu sahədə liberallığı tam təmin
etmiş, mətbu nəşrlərin dövlət
qeydiyyatı ilə bağlı icazə sistemini aradan
götürmüşdür. Bu isə inkişaf etmiş bir
sıra Qərb ölkələrinin mətbuata dair
qanunvericilik təcrübəsinə əsaslanır. Ədliyyə
Nazirliyində 3500-dən artıq KİV-nin qeydiyyatdan
keçməsi də məhz bu liberallaşmanın məntiqi
nəticəsi sayıla bilər.
18 dekabr 2001-ci il tarixdə
aparıcı KİV rəhbərləri ilə
görüşən ümummilli lider Heydər Əliyev milli
jurnalistikanın üzləşdiyi bir sıra problemlərin
aradan qaldırılması üçün mühüm fərman
və sərəncamlar imzalamışdır. Bu sənədlər
mətbuata güzəştli kreditlərin verilməsini,
onların maddi-texniki bazasının daha da gücləndirilməsini,
çoxlu sayda qəzetin "Azərbaycan" nəşriyyatına
olan borcunun 2005-ci ilədək dondurulmasını nəzərdə
tutmuşdur. Bu diqqət və qayğının
qarşılığı kimi, 2002-ci ildə "Jurnalistlərin
dostu" mükafatına layiq görülən Heydər Əliyev
hər zaman ölkədə söz və mətbuat
azadlığının qarantı kimi çıxış
etmişdir.
Ulu öndər
bütün bunlarla yanaşı, ölkə mətbuatının
qüsurlarını, problemlərini də hər zaman
açıq şəkildə bildirmiş, jurnalistləri
milli-mənəvi, etik dəyərlərə riayət etməyə
çağırmışdır. Ümummilli lider mətbuat
azadlığından sui-istifadə hallarını pisləyir,
qanun pozuntularının yolverilməz olduğunu bildirirdi. Heydər
Əliyevin şəxsiyyət kimi böyüklüyü onda
idi ki, o, peşə etikasını kobud şəkildə
pozan, faktlara deyil, şəxsi mülahizələrə
söykənən "yazarlar"ın qanunamüvafiq qaydada
cəzalandırılmasına yol vermir, dövlət məmurlarına
dözümlü olmağı tövsiyə edirdi. Məhz
Heydər Əliyevin humanistliyinin nəticəsi olaraq ötən
illərdə bir sıra məmurlar qəzetlərə
qarşı qaldırdıqları haqlı iddiaları geri
götürmüşlər. Bu fakt ulu öndərin ölkədə
azad mətbuatın fəaliyyətinə necə böyük əhəmiyyət
verdiyini bir daha təsdiqləyir. Ulu öndər Azərbaycanda
söz və mətbuat azadlığının qarantı
olduğunu da dəfələrlə bəyan etmişdir:
"Bizim ümumi məqsədimiz mətbuata daha da çox
azadlıq vermək, söz azadlığını daha
geniş təmin etmək, Azərbaycanda demokratiyanı
bütün sahələr üzrə inkişaf etdirməkdən
ibarətdir. Sizi əmin edirəm ki, biz mətbuat
azadlığı, söz azadlığı, demokratiya sahəsində
öz siyasətimizi ardıcıl şəkildə
aparırıq və aparacağıq. Mətbuat cəmiyyətdə
olan çatışmazlıqları, nöqsanları, hakimiyyətin
fəaliyyətində olan qüsurları tənqid etməklə
həm iqtidara, həm də cəmiyyətin bu nöqsanlardan təmizlənməsinə
xidmət etməlidir. Mən bütün mətbuatın,
müstəqil, müxalifət və ya dövlət mətbuatı
fərq etməz, məhz bu yolla getməsini istəyirəm".
Ulu öndər Heydər
Əliyevin müstəqil respublikamıza rəhbərliyi illərində
həyata keçirilmiş çoxşaxəli islahatların
nəticəsi olaraq bu gün Azərbaycanda söz və mətbuat
azadlığı sahəsindəki mövcud vəziyyət
qabaqcıl demokratik ölkələrlə müqayisə edilə
bilər. Bu mütərəqqi siyasəti son beş ildə
uğurla davam etdirən Prezident İlham Əliyev respublikada mətbu
nəşrlərin sərbəst fəaliyyətinə,
jurnalistlərin öz iradələrini azad şəkildə
ifadə etməsinə bütün imkanların
yaradılmasının tərəfdarıdır. Hələ
2005-ci il 21 iyul tarixində "Azərbaycan mətbuat
işçilərinin təltif edilməsi haqqında",
"Azərbaycan mətbuat işçilərinə fəxri
adların verilməsi haqqında", habelə "Kütləvi
informasiya vasitələrinə maliyyə yardımı
göstərilməsi haqqında" sərəncamların
imzalanması jurnalistlərin əməyinə yüksək
qiymət verildiyini göstərmişdir. "Əkinçi"
qəzetinin 130 illik yubileyinin respublikanın bütün
bölgələrində yüksək səviyyədə qeyd
olunması, jurnalistlərin fəxri adlarla
mükafatlandırılması, bir neçə peşəkar
jurnalistin prezident təqaüdünə layiq görülməsi
dövlətin mətbuata qayğısının bariz təcəssümü
kimi xatırlanır.
Keçid dövründə
KİV-nin üzləşdiyi bir sıra problemlər nəzərə
alınmaqla mətbuata davamlı olaraq qayğı və diqqət
göstərilir. Mətbuatın maddi-texniki və maliyyə
bazasının möhkəmləndirilməsi məqsədilə
2006-cı il fevralın 8-də imzalanmış "Qəzetlərin
Azərbaycan nəşriyyatına olan borclarının ödənilməsi
barədə" sərəncama əsasən qəzetlərin
"Azərbaycan" nəşriyyatına olan 450 min ABŞ
dolları civarında borcu dövlət büdcəsindən
ödənilmişdir. Xüsusi qeyd etmək lazımdır ki,
borcları ödənilən qəzetlər sırasında
müstəqil və müxalifyönlü qəzetlər
çoxluq təşkil etmişdir.
Azərbaycan Prezidenti
İlham Əliyevin 2008-ci il 31 iyul tarixli "Azərbaycan
Respublikasında kütləvi informasiya vasitələrinə
birdəfəlik maliyyə yardımı göstərilməsi
haqqında", eləcə də "Azərbaycan Respublikasında
kütləvi informasiya vasitələrinin inkişafına
dövlət dəstəyi konsepsiyasının təsdiq edilməsi
haqqında" sərəncamları isə təsdiqləmişdir
ki, Azərbaycanda mətbuata göstərilən dövlət
qayğısı davamlı və sistemli səciyyə
daşıyır. Belə bir konsepsiyanın imzalanması milli
mətbuatın problemlərinin həllində keyfiyyətcə
yeni mərhələnin əsasını qoymuşdur. Mətbuata
dövlət dəstəyi konsepsiyasının imzalanması
dövlət orqanları ilə kütləvi informasiya vasitələri
arasında səmərəli əməkdaşlıq
münasibətlərinin inkişaf etdirilməsi, kütləvi
informasiya vasitələrinin iqtisadi müstəqilliyinin və
jurnalistlərin peşəkarlığının
artırılması, vətəndaş cəmiyyəti
quruculuğunda kütləvi informasiya vasitələrinin
rolunun gücləndirilməsi məqsədindən irəli gəlmişdir.
Konsepsiyanın ikinci hissəsində
vurğulanır ki, dövlətin informasiya siyasətinin
başlıca vəzifələrindən biri də kütləvi
informasiya vasitələrinin fəaliyyətində şəxsiyyət,
cəmiyyət və dövlət maraqlarının
tarazlaşdırılmasına yönəlmiş hüquqi,
iqtisadi, təşkilati və texnoloji tədbirlərin müəyyən
edilməsidir. Dövlət orqanlarının fəaliyyəti
barədə ictimaiyyətin məlumatlandırılması isə
kütləvi informasiya vasitələrinin mühüm vəzifələrindən
hesab olunur.
Üçüncü
hissədə isə göstərilir ki, Azərbaycan
Respublikasında kütləvi informasiya vasitələrinin
inkişafına dövlət dəstəyi qanunçuluq,
şəffaflıq, əməkdaşlıq,
qarşılıqlı məsuliyyət prinsipləri əsasında
həyata keçirilir. Eyni zamanda, mətbuata dövlət dəstəyi
kütləvi informasiya vasitələrinin müstəqilliyinin
qorunması, onların fəaliyyətinə hər hansı
müdaxilənin istisna edilməsi, yayılması qanunla
qadağan olunmuş informasiyadan cəmiyyətin qorunması,
kütləvi informasiya vasitələrinin
inhisarlaşmasının qarşısının
alınması, ictimai maraqları əks etdirən layihələrə
üstünlük verilməsi, regional kütləvi informasiya
vasitələrinin inkişafının dəstəklənməsi
kimi prinsipləri özündə ehtiva edir.
Azərbaycan Prezidenti
İlham Əliyevin 3 aprel 2009-cu il tarixli "Azərbaycan
Respublikası Prezidenti yanında Kütləvi İnformasiya
Vasitələrinin İnkişafına Dövlət Dəstəyi
Fondunun yaradılması haqqında" sərəncamı da
məhz Azərbaycan Respublikasında kütləvi informasiya
vasitələrinin inkişafına dövlət dəstəyi
konsepsiyasında əksini tapmış məsələlərin
praktik surətdə gerçəkləşdirilməsi
baxımından mühüm əhəmiyyət kəsb edir. Sərəncamla
həmçinin "Azərbaycan Respublikası Prezidenti
yanında Kütləvi İnformasiya Vasitələrinin
İnkişafına Dövlət Dəstəyi Fondu
haqqında Nizamnamə" təsdiq edilmişdir.
Sərəncamla Nazirlər
Kabineti Azərbaycan Respublikası Prezidenti yanında Kütləvi
İnformasiya Vasitələrinin İnkişafına Dövlət
Dəstəyi Fondunun fəaliyyətinin təşkili
üçün müvafiq yerin ayrılmasını,
maddi-texniki təminatı, xərclər smetasını,
ştat cədvəlini, işçilərin say həddi və
aylıq vəzifə maaşlarını bir ay müddətində
müəyyən etməlidir. Həmçinin hər il
dövlət büdcəsinin layihəsi tərtib edilərkən
kütləvi informasiya vasitələrinə dövlət dəstəyi
məqsədilə müvafiq vəsaitin ayrılması təmin
edilməlidir. Sərəncamda Azərbaycan Respublikası
Prezidentinin Administrasiyasına fondun Müşahidə
Şurasının üzvlüyünə namizədlər barədə
təklifləri bir ay müddətində Azərbaycan
Respublikasının Prezidentinə təqdim etmək
tapşırığı verilir. Müşahidə
şurasına namizədlərin irəli sürülməsi
eyni zamanda, Azərbaycan Mətbuat Şurasına da tövsiyə
edilir.
Sərəncamdan
aşkar görünür ki, Azərbaycan Respublikası
Prezidenti yanında Kütləvi İnformasiya Vasitələrinin
İnkişafına Dövlət Dəstəyi Fondu yaxın
perspektivdə formalaşaraq fəaliyyətə
başlayacaqdır. Konsepsiyaya görə kütləvi
informasiya vasitələrinin inkişafına dövlət dəstəyi
metodiki, təşkilati-texniki, konsultativ, maliyyə və digər
formalarda ola bilər. Metodiki dəstək kütləvi
informasiya vasitələrinin fəaliyyətinin təkmilləşdirilməsi,
onların informasiya əldə etmək imkanlarının
genişləndirilməsi, kütləvi informasiya vasitələri
nümayəndələrinin ixtisas və peşə
hazırlığının artırılması
üçün tövsiyələr, materiallar, məlumat
kitabçaları və digər vəsaitlərin
hazırlanması yolu ilə həyata keçirilməlidir.
Təşkilati-texniki dəstək
isə müxtəlif tədbirlər zamanı kütləvi
informasiya vasitələrinin səmərəli fəaliyyətinə
zəruri şəraitin yaradılması, həmçinin
fikir, söz və mətbuat azadlığı, plüralizm və
kütləvi informasiya vasitələrinin inkişafı
mövzusunda ictimai maraq doğuran seminarların,
konfransların, təlimlərin və digər tədbirlərin
təşkilinə dəstək göstərilməsi vasitəsilə
həyata keçiriləcəkdir.
Konsepsiyada göstərildiyi
kimi, fond kütləvi informasiya vasitələrinə maliyyə
yardımını müsabiqəli və müsabiqəsiz
şəkildə həyata keçirməlidir. Müsabiqəsiz
maliyyə dəstəyi bölgələrdə fəaliyyət
göstərən kütləvi informasiya vasitələrinə,
sosial, mədəni və uşaqlar üçün xüsusi
nəşrlərə ünvanlı yardımları, habelə
dövlət orqanları tərəfindən normativ hüquqi
aktların və digər rəsmi sənədlərin nəşrinə
sifariş verildikdə məqsədli ayırmaları -
subvensiyaları, müəyyən məqsədlər
üçün dövlət büdcəsindən verilən
maliyyə vəsaitini - subsidiyaları, dövlət və
yerli özünüidarəetmə orqanlarının ödənişli
reklam və elanlarının kütləvi informasiya vasitələrində
yerləşdirilməsini - sosial reklamları nəzərdə
tutur.
Müsabiqəli maliyyə
dəstəyi isə kütləvi informasiya vasitələrinin
iqtisadi müstəqilliyinin gücləndirilməsi, onların
inkişafına xidmət edən perspektivli proqram və biznes
layihələrin həyata keçirilməsi üçün
uzunmüddətli və güzəştli kreditlər verilməsini,
dövlət və cəmiyyət üçün əhəmiyyət
kəsb edən məsələlər üzrə məqsədli
proqram və layihələrin həyata keçirilməsi ilə
əlaqədar kütləvi informasiya vasitələrinə
maliyyə yardımı ayrılmasını nəzərdə
tutur.
Konsepsiyanın
beşinci hissəsində kütləvi informasiya vasitələrinin
inkişafına dövlət dəstəyinin sahələri əksini
tapmışdır. Yaradılacaq fond vətəndaş cəmiyyəti,
hüquqi dövlət quruculuğu, fikir, söz və mətbuat
azadlığının, plüralizmin inkişaf etdirilməsi;
insan hüquq və azadlıqlarının müdafiəsi, vətəndaşların
hüquqi, siyasi mədəniyyət səviyyəsinin yüksəldilməsi;
sosial və siyasi fəallığının
artırılması, ictimai və dövlət
maraqlarının müdafiəsi; Ermənistan-Azərbaycan,
Dağlıq Qarabağ münaqişəsi haqqında həqiqətlərin
dünya ictimaiyyətinə çatdırılması, Azərbaycanın
ədalətli mövqeyinin müdafiə edilməsi; Azərbaycan
Respublikasının dünya birliyinə inteqrasiyası, region
ölkələri və digər dövlətlərlə,
beynəlxalq təşkilatlarla əməkdaşlığının
inkişaf etdirilməsi; qaçqın və məcburi
köçkünlərin, əhalinin sosial cəhətdən
qayğıya ehtiyacı olan təbəqələrinin problemlərinin
işıqlandırılması; Azərbaycanın dövlətçilik
tarixinin, milli adət-ənənələrinin, elm və mədəniyyətinin
təbliği, azərbaycançılıq ideyasının təbliği;
gənc nəslin milli mənlik şüurunun inkişaf
etdirilməsi və vətənpərvərlik hisslərinin tərbiyəsi;
regionların sosial-iqtisadi inkişafının təşviq
edilməsi, azad sahibkarlığın və liberal
iqtisadiyyatın təşviqi, informasiya və kommunikasiya
texnologiyalarının inkişaf etdirilməsi; diaspor
quruculuğu, lobbiçilik və dünya azərbaycanlılarının
həmrəyliyi, dini və milli tolerantlıq, millətlərarası
münasibətlərin inkişaf etdirilməsinə xidmət
edən layihə və proqramları dəstəkləyəcəkdir.
Nəhayət,
konsepsiyanın 6-cı hissəsində kütləvi informasiya
vasitələrinin inkişafına dövlət dəstəyinin
şərtləri kimi dövlət orqanları ilə kütləvi
informasiya vasitələri arasında əməkdaşlığa
əsaslanan maliyyə-müqavilə münasibətlərinin
formalaşdırılması, dövlət tərəfindən
dəstəklənən proqram və layihələrin şəffaf
monitorinqinin aparılması və nəticələrin qiymətləndirilməsi,
kütləvi informasiya vasitələrində peşə
(etik) davranışı qaydalarına riayət edilməsi və
jurnalist peşəkarlığının
artırılması, informasiya vasitəsinin obyektivliyi, qərəzsizliyi,
tərəfsizliyi və məsuliyyətliliyi məsələləri
önə çəkilmişdir.
Azərbaycan Prezidenti
İlham Əliyevin 22 may tarixli sərəncamı əsasında
Azərbaycan Respublikası Prezidenti yanında Kütləvi
İnformasiya Vasitələrinin (KİV) İnkişafına
Dövlət Dəstəyi Fondunun Müşahidə
Şurasının üzvləri və sədrinin təyin
edilməsi də yaxın perspektivdə KİV-yə dövlət
dəstəyi konsepsiyasının
reallaşdırılacağını əminliklə söyləməyə
ciddi əsaslar verir.
Azərbaycan
Respublikası Prezidenti yanında Kütləvi İnformasiya
Vasitələrinin İnkişafına Dövlət Dəstəyi
fondunun yaradılması dövlətin mətbuata hərtərəfli
qayğısının daha bir əyani təzahürü kimi
diqqətəlayiqdir. Əminliklə demək olar ki, belə
bir fondun yaradılması ilə Azərbaycan mətbuatının
inkişaf tarixində yeni mərhələnin əsası
qoyulmuşdur. Fondun qarşısında duran məqsədlərin
uğurla gerçəkləşdirilməsi kütləvi
informasiya vasitələrinin üzləşdiyi bir çox
problemlərin aradan qalxmasına, mətbuat-dövlət
münasibətlərinin sivil məcrada tənzimlənməsinə
əlverişli zəmin yaradacaqdır.
Samir ELMANOĞLU
Azərbaycan.- 2009.- 14 iyun.- S. 9.
