Milli qurtuluş yeni mərhələdə Azərbaycanın milli dövlət quruculuğunun ideya əsası kimi çıxış edir

İyunun 13-də "Hyatt Regency-Naxçıvan" mehmanxanasında Yeni Azərbaycan Partiyası 15 İyun - Milli Qurtuluş Gününə həsr olunmuş "Qurtuluşdan başlanan yol" adlı konfrans keçirmişdir.

Konfrans iştirakçıları əvvəlcə Fəxri xiyabana gələrək xalqımızın ümummilli lideri, müasir Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.

Tarixi bayram münasibətilə konfrans iştirakçılarını təbrik edən Yeni Azərbaycan Partiyasının sədr müavini-icra katibi, Milli Məclisin deputatı Əli Əhmədov 15 iyun tarixinin xalqımızın və dövlətimizin həyatında əhəmiyyətindən bəhs edərək bildirmişdir ki, Milli Qurtuluş Azərbaycanın yeni mərhələdə milli dövlət quruculuğunun ideya əsası kimi çıxış edir. Ə.Əhmədov demişdir: "Azərbaycanın milli dövlətçilik ənənələrinin bərpa edilməsi və milli dövlətçiliyin möhkəmləndirilməsi istiqamətində atılan addımların qurtuluş məfkurəsinə istinad etməsi heç də təsadüfi deyil. Bu, Azərbaycanda 1990-cı illərin əvvəllərində yaranmış tarixi şəraitdə milli dövlət quruculuğunun üzləşdiyi spesifik xüsusiyyətlərlə və tarixi şərtlərlə bilavasitə əlaqədar idi".

Məhz ulu öndər Heydər Əliyevin xilaskarlıq missiyası nəticəsində Azərbaycanın təhlükələrdən qurtulduğunu qeyd edən YAP sədrinin müavini, 15 iyunun Azərbaycan tarixində tutduğu yerdən danışmış və bildirmişdir ki, bu gün xalqımızın taleyində dönüş anı olmuşdur. Ümummilli lider Heydər Əliyevin xalqımızın təkidli tələbi ilə hakimiyyətə qayıdışı müstəqil dövlətçiliyimizi anarxiyadan, parçalanmaq və məhv olmaq təhlükəsindən, iqtisadi tənəzzüldən, beynəlxalq təcriddən xilas etmişdir. Milli Qurtuluş Günü Azərbaycanın indiki reallıqlarının və xoşbəxt gələcəyinin rəhnidir. Ulu öndərin işləyib hazırladığı müstəqil dövlət quruculuğu konsepsiyası müasir Azərbaycan dövlətinin uğurlarının bünövrəsində dayanaraq gələcək inkişafın, misli görünməmiş uğurların əsasını qoymuşdur.

Hazırda Azərbaycanın dünyada davam edən maliyyə-iqtisadi böhrana baxmayaraq, inkişaf etməsinin məhz Qurtuluş Günü ilə başlamasını bir daha vurğulayan Əli Əhmədov, həmin siyasətin bu gün Prezident İlham Əliyev tərəfindən böyük uğurla davam etdirildiyini diqqətə çatdırmışdır. Natiq qeyd etmişdir ki, bu gün Azərbaycanın bütün dünya tərəfindən etiraf olunan dinamik inkişafı ilk növbədə vətəndaşlarımızın maddi-rifah halının yaxşılaşmasına xidmət edir, paytaxtla bərabər regionlar da sürətli tərəqqi yolu ilə inamla addımlayır.

Konfransda Azərbaycan Respublikası Baş nazirinin birinci müavini, YAP Siyasi Şurasının üzvü Yaqub Eyyubov "Qurtuluş günü" mövzusunda məruzə ilə çıxış etmişdir.

XX əsrin sonlarında xalqımızın başına gətirilən müsibətləri xatırladan Y.Eyyubov qeyd etmişdir ki, o ağır illərdən əvvəl Azərbaycan tarixinin taleyüklü məsələlərlə dolu bir dövrü də xalqımızın müdrik oğlu Heydər Əliyevin adı ilə bağlı olmuşdur.

Azərbaycanda ilk dəfə 1969-1982-ci illərdə hakimiyyətdə olan ulu öndər Azərbaycan xalqını zamanın ən çətin sınaqlarından çıxararaq, ölkənin iqtisadi, siyasi və mədəni tərəqqisinə nail olmuş, geniş vüsət almış gur inkişaf proseslərinə təkan vermişdi.

Ümummilli liderin ömrü boyu Azərbaycan xalqının rifahı naminə çalışdığını vurğulayan məruzəçi qeyd etmişdir ki, o, keçmiş sovet dövründə dövlət təhlükəsizliyi orqanlarında ən yüksək vəzifə tutmuş və general rütbəsi almış ilk azərbaycanlı idi. Heydər Əliyev hansı sahədə çalışmasından asılı olmayaraq, bacarığı, qabiliyyəti, fitri istedadı ilə diqqəti cəlb etmişdir.

Heydər Əliyevin milli kadrların yetişməsinə həmişə böyük qayğı və diqqətlə yanaşdığını qeyd edən baş nazirin birinci müavini, öz timsalında ulu öndərin gənclərə münasibətinin canlı şahidi olduğunu xatırlatmışdır. Vurğulamışdır ki, ümummilli liderimiz hansı sahədə çalışmasından asılı olmayaraq, milli kadrların hazırlanmasını xüsusi diqqətdə saxlayır, onların sonrakı inkişafını da izləyirdi.

Ulu öndərin xalqımız tərəfindən aforizm kimi qəbul olunan "Qoy ədalət zəfər çalsın!" çağırışını xatırladan natiq, ötən əsrin 70-ci illərində məhz bu şüar altında Azərbaycanın böyük uğurlara imza atdığını bir daha vurğulamışdır. Məhz Heydər Əliyevin rəhbərliyi altında 13 il dalbadal keçmiş sovet hakimiyyətinin keçici qırmızı bayrağına layiq görülmüş Azərbaycan geridə qalmış kənd təsərrüfatı respublikasından qabaqcıl sənaye ölkəsinə çevrilmişdir.

Ermənistan-Azərbaycan, Dağlıq Qarabağ münaqişəsinin də Heydər Əliyev hakimiyyətdən məcburi uzaqlaşdırıldıqdan sonra baş verdiyini xatırladan Y.Eyyubov vurğulamışdır ki, xalqımızın müdrik oğlu vəzifədə olarkən heç kim bu barədə danışmağa belə cürət edə bilmirdi.

1990-cı ilin yanvarında xalqımıza qarşı törədilən qanlı faciəyə dözə bilməyən Heydər Əliyev hadisələrin gərginliyinə, müxtəlif təhlükələrə baxmayaraq, Azərbaycanın Moskvadakı nümayəndəliyinə gələrək, sovet rəhbərliyinə qarşı kəskin bəyanatla çıxış etdi. Onun bu tarixi çıxışı Azərbaycanın siyasi həyatında yeni dövrün başlandığını bildirən ilk çağırış idi.

Qanlı 20 Yanvar hadisələrindən sonra ulu öndərin böyük çətinliklər bahasına Azərbaycana qayıtması, keçmiş sovet sisteminin oyuncağı olan yerli rəhbərliyin Heydər Əliyevə qarşı xəyanətkar hərəkətlərindən danışan məruzəçi ona Bakıda yaşamağa və işləməyə imkan verilmədiyini də xatırlatmışdır. Əvəzində doğulub boya-başa çatdığı Naxçıvan torpağı, yerli əhali onu hədsiz sevgi, məhəbbət və inamla qarşılamışdır. Hətta bütün maneələrə baxmayaraq, qısa müddət ərzində onu özünə rəhbər seçmişdir. Hər zaman olduğu kimi, öz gəlişi ilə Heydər Əliyev Naxçıvana yeni nəfəs gətirdi, ağır blokada şəraitində olmasına baxmayaraq, bu qədim Azərbaycan torpağı dirçəlməyə başladı.

Naxçıvanda idarəetmənin uğurlarını görən xalqımız Azərbaycan dövlətçiliyinin xilası naminə Heydər Əliyevin ölkə rəhbərliyinə gətirilməsini tələb etməyə başladı.

AXC-Müsavat cütlüyünün səriştəsiz rəhbərliyi nəticəsində yaranmış dözülməz şərait, ölkənin vətəndaş müharibəsi, parçalanma və dağılma təhlükəsi ilə üzləşməsi, Ermənistanın hərbi təcavüzünün genişlənməsi qəti addımların atılmasını, hakimiyyətin etibarlı əllərə tapşırılmasını tələb edirdi. Həmin vaxt hakimiyyətdə olan qüvvələr xalqın iradəsinin ziddinə olaraq şəxsi mənafe, qarşıdurma, xəyanət yolunu tutmuşdular. Cəmi bir ilin içərisində bu səriştəsiz "rəhbərlər" xalqın arasında nüfuzdan düşdülər. Onlar hər vasitə ilə siyasi rəqiblərinə, xüsusən xalqın sevimli oğlu Heydər Əliyevə düşmən gözü ilə baxmağa, onun nüfuzuna ləkə salmağa çalışırdılar. Çünki onlar yaxşı başa düşürdülər ki, gec-tez xalq saxtakar, naşı rəhbərləri süpürüb atacaq, yerinə öz həqiqi, parlaq liderini gətirəcəklər. Əlbəttə, xalqının görkəmli oğlu, alovlu vətənpərvər bu acı hadisələrə laqeyd qala bilməzdi. Geniş ictimaiyyətin davamlı çağırışlarını nəzərə alan Heydər Əliyev 1993-cü il iyunun 9-da Naxçıvandan Bakıya gəldi. Ulu öndərin bu qayıdışı Vətənin xilası, xalqın qurtuluşu idi.

İyunun 15-də Heydər Əliyev Azərbaycan Respublikası Ali Sovetinin sədri seçildi. Məhz həmin gün tariximizə Milli Qurtuluş Günü kimi daxil olmuşdur. Həmin il oktyabrın 3-də isə Heydər Əliyev xalqımızın böyük əksəriyyəti tərəfindən Prezident seçildi. Ulu öndər ölkə Prezidenti kimi Vətəni və xalqı naminə yenə əvvəlki coşqunluqla, əzm və mətanətlə, işgüzarlıqla gecə-gündüz yorulmadan çalışmağa başladı. Y.Eyyubov belə bir fakta diqqəti çəkmişdir ki, xalqımızın görkəmli oğlunun hakimiyyətə qayıdışının ilk vaxtlarında qaçıb gizlənən həmin qorxaqlar bir müddət, yəni Heydər Əliyev ölkədə sabitliyi və əmin-amanlığı bərpa etdikdən sonra yenidən baş qaldırıb üzə çıxdılar. Heydər Əliyevin adı, şəxsiyyəti və fəaliyyəti ilə bir araya sığmayan yalanlar yaymağa çalışdılar. Lakin tale göstərdi ki, onların özləri kimi, iftiraları da müvəqqətidir, Tanrı tərəfindən hifz olunan Heydər Əliyev isə əbədi.

Baş nazirin birinci müavini qeyd etmişdir ki, ümummilli liderimiz hakimiyyətə qayıdandan cəmi bir il sonra - 1994-cü ildə dərindən düşünülmüş neft strategiyasının reallaşdırılmasını təmin edən "Əsrin müqaviləsi"nın imzalanmasına nail oldu. Bu müqavilə ölkəmizin tarixində yeni dövr açaraq, dinamik inkişafın təməlini qoydu. Müstəqilliyimizin iqtisadi bünövrəsinin möhkəmlənməsi və Azərbaycanın bu gün dünyada bənzəri olmayan sürətlə davamlı inkişafına zəmin yaratdı.

Ulu öndər Heydər Əliyevin siyasətdə, iqtisadiyyatda və mədəniyyətdə qoyduğu izlərin heç vaxt silinməyəcəyini deyən Yaqub Eyyubov vurğulamışdır ki, Azərbaycan xalqı unudulmaz rəhbərin xoşbəxt gələcəyimiz üçün açdığı yolla qətiyyətlə addımlayır.

Məruzəçi qeyd etmişdir ki, bu gün də mövcud iqtidarın monolit birliyi nəticəsində ümummilli liderimizin qurub-yaratdığı azad, müstəqil, demokratik Azərbaycan onun müəyyən etdiyi strateji xətlə inamla getməkdə, inkişafını davam etdirməkdədir. Bu xətti əzmlə, dəyanətlə irəli aparan isə, ulu öndərin layiqli varisi, praqmatik dövlət xadimi, bütün dünya miqyasında özünəməxsus hörmətə, nüfuza malik Prezidentimiz İlham Əliyevdir.

Baş nazirin birinci müavini vurğulamışdır ki, dövlətimiz və xalqımızın həyatı üçün ən mühüm əhəmiyyət kəsb edən prinsipial məsələlərdə Prezident İlham Əliyev də Heydər Əliyevə xas olan möhkəm iradə və qətiyyətli mövqe nümayiş etdirir, Azərbaycan dövlətinin qüdrətini, sarsılmaz təmələ malik olduğunu öz məhsuldar fəaliyyəti ilə sübut edir. Prezidentimizin apardığı dərin düşünülmüş, uzaqgörən daxili və xarici siyasət, onun xalqa olan səmimi məhəbbəti və doğma Vətənimiz naminə səmərəli fəaliyyəti hər birimizdə qürur hissi oyadır. Xalqımızın firavan gələcəyinin təminatına hesablanmış praqmatik siyasi strategiya sayəsində Azərbaycan regionun lider dövlətinə çevrilmiş, ölkəmizin nüfuzu daha da artmışdır. Prezident İlham Əliyevin səriştəli idarəetmə qabiliyyətinin nəticəsidir ki, indi respublikamız iqtisadi inkişaf tempinə görə dünyanın ən qabaqcıl ölkələrindən biridir.

Məruzəsini dahi öndər Heydər Əliyevin ölkəmizin və dövlətimizin həyatı üçün çox önəmli fikirləri ilə tamamlayan natiq qeyd etmişdir ki, ümummilli liderimizin bu müdrik fikirləri yüzlərlə məqalələrdə, kitablarda öz əksini tapmışdır. Lakin buna baxmayaraq, həmin fikirlər tez-tez təkrar olunmalı, hər bir kəs bu fikirləri qəlbinin süzgəcindən keçirməli, daxilən götür-qoy etməli, düşünməli, o dahi insanın şəxsiyyətinin və fəaliyyətinin nəhəngliyini vicdanının səsi ilə bir daha qiymətləndirməli, özünə örnək, nümunə, həyat amalı kimi götürməlidir: "Əmin ola bilərsiniz ki, Azərbaycanın sükanı etibarlı əllərdədir. Biz Azərbaycanı demokratiya yolu ilə ardıcıl surətdə irəliyə aparacağıq, ölkəmizin müstəqilliyini göz bəbəyimiz kimi qoruyacağıq, Azərbaycanın müstəqilliyini daimi edəcəyik".

Konfransda Heydər Əliyevin neft strategiyasının həyata keçirilməsi və onun gətirdiyi uğurlar barədə məruzə ilə çıxış edən sənaye və energetika naziri Natiq Əliyev bildirmişdir ki, dünya siyasət tarixinə adı əbədi həkk olunmuş ulu öndərin dövlət quruculuğunun hər bir sahəsindəki səmərəli və məhsuldar fəaliyyəti xalqımıza yaxşı məlumdur. Heydər Əliyev ona xas olan müdriklik, uzaqgörənlik, zəngin təcrübə və ölkə iqtisadiyyatının bütün sahələrinin müqayisəli təhlili əsasında Azərbaycanın iqtisadi dirçəlişi üçün neft sənayesinin inkişafı yolunu seçmişdir. Bununla da müstəqil Azərbaycanın iqtisadiyyatı sürətli inkişaf yoluna çıxmışdır.

Milli Məclisin Regional məsələlər komitəsinin sədri Arif Rəhimzadə məruzəsində ötən əsrin 90-cı illərinin əvvəllərində Azərbaycanda gedən prosesləri xatırlatmış, səriştəsiz insanların hakimiyyətə yiyələnməsi nəticəsində baş verənləri konkret faktlarla göstərmişdir. 1993-cü il mayın 25-də Prezidentin İcra Aparatında hüquq mühafizə orqanları işçilərinin müşavirəsində Prezident demişdir: "Xalq deyir: Kaş canımız bu Xalq Cəbhəsinin əlindən qurtaraydı.

Prokurorluqdan, məhkəmədən xahiş edirəm buna cavab versinlər. Bu respublika niyə dağılır?"

Natiq vurğulamışdır ki, məhz bu cür siyasət o zamankı iqtidarı iflic vəziyyətə saldı, ölkədə vətəndaş müharibəsi başladı. Səriştəsiz rəhbərlik nəticəsində müstəqilliyimiz süquta uğramaq təhlükəsi ilə üzləşdi. Xaos və anarxiyadan cana doymuş xalqın səbir kasasını dolduran son damla Gəncə hadisələri oldu. Bu, AXC-Müsavat hakimiyyətinin məntiqi süqutunu yaxınlaşdıran hadisə idi.

Gəncədə baş verən faciənin təfərrüatı haqqında ətraflı məlumat verən məruzəçi qeyd etdi ki, tarixin bu böhranlı məqamında xalq gözünü böyük oğlu, daim qəlbində və yaddaşında yaşatdığı Heydər Əliyevə dikmişdi. Onun şüurunda Heydər Əliyev təkcə ötən əsrin 70-80-ci illərindəki nəhəng quruculuq işləri ilə deyil, həm də blokada şəraitində yaşayan Naxçıvandakı qlobal fəaliyyəti ilə yaşayırdı. Hamı başa düşürdü ki, xalqı bu fəlakətdən yalnız Heydər Əliyev xilas edə bilər. Ulu öndərin hakimiyyətə gətirilməsinin legitim yolu haqqında düşünən ziyalılar ona yeni yaradılacaq siyasi partiyaya rəhbərlik etməyi təklif etdilər. Canı qədər sevdiyi Vətəninin və xalqının taleyinə biganə qala bilməyən ulu öndər bu çağırışa müsbət cavab verdi. 1993-cü ilin noyabrında Naxçıvanda təsis konfransı keçirilən Yeni Azərbaycan Partiyasının digər rayonlarda təşkilatları görünməmiş sürətlə yaranırdı. Ölkədə yaranmış vəziyyət ulu öndərin hakimiyyətə qayıdışını və xalqın qurtuluşunu təmin etdi.

Azərbaycanın real parçalanmaq və dağılmaq təhlükəsi ilə üz-üzə qaldığını bir daha xatırladan A.Rəhimzadə xalqımızın bu fəlakətlərdən xilas yolunu məhz Heydər Əliyev şəxsiyyətində görməsinin tarixin sonrakı mərhələsində öz təsdiqini tapdığını qeyd etmişdir. Ümummilli liderimizin böyük uzaqgörənliklə müəyyən etdiyi strateji xətt bu gün Azərbaycanı regionun lider dövlətinə çevirmişdir. Məhz bu xətt nəticəsində respublikamızda aparılan islahatlar uğurla davam etdirilir, paytaxtla yanaşı rayonlarda da böyük quruculuq işləri aparılır.

"Milli Qurtuluş: xaosdan sabitliyə" adlı məruzəsində Mili Məclisin aqrar siyasət komitəsinin sədri Eldar İbrahimov 15 İyun - Milli Qurtuluş gününün mahiyyəti, onun müstəqil Azərbaycan dövlətinin formalaşmasında və inkişafında rolu barədə geniş danışmışdır. E.İbrahimov böyük qayıdışı doğuran səbəbləri, həmin vaxt cərəyan edən hadisələrin siyasi mahiyyətini açmışdır. Vurğulamışdır ki, Heydər Əliyev öz liderlik keyfiyyətləri ilə dünyanın siyasi elitasının ən uca zirvəsində duran nəhəng şəxsiyyətlərdəndir. Bu zirvədən bütöv bir xalqın - Azərbaycan xalqının dünəni, bu günü və sabahı görünür. Bu dahi şəxsiyyətin fəaliyyətinin hər səhifəsi Azərbaycanın son yarıməsrlik tarixinin mərhələləri ilə üst-üstə düşür. Ona görə də ən yeni tariximizi ümummilli lider Heydər Əliyevdən ayrı təsəvvür etmək mümkün deyildir.

Milli Qurtuluş günündən sonra ümummilli lider Heydər Əliyevin hüquqi, demokratik və dünyəvi dövlət quruculuğu yolunu tutmasından, buna qədər Naxçıvanda Ali Məclisin sədri olarkən həyata keçirdiyi islahatlardan danışan komitə sədri bildirmişdir ki, ulu öndər demokratik Azərbaycanın gələcək inkişaf istiqamətlərinin əsasını məhz bu qədim torpağımızda başlamışdı. Blokada şəraitində olan, heç kimdən yardım və kömək almayan, öz taleyi ilə baş-başa qalıb həddindən çox ağır şəraitdə yaşayan Naxçıvanda Heydər Əliyev gələcəyə nur kimi işıq saçmağa başladı. İlk növbədə Naxçıvanın müdafiəsini təmin etmək məqsədi ilə onun rəhbərliyi altında Müdafiə Komitəsi yaradıldı və erməni hücumlarına tutarlı cavablar verildi. Respublikada ilk dəfə olaraq sovet ordu hissələri bütün əmlakını qoyaraq muxtar respublikanın ərazisini tərk etdi.

Qonşu Türkiyə və İranla münasibətlər normallaşdırıldı, əlaqələr genişləndirildi, Sədərəkdə "Ümid körpüsü" inşa olundu. Muxtar respublikada siyasi və iqtisadi sabitlik bərpa edildi. İlk dəfə məhz burada torpaq islahatlarına və bazar iqtisadiyyatının ayrılmaz atributu olan dövlət əmlakının özəlləşdirilməsinə başlanıldı.

E.İbrahimov ulu öndər Heydər Əliyevin hakimiyyətə qayıtdıqdan sonra həmin islahatları daha geniş çərçivədə tətbiq etdiyini, məhz bunun nəticəsində də bu gün ölkəmizin qüdrətli dövlətə çevrildiyini vurğuladı.

Azərbaycanın gələcəyinin işıqlı və firavan göründüyünü qeyd edən natiq bunun ulu öndərin siyasi xəttinin ardıcıl və davamlı şəkildə həyata keçirilməsi sayəsində əldə olunacağını qeyd etdi.

Konfransa yekun vuran YAP sədrinin müavini-icra katibi Əli Əhmədov vurğulamışdır ki, hakimiyyətə qayıtdıqdan sonra həyata keçirdiyi islahatlar, yeritdiyi siyasət nəticəsində Azərbaycanı bütün dünyaya tanıdan ümummilli lider xalqımızın öz seçimində yanılmadığını sübut etmişdir. Sevindirici haldır ki, dahi öndərin əsasını qoyduğu ideyalar bu gün Prezident İlham Əliyev tərəfindən uğurla həyata keçirilir, Azərbaycan xalqı onun rəhbərliyi altında xoşbəxt gələcəyə doğru qətiyyətlə addımlayır.

AzərTAc

Azərbaycan.- 2009.- 14 iyun.- S. 9.