Azərbaycan xalqının Milli Qurtuluş günü ədliyyə orqanlarında geniş qeyd olunmuşdur

Azərbaycan xalqının xilaskarı, ümummilli liderimiz Heydər Əliyevin 1993-cü il iyunun 15-də ölkə rəhbərliyinə qayıdışı ilə müstəqilliyimizin və dövlətçiliyimizin əsası qoyulmuşdur. Bu gün ölkəmizdə Milli Qurtuluş günü kimi geniş qeyd olunur.

Azərbaycanın müqəddəratının həll edildiyi ən ağır günlərdə üzləşdiyi çətinliklərdən xilas olması, vətəndaş qarşıdurmasının aradan qaldırılması, ictimai-siyasi sabitliyin və inkişafın təmin olunması, dünya birliyində layiqli yer tutması məhz ulu öndərin yenilməz iradəsi, böyük ürəkli Vətən oğlunun öz xalqı qarşısında misilsiz fədakarlığı sayəsində mümkün olmuşdur.

Ədliyyə Nazirliyinin mətbuat xidmətindən bildirmişlər ki, bu əlamətdar gün münasibətilə Ədliyyə Nazirliyinin rəhbər işçiləri Heydər Əliyev Sarayının qarşısındakı parka gələrək müstəqil Azərbaycan dövlətinin memarı və qurucusu, ulu öndər Heydər Əliyevin xatirəsini ehtiramla anmış, abidəsi önünə əklil qoymuşlar. Sonra ümummilli liderin nazirlikdəki büstü önünə gül dəstələri düzülmüş, əziz xatirəsi yad edilmiş, Heydər Əliyev muzeyində dahi öndərin həyat və fəaliyyətini əks etdirən ekspozisiyalarla tanış olunmuşdur.

Əziz bayram nazirliyin bütün qurumlarında geniş qeyd olunaraq əbədiyaşar lider Heydər Əliyevin zəngin dövlətçilik təcrübəsi və siyasi uzaqgörənliyi nəticəsində Azərbaycanın güclü bir dövlətə çevrilməsindən, ulu öndərin xalqımız qarşısındakı misilsiz xidmətlərindən danışılmışdır.

Tədbir iştirakçıları müasir Azərbaycan tarixinin yaradıcısı Heydər Əliyevin müəyyənləşdirdiyi inkişaf kursunun Prezident İlham Əliyev tərəfindən uğurla davam etdirilməsi nəticəsində ölkəmizin möhtəşəm nailiyyətlər qazanmasını vurğulayaraq, ədliyyə işçilərinin bundan sonra da əzmkarlıqla çalışacaqlarını bildirmişlər.

Milli Qurtuluş günü ərəfəsində bəzi yerli ədliyyə orqanlarının yeni inzibati binaları açılmış, infrastrukturun müasirləşdirilməsi və maddi-texniki təminatın gücləndirilməsi istiqamətində tədbirlər görülmüşdür.

AzərTAc

Azərbaycan.- 2009.- 14 iyun.- S. 10.