Trans-Avropa Asiya super informasiya magistralı" layihəsinin təqdimat mərasimi keçirilmişdir

Rabitə və İnformasiya Texnologiyaları Nazirliyinin təşkilatçılığı ilə "Hyatt Recensy" hotelində "Trans-Avropa Asiya super informasiya magistralı" layihəsinin təqdimat mərasimi keçirilmişdir. Tədbirdə dünyanın 42 ölkəsinin Azərbaycanda fəaliyyət göstərən səfirliyinin nümayəndələri iştirak etmişlər.

Mərasimdə iki qitənin 20-dən çox ölkəsini əhatə edəcək informasiya magistralının əhəmiyyəti, layihənin həyata keçirilməsi istiqamətində hazırlıq işləri, dünyanın tanınmış informasiya-kommunikasiya texnologiyaları (İKT) şirkətləri ilə aparılmış danışıqlar, texniki-iqtisadi araşdırmalar və digər məsələlər barədə məlumat verilmişdir. Qeyd edilmişdir ki, Qərblə Şərq arasında super informasiya magistralının yaradılması ilə başa çatacaq bu layihə bütün informasiya-kommunikasiya vasitələrinin qarşılıqlı mübadiləsinə zəmin yaradacaq, Avropa və Asiya regionunun bir çox dövlətləri İKT imkanlarından birgə faydalanacaqlar.

Tədbirdə rabitə və informasiya texnologiyaları naziri Əli Abbasov, xarici işlər nazirinin müavini Mahmud Məmmədquliyev və BMT-nin ölkəmizdəki əlaqələndiricisi Bruno Pueza iştirak etmişlər.

Azərbaycan.- 2009.- 14 iyun.- S. 13.